الماتى وبلىسى بويىنشا سىبايلاس جەمقورلىققا قارسى قىزمەت وكىلدەرى بيىلعى جىلدىڭ سەگىز ايىنداعى جۇمىس قورىتىندىسىن جاريا ەتتى. بۇل تۋرالى "جەتىسۋ" گازەتى "انتيكور" ورتالىعىنىڭ ءباسپاسوز قىزمەتىنە سىلتەمە جاساپ حابارلادى.
قر سىبايلاس جەمقورلىققا قارسى ءىس-قيمىل اگەنتتىگىنىڭ (سىبايلاس جەمقورلىققا قارسى قىزمەت) الماتى وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى جاندوس جۇماباەۆ ۆەدومستۆونىڭ قىزمەتى جانە اعىمداعى جىلدىڭ 8 ايىنداعى جۇمىس قورىتىندىلارى تۋرالى ايتىپ بەردى.
ەسەپتى بريفينگ "جۋرناليستەر ءۇيى" عيماراتىندا ءوتتى. وعان "جەتىسۋ - ادالدىق الاڭى" جوبالىق كەڭسەسىنىڭ جەتەكشىسى امانجول جازىقباەۆ پەن باق وكىلدەرى، قوعام بەلسەندىلەرى قاتىستى.
كەزدەسۋ وبلىستىڭ سىبايلاس جەمقورلىققا قارسى قىزمەت باسشىسى بىرىنشى ورىنباسارىنىڭ سوزىنەن باستالدى، وندا ول الدىن الۋ جۇمىسىنىڭ نەگىزگى باعىتتارى تۋرالى ايتىپ، وڭىردەگى قىلمىستىق ىستەردىڭ ستاتيستيكاسىن كەلتىردى.
مەملەكەت باسشىسىنىڭ تاپسىرماسىن ورىنداۋ ماقساتىندا دەپارتامەنت سىبايلاس جەمقورلىقتىڭ الدىن الۋ، سونداي-اق داعدارىسقا قارسى شارالارعا بولىنگەن قاراجاتتىڭ ماقساتتى جۇمسالۋىن جەدەل سۇيەمەلدەۋ بويىنشا شارالاردى كۇشەيتتى. سونداي-اق، اتالعان دەپارتامەنت وكىلى سىبايلاس جەمقورلىق قۇقىقبۇزۋشىلىقتارى تۋرالى ستاتيستيكانى جايىپ سالدى.
– "قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتى (سىبايلاس جەمقورلىققا قارسى قىزمەت) 2021 جىلدىڭ 8 ايىندا 87 قىلمىستىق قۇقىقبۇزۋشىلىقتى تىركەدى، ونىڭ ىشىندە 78,2 پايىزدان استامى نەمەسە 68 قىلمىس سىبايلاس جەمقورلىق بولىپ تابىلادى. سىبايلاس جەمقورلىق قىلمىستارىن جاساعانى ءۇشىن 154 ادام قىلمىستىق جاۋاپكەرشىلىككە تارتىلدى، ونىڭ ىشىندە 20 ادام ءارتۇرلى دارەجەدەگى ءبىرىنشى باسشىلار (وبلىستىق ماڭىزى بار – 6, قالالىق – 5, اۋداندىق – 7, اۋىلدىق - 2). 69 مەملەكەتتىك قىزمەتكەر سوتتالدى، ونىڭ ىشىندە 64 ادام 116,9 ميلليون تەڭگە توڭىرەگىندە ايىپپۇل تولەيدى، - دەپ اتاپ ءوتتى جاندوس جۇماباەۆ.
مەملەكەتتىك ساتىپ الۋ سالاسىنداعى جاريالىلىق پەن اشىقتىقتى ارتتىرۋ ماقساتىندا دەپارتامەنت مەملەكەتتىك ساتىپ الۋ پورتالىنا مونيتورينگ جۇرگىزەدى. 2021 جىلدىڭ 8 ايىندا دەپارتامەنت مەملەكەتتىك ساتىپ الۋ مونيتورينگىن جۇرگىزۋ كەزىندە الماتى وبلىسىنىڭ بيۋدجەتىن جالپى سوماسى 7 ملرد.500 ملن.تەڭگەگە ۇنەمدەدى.
قورىتىندىلاي كەلە، ءوڭىردىڭ سىبايلاس جەمقورلىققا قارسى قىزمەت باسشىسىنىڭ ءبىرىنشى ورىنباسارى وبلىستىڭ بارلىق ازاماتتارىن وبلىستىڭ سىبايلاس جەمقورلىققا قارسى قىزمەتىنە بەلسەندى جۇگىنۋگە، سونداي-اق، سىبايلاس جەمقورلىقتىڭ كەز كەلگەن كورىنىستەرىنە مۇلدەم توزبەۋشىلىكتى قالىپتاستىرۋعا شاقىردى.
