سەيسەنبى تاڭەرتەڭ نۇر-سۇلتاندا ەكى جەڭىل اۆتوكولىك پەن اۆتوبۋس سوقتىعىستى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەما جاساپ.
جول اپاتىنىڭ ۆيدەوسى الەۋمەتتىك جەلىلەردە تارادى.
قۇقىق قورعاۋ ورگاندارى Sputnik قازاقستانعا مالىمدەگەندەي، وقيعا رەسپۋبليكا مەن بوگەنباي باتىر داڭعىلدارىنىڭ قيىلىسىندا شامامەن 06.25-تە بولدى.
20 جاستاعى «لادا» جۇرگىزۋشىسى دۇكەنۇلى كوشەسى جاعىنان رەسپۋبليكا داڭعىلىمەن كەلە جاتىپ، بوگەنباي باتىر داڭعىلىمەن قيىلىستا باعدارشامنىڭ تىيىم سالىنعان بەلگىسىنە ءوتىپ كەتكەن. سالدارىنان 60 جاستاعى جۇرگىزۋشى باسقارعان Hyundai Elantra-مەن سوقتىعىستى.
ال Hyundai ينەرتسيامەن قيىلىستا تۇرعان جولاۋشىلار اۆتوبۋسىنا قاراي ۇشىپ كەتكەن. «لادا» ورتەنىپ كەتتى.
جول-كولىك وقيعاسى سالدارىنان «لادا» مەن Hyundai جۇرگىزۋشىلەرى جاراقات الدى. دارىگەرلەردىڭ تەكسەرىسىنەن كەيىن ەكەۋى دە ۇيىنە جىبەرىلدى.
بۇل فاكتى بويىنشا انىقتاۋ جۇمىستارى جۇرگىزىلىپ جاتىر.
"ادىرنا" ۇلتتىق پورتالى
(فوتو Sputnik قازاقستان سايتىنان)
