قازاقستان رەسپۋبليكاسى تاۋەلسىزدىگىنىڭ 30 جىلدىق مەرەكەسى قارساڭىندا مەملەكەتتىك تاپسىرىسپەن جان باسىنا قارجىلاندىرۋ جوباسىنا قاتىسقان جەكە كاسىپكەرلىكتىڭ ءبىرى - جك «ريتم» ۇيىرمەسى. اتالعان ۇيىرمەنىڭ جۇمىسىمەن قالا اكىمى مۇرات ايتەنوۆ ارنايى بارىپ تانىسىپ، بالالاردىڭ ءبيىن تاماشالادى.
مۇندا اتا-انادان 300 ءوتىنىم تۇسكەن. ولاردىڭ ىشىندە 140 بالا ۇلتتىق بي ۇيىرمەسىنە جازىلعان بولسا، 60 بالا زاماناۋي بيگە، 100 بالا بال بيلەرىنە قاتىسۋعا ءوتىنىش تاستاعان. ۇيىرمە قاراتاۋ اۋدانى «نۇرسات» شاعىن اۋدانى 208ا ۇيدە ورنالاسقان.
ۇيىرمەگە بالالارىن الىپ كەلگەن اتا-انالارمەن تىلدەسكەن قالا اكىمى پرەزيدەنت تاپسىرماسىنا سايكەس بيىلعى جىلى سپورتتىق جانە شىعارماشىلىق سەكتسيالارعا جان باسىنا شاققانداعى قارجىلاندىرۋ جۇيەسى ەنگىزىلگەنىن اتاپ ءوتتى. جاڭا جوبا بويىنشا 4 جاستان 18 جاسقا دەيىنگى بالالار، ونىڭ ىشىندە ەرەكشە قاجەتتىلىگى بار بالالار مەملەكەتتىك تاپسىرىسپەن كەز-كەلگەن سپورت سەكتسياسىنا، شىعارماشىلىق ۇيىرمەسىنە تەگىن بارا الاتىنىن ءتۇسىندىردى.
مادەنيەت، تىلدەردى دامىتۋ جانە ارحيۆتەر باسقارماسىنىڭ باسشىسى ح.ەسەنوۆا وسى جىلدىڭ 28-ءشى ماۋسىمىندا شىعارماشىلىق ۇيىرمەلەردى جان باسىنا قارجىلاندىرۋ قاعيداسى Artsport.edu.kz سايتىندا جاريالانعانىن اتاپ ءوتتى. ونىڭ ايتۋىنشا، بۇل سايتقا وسى كۇننەن باستاپ، بۇگىنگى كۇنگە دەيىن 10 جەكە كاسىپكەردەن 24 ءوتىنىم تۇسكەن. زاڭعا سايكەس 8 ۇيىرمەگە جۇمىس اتقارۋعا رۇقسات بەرىلسە، 5 ۇيىرمەنىڭ قۇجاتى كەرى قايتارىلعان. ال قالعان 11 ۇيىرمەنىڭ قۇجاتتارى قارالۋ ۇستىندە ەكەن. باسقارما باسشىسى قالاداعى جەكە كاسىپكەرلەردى اتالعان جوباعا قاتىسۋعا شاقىردى.
شىمكەنت قالاسى اكىمدىگىنىڭ ءباسپاسوز قىزمەتى
