بيىلعى قۇربان ايتتا مالدى ءجون-جوسىقسىز سويماي، بار مالدى ساقتاپ قالۋ جانە جينالعان قاراجاتتى قۋاڭشىلىق بولىپ جاتقان ماڭعىستاۋ مەن قىزىلوردا وبلىستارىنا كومەك رەتىندە بەرۋگە ءپاتۋا شىعارۋ تۋرالى باس مۇفتيگە ۇسىنىس جاسالدى دەپ حابارلايدى "ادىرنا" ۇلتتىق پورتالى.
باس مۇفتيگە مۇنداي ۇسىنىستى "Qazaqstan" ۇلتتىق تەلەارناسىنىڭ "اشىق الاڭ" باعدارلاماسىندا ۇلتتىق مال وسىرۋشىلەر قاۋىمداستىعىنىڭ توراعاسى الماسبەك سادىرباەۆ جولدادى.
— الدا قۇربان ايت كەلە جاتىر. ءبىز ساداقامىزدى بەردىك. قازىر بىرقاتار وڭىرلەردە مال قىرىلىپ جاتىر. وسى ايتتا جينالعان قاراجاتتى قۋاڭشىلىق بولىپ جاتقان ماڭعىستاۋ مەن قىزىلوردا وبلىستارىنا جىبەرەيىك. باس مۇفتيگە بيىل ءجون-جوسىقسىز مال سويماي، بار مالىمىزدى ساقتاپ قالۋ ءۇشىن ءپاتۋا شىعارۋ تۋرالى ۇسىنىس بىلدىرەمىن. وسىنداي قيىن كەزەڭدە ءولىپ جاتقان قۇلىنداردى، انالىق مالدى الىپ قالايىق. ىسىراپ دەمەيمىن، دەگەنمەن بيىل مۇنى توقتاتۋ كەرەك. سەبەبى بۇل دا كومەك بولار ەدى ماڭعىستاۋ مەن قىزىلورداعا، — دەدى الماسبەك سادىرباەۆ.
ايتا كەتۋ كەرەك، بيىل قۋاڭشىلىقتىڭ كەسىرىنەن ماڭعىستاۋدا 1147, قىزىلوردا وبلىسىندا 492 باس مال ولگەن. وسى ورايدا بيىل مال ازىعىن دايىنداۋدى جۇزەگە اسىرۋعا مەملەكەتتەن 1,9 ملرد تەڭگە قارجى بولىنگەن.
"ادىرنا" ۇلتتىق پورتالى.