شىمكەنت قالاسىنىڭ اكىمى مۇرات ايتەنوۆ ورتالىق مەملەكەتتىك ورگاندارعا قارايتىن اۋماقتىق دەپارتامەنتتەردىڭ جۇمىسىمەن تانىسۋ جانە سالاداعى وزەكتى ماسەلەلەردى تالقىلاۋ جيىندارىن وتكىزدى. قر دەنساۋلىق ساقتاۋ مينيسترلىگى شىمكەنت قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنىڭ جۇمىستارى تۋرالى مەكەمە باسشىسى ءابدىماناپ تۋلەباەۆ باياندادى.
دەپارتامەنت باسشىسى ءبىرىنشى جارتىجىلدىقتا قالا تۇرعىندارى اراسىندا اسا قاۋىپتى ينفەكتسيا تۇرلەرى بويىنشا قولايسىز احۋال تىركەلمەگەنىن ايتتى. بىلتىرعى جىلدىڭ وسى كەزەڭىمەن سالىستىرعاندا قىزىلشا 873 جاعدايعا، مەنينگوكوكتى ينفەكتسيا 6 جاعدايعا، بوتۋليزم 7 جاعدايعا، ءجىتى ۆيرۋستى گەپاتيتتەر 3,5 ەسەگە، سونىڭ ىشىندە ۆيرۋستى ا گەپاتيتى 18,4 ەسەگە، تۇماۋ 25 جاعدايعا، قىشىما 34,7%-عا، ەنتەروبيوز 20,5%-عا تومەندەگەنىن مالىمدەدى. پەرزەنتحانالاردا جاڭا تۋعان نارەستەلەردى ۆ ۆيرۋستى گەپاتيتىنە قارسى ۆاكتسيناتسيامەن قامتۋ 95,7 پايىزعا ورىندالسا، تۋبەركۋلەزگە قارسى ۆاكتسينامەن قامتۋ كورسەتكىشى 95,6% ورىندالعان. ەسەپتى مەرزىمدە سانيتارلىق-ەپيدەميولوگيالىق تالاپتاردىڭ ساقتالۋىن قاداعالاۋ بويىنشا 187 نىساندا تەكسەرۋلەر جۇرگىزىلىپ، 149 ۇيعارىم بەرىلگەن. قالا بويىنشا ارەكەت ەتەتىن موبيلدىك (مونيتورينگتىك) توپتاردان 228 جەدەل حابارلاما كەلىپ تۇسكەن. ولاردىڭ نەگىزىندە جۇرگىزىلگەن تەكسەرۋلەر بويىنشا 208 نىسانعا 15 ملن 575 مىڭ تەڭگە كولەمىندە ايىپپۇل سالىنعان.«Ashyq» جوباسى شەڭبەرىندە 254 حابارلاما كەلگەن بولسا، ونىڭ 46-سى باسقا وڭىرلەردىڭ تۇرعىندارى بولۋىنا بايلانىستى وسى ازاماتتاردىڭ تۇرعىلىقتى جەرى بويىنشا سانيتاريالىق-پروفيلاكتيكالىق ءىس-شارالار اتقارۋ جونىندە ءتيىستى ورگاندارعا حابارلاما بەرىلگەن.
ءۇي كارانتيندىك رەجيمىن ساقتاۋ ماسەلەسىندە 38 حابارلاما ءتۇسىپ، ونىڭ 11-ءى - «قىزىل» مارتەبەسى بەرىلگەن ازاماتتار بولسا، 27-ءسى – «سارى» مارتەبەسى بار ازاماتتار ەكەندىگى انىقتالعان. كارانتيندىك رەجيمدى ساقتاماعانى ءۇشىن وسى ساناتتاعى تاعى 7 ازامات اكىمشىلىك جاۋاپكەرشىلىككە تارتىلىپ، ايىپپۇلدار سالىنعان. قالا اكىمى بۇگىنگىدەي كۇردەلى كەزەڭدە مەديتسينالىق ۇيىمدار مەن سانيتاريالىق-ەپيدەميولوگيالىق باقىلاۋ قىزمەتىنە ءتۇسىپ وتىرعان جۇك اۋىر ەكەندىگىن اتاپ ءوتتى. بۇگىنگى كۇننىڭ وزىندە كوروناۆيرۋس ىندەتىن جۇقتىرۋ دەرەگى بويىنشا تاۋلىكتىك كورسەتكىش 575 جاعدايعا تىركەلىپ وتىرعاندىعىنا الاڭداۋشىلىق ءبىلدىردى. دەرتتىڭ بالالار اراسىندا جاپپاي تارالۋىنا جول بەرمەس ءۇشىن بارلىق قاجەتتى شارالاردى اتقارۋ كەرەكتىگىنە