جاڭاوزەن قالاسىندا بۇگىنگى تاڭدا بىرنەشە الەۋمەتتىك نىسان بوي كوتەرىپ، حالىق يگىلىگىنە بەرىلۋدە. سونىڭ ءبىرى — وتتەگى ستانساسى.
كوروناۆيرۋس ينفەكتسياسىنىڭ ورشۋىنە بايلانىستى جاڭاوزەن قالاسىنا وتتەگى ستانساسى كەرەك. قالانىڭ ەپيدەميولوگ دارىگەرى ورىنگۇل جولدىباەۆانىڭ ايتۋىنشا، اۋرۋحانادا جاتقان ناۋقاستاردىڭ 90%-ى وتتەگىگە تاۋەلدى.
«جاڭاوزەندە كوروناۆيرۋسپەن اۋىرىپ جاتقاندار سانى 200-دەن اسادى. مۇنايشى بولىمشەسىندە 84 ناۋقاس جاتىر. تەراپيالىق كورپۋستا 100-دەن استام ادام، بالالارعا ارنالعان بولىمدە 12 بالا جانە 8 ناۋقاس رەانيماتسيا بولىمىندە جاتىر. وسى ايدا 15 ءولىم تىركەلدى. اۋرۋحانادا جاتقان ناۋقاستاردىڭ دەنى اۋىر حالدە. سوندىقتان ولاردى وتتەگىمەن قامتۋىمىز كەرەك. وسى باعىتتا جاقىن ارادا اۋرۋحانامىزدىڭ جانىنان وتتەگى ستانساسى ىسكە قوسىلادى. بۇل - ەمدەلۋشىلەرىمىزگە ۇلكەن كومەك بولعالى تۇر»، -دەدى جاڭاوزەن كوپبەيىندى اۋرۋحاناسىنىڭ دارىگەر-ەپيدەميولوگى ورىنگۇل جولدىباەۆا.
«وزەنمۇنايگاز» اق-نىڭ قارجىلاندىرۋىمەن پروۆيزورلىق ورتالىققا اينالعان بۇل اۋرۋحانادا بۇگىنگى تاڭدا مرت، كت، جىلجىمالى تسيفرلى رەنتگەن اپپاراتى بار.
سونداي-اق، پروۆيزورلىق ورتالىق سىرتىنا ارقايسىسىندا 12 وتتەگى باللونى بار ەكى كونۋستىق بلوك ورناتىلعان. جاڭادان ورناتىلعان وتتەگى ستانساسى دا مۇناي مەكەمەسىنىڭ دەمەۋشىلىگىمەن جۇزەگە اسىرىلىپ جاتىر. قۇنى — 57 ميلليون 775 مىڭ تەڭگە.
قازىرگى تاڭدا ساعاتىنا 10 شارشى مەتر تازا وتتەگى وندىرۋگە قاۋقارلى وتتەگى ستانساسىنا مونتاجداۋ جۇمىستارى جۇرگىزىلۋدە.
"ادىرنا" ۇلتتىق پورتالى.
