ماڭعىستاۋ وبلىسىندا 218 تۇلەك "التىن بەلگى" يەگەرى اتاندى دەپ حابارلايدى "ادىرنا" ۇلتتىق پورتالىنىڭ ءتىلشىسى.
بيىل وبلىستا جالپى ءبىلىم بەرەتىن مەكتەپتى 7010 وقۋشى بىتىرگەن. ونىڭ 218-ءى "التىن بەلگى", ال 424-ءى "ۇزدىك اتتەستات" يەگەرى اتاندى.
ماڭعىستاۋ وبلىسى ءبىلىم باسقارماسىنىڭ باسشىسى سۆەتلانا تولەباەۆانىڭ ايتۋىنشا، 2020-2021 وقۋ جىلىندا جالپى ءبىلىم بەرەتىن مەكتەپتەردى 158 756 وقۋشى اياقتادى. ونىڭ 156154-ءى كۇندىزگى مەملەكەتتىك ءبىلىم بەرۋ مەكەمەلەرىندە ءبىلىم الدى.
«ەنگىزىلگەن كارانتيندىك شارالارعا سايكەس، وبلىس مەكتەپتەرىندە وسى وقۋ جىلىندا وقىتۋ 3 فورماتتا جۇرگىزىلدى: قاشىقتان، شتاتتىق رەجيمدە جانە كەزەكشى سىنىپتار ارقىلى. قاشىقتان وقىتۋدىڭ قيىندىقتارىنا قاراماستان وقۋ پروتسەسى توقتاعان جوق. ساباقتار تسيفرلىق پلاتفورمالاردى قولدانۋ ارقىلى ءوتتى. ءبىلىم سالاسىندا كەتكەن ولقىلىقتاردى جويۋ ءۇشىن وڭىردە جازعى مەكتەپتەر جۇمىس جاسادى. وندا 30 مىڭنان استام وقۋشى ءبىلىمىن جەتىلدىردى. وcى وقۋ جىلىنىڭ قورىتىندىسىمەن ساپا كورسەتكىشى 64,9 پايىزدى قۇرادى. ۇلگەرىم – 100 پايىز»، — دەيدى س.تولەباەۆا.
ايتا كەتەيىك، بيىل ۇلتتىق بىرىڭعاي تەستىلەۋ 15 ءساۋىر كۇنى باستالدى. 30 ماۋسىمدا اياقتالادى دەپ جوسپارلانىپ وتىر.
وبلىس اكىمىنىڭ جوعارى جانە جوعارىدان كەيىنگى ءبىلىم الۋعا جەرگىلىكتى بيۋدجەتتەن 175 گرانت تاعايىندالدى. ونىڭ 165-ءى باكالاۆرعا، 10-ى ماگيستراتۋراعا ارنالعان. ماماندىقتار تىزبەسىنە وڭىرگە قاجەتتى پەداگوگيكا، مەديتسينا، اۋىلشارۋاشىلىعى، ونەر سالالارى بويىنشا ماماندىقتار ەنگىزىلدى.
«تاعى ءبىر ەرەكشەلىك، تالاپكەرلەرگە تەست تاپسىرۋعا 2 مۇمكىندىك بەرىلىپ، جوعارى ناتيجەگە قول جەتكىزگەن باللدارىمەن مەملەكەتتىك ءبىلىم بەرۋ گرانتىن الادى. وبلىس اكىمىنىڭ ءبىلىم بەرۋ گرانتىنا كونكۋرس تامىز ايىندا وتەدى. كونكۋرسقا قۇجات قابىلداۋ ورنى قوسىمشا رەسمي حابارلاناتىن بولادى»، - دەيدى باسقارما باسشىسى.
"ادىرنا" ۇلتتىق پورتالى.
