شىمكەنت قالاسى اكىمىنىڭ ازاماتتاردى جەكە ماسەلەلەرى بويىنشا ونلاين قابىلداۋىنا كەلگەن ن.اشيروۆ مۇگەدەك بالاسىنىڭ ساۋىقتىرۋ ورتالىقتارىندا ەم الۋىن، دارىلەرىن الۋعا كومەك بەرۋدى سۇراپ كەلدى. بالاعا بولىنگەن ۆيتاميندەر، دارىلەر بەرىلمەي كەلگەنى بەلگىلى بولدى.
«دارىگە قاراجات قارالعان. مۇگەدەكتەر ارباسى بار. نەگە تۇرعىنعا بەرىلمەي وتىر؟ ەگەر كىنالى بار بولسا جازالانۋى كەرەك. تۇرعىندى بۇگىننەن قالدىرماي جەكە قابىلداپ، ماسەلەنىڭ ءمان-جايىن انىقتاڭىز. ماسەلەنى تۇبەگەيلى شەشىپ، ماعان بايانداڭىز. ءدارى-دارمەكپەن قامتاماسىز ەتۋ سالاسىندا ولقىلىقتار بار. سونى رەتكە كەلتىرىڭىز»، - دەپ ءوزىنىڭ ءبىرىنشى ورىنباسارىنا ناقتى تاپسىرما بەردى.
ال، اباي اۋدانىنىڭ تۇرعىنى د.سۇلەيمەنوۆ اقتاس-2 شاعىن اۋدانىنىڭ ينفراقۇرىلىم جانە ايالداما ورناتۋ ماسەلەلەرىن كوتەردى. تۇرعىننىڭ تالاپ-تىلەگىن تىڭداعان شاھار باسشىسى شاعىن اۋداننىڭ گاز ماسەلەسى كەلەسى جىلى شەشىلەتىنىن ايتتى. بۇگىندە قۇرىلىسقا قارجى ءبولىنىپ، مەردىگەر انىقتالىپ جاتىر. ال، ساپالى اۋىز سۋمەن قامتاماسىز ەتۋ ماقساتىندا قۇرىلىس جۇمىستارى قىزۋ جۇرگىزىلۋدە. اتالعان جۇمىستار كۇزدە اياقتالىپ، جىل سوڭىنا دەيىن تۇرعىندار ساپالى اۋىز سۋمەن قامتىلاتىنىن اتاپ ءوتتى. سونىمەن بىرگە، اكىم مۇرات ايتەنوۆ ءتيىستى سالا باسشىسىنا قىركۇيەك ايىندا ايالداما قويىپ بەرۋ جونىندە تاپسىرما بەردى. جۇمىستاردىڭ اتقارىلۋ بارىسىن كورۋ ماقساتىندا اقتاس-2 شاعىن اۋدانىنا بارىپ، تۇرعىندارمەن كەزدەسەتىنىن ايتتى.
ودان وزگە، ۇلاعات شاعىن اۋدانى ە.سپاتاەۆ كوشەسىنىڭ تۇرعىنى سۋ مەن جارىققا قاتىستى شاعىمىن جەتكىزدى. - سۋ قۇبىرىنا كەلەر بولساق، ول جەردە ستاندارتقا ساي ەمەس قۇبىر بولعاندىقتان ارتىق قىسىمدى كوتەرمەي اقاۋ ورىن الىپ جاتىر. «سۋ رەسۋرستارى – ماركەتينگ» جشس-نىڭ ينۆەستيتسيالىق باعدارلاماسىنا سايكەس، وسى جىلى تامىز – قىركۇيەك ايلارىندا توزىعى جەتكەن اۋىز سۋ قۇبىرلارى جاڭارتىلاتىن بولادى. جارىقتاندىرۋ ماسەلەسى كۇزدە شەشىمىن تابادى، - دەدى قالا اكىمى. ەڭبەكشى اۋدانىنىڭ اكىمى د.ەسىلبەككە ماسەلە شەشىمىن تاپقانعا دەيىن جەكە باقىلاۋىنا الىپ، تۇرعىنمەن كەزدەسۋدى جۇكتەدى. ونلاين قابىلداۋ بارىسىندا تۇرعىن ءۇي، الەۋمەتتىك كومەك، جەر ماسەلەسى دە ءسوز بولدى. قالا اكىمى تۇرعىنداردىڭ ارىز-شاعىمى نازاردان تىس قالماي، زاڭدى جانە جوسپارعا ساي شەشىلەتىنىن جەتكىزدى. اۋدان اكىمدەرىنە تۇرعىن الاپتاردى ارالاپ، بيىل جانە الداعى جىلى جاسالاتىن جۇمىستاردى تۇرعىندارعا جۇيەلى تۇردە ءتۇسىندىرىپ وتىرۋدى تاپسىردى.