توقتالدى. ىندەت جۇقتىرۋدىڭ تاۋلىكتىك كورسەتكىشىندە قالاعا ۋاقىتشا كەلگەن، باسقا ايماقتاردىڭ تۇرعىندارى كوپتەپ كەزدەسىپ جاتقاندىعىن العا تارتىپ، اۋرۋدىڭ تارالۋىن مەيلىنشە تومەندەتۋدە ادامدار اراسىنداعى بارىس-كەلىستى ازايتۋ باعىتىندا پارمەندى جۇمىستار اتقارۋ كەرەكتىگىنە توقتالدى. بۇل باعىتتا قوناق ۇيلەر مەن وتەلدەر قىزمەتىن ەرەكشە باقىلاۋدا ۇستاپ، ۆاحتالىق ادىسپەن قىزمەت اتقاراتىن كاسىپورىندار جۇمىسشىلارىنىڭ توپتاسىپ قونىستانۋلارىنا جول بەرمەۋ كەرەكتىگىنە نازار اۋداردى. كارانتين تالاپتارىنىڭ ساقتالۋىن قامتاماسىز ەتۋدە ناتيجەلى جۇمىستار جۇرگىزۋ بارىسىندا كاسىپكەرلىك نىساندارىنىڭ قىزمەتىن شەكتەۋ ەمەس ەكەنىن ۇعىندىرىپ، وسى باعىتتاعى مەملەكەتتىك ورگانداردىڭ باستى تالابى – ازاماتتار توپتاسۋىنا جول بەرمەۋ، دەرتتىڭ جاپپاي تارالۋىنا جاعداي جاساماۋ ۇستانىمى بولۋى ءتيىس دەدى.
قالالىق دەنساۋلىق ساقتاۋ باسقارماسىنا حالىق دەنساۋلىعىن ساقتاۋداعى جۇمىستاردى جوسپارلى تۇردە، جوعارى ۇيىمداستىرۋشىلىق تارتىپتە جۇرگىزۋدى تاپسىرىپ، ەكپە جۇمىستارىنىڭ بارلىعىن مەرزىمدەرىندە اتقارۋدى جۇكتەدى. بۇل باعىتتا مەديتسينا قىزمەتكەرلەرىنىڭ ءبىر بولىگى جوسپارلى جۇمىستارىمەن اينالىسسا، ەكىنشى بولىگى – كوروناۆيرۋس ىندەتىنىڭ تارالۋىمەن كۇرەس جۇرگىزۋ كەرەكتىگىنە كوڭىل ءبولدى. سانيتاريالىق-ەپيدەميولوگيالىق قىزمەت پەن مەديتسينالىق ۇيىمدار حالىق اراسىنداعى ءتۇسىندىرۋ جۇمىستارىندا بەلگىلى ءبىر جۇيەلى ءتارتىپتى ۇستانۋى كەرەكتىگىن نازارعا الدى. تۇرعىنداردىڭ ءوز دەنساۋلىعىن قورعاۋدا ءبىلىمى جەتكىلىكسىز بولعاندىقتان، ءدارىحانالار جانىنداعى ەكپە ەگۋ بولمەلەرىنە كوپتەپ جۇگىنىپ جاتقاندىعىن العا تارتتى. جيىندا ءدارىحانا ماماندارى تاراپىنان covid ىندەتى بويىنشا ەم جۇرگىزۋ پروتوكولىنا ساي كەلمەيتىن دارىلەر تاعايىنداۋ جاعدايلارى ورىن الىپ جاتقاندىعى ايتىلىپ، تۇرعىندار اراسىندا اۋرۋدى اسقىندىرىپ الماۋ جونىندە ساۋاتتى ءتۇسىندىرۋ جۇمىستارىن بەلسەندى تۇردە جۇرگىزۋ كەرەكتىگى ايتىلدى. قالا باسشىسى بۇل باعىتتاعى اقپاراتتىق جۇمىستاردىڭ باعىتى مىناداي ماسەلەلەردى قامتۋى ءتيىس دەدى: دەرت جۇقتىرعان ادام الدىمەن نە ىستەۋى كەرەك ەكەنىن، ونىڭ ءارى قارايعى ءار قادامىن ءتۇسىندىرىپ ايتاتىن جۇمىستار جۇرگىزۋدى تاپسىردى. ەپيدەميولوگيا ماماندارى ىندەت تارالۋىنا قانداي جاعدايلار سەبەپشى بولاتىنىن ايتىپ وتىرسا، مەديتسينا ماماندارى الگوريتم بويىنشا ەمگە جۇگىنۋدىڭ جولدارىن ءتۇسىندىرۋى كەرەك دەدى. اقپاراتتىق جۇمىستاردىڭ بارلىعى حالىققا ۇعىنىقتى ءارى تەز قابىلداۋعا بەيىم بولۋى كەرەكتىگىن اتاپ ءوتتى.
