بيىل مەملەكەتتىك قارجىلىق قولداۋدان ءۇمىتتى كينوجوبالاردىڭ اشىق قورعاۋىنا «قازاقفيلم» كينوستۋدياسىنىڭ 42 جوباسى جىبەرىلدى، دەپ حابارلايدى «ادىرنا» ءتىلشىسى.
«بۇل جولى كينوستۋديا ەل پرەزيدەنتى قاسىم-جومارت توقاەۆتىڭ تاياۋداعى جولداۋىن نەگىزگە الا وتىرىپ، ءوزىن ءتۇرلى جانردا سىناپ كورەتىن جاس رەجيسسەرلەرگە سەنىم ارتتى. پوستاپوكاليپتيكالىق كيبەرپانكتەردەن پسيحولوگيالىق تريللەرلەرگە دەيىن. جانر، ستيل جانە وقيعالاردىڭ الۋان تۇرلىلىگى ساراپتاما كەڭەسىنىڭ مۇشەلەرىن تاڭ قالدىردى»،— دەپ مالىمدەدى ۇلتتىق كينونى قولداۋ مەملەكەتتىك ورتالىعىنىڭ ءباسپاسوز قىزمەتى.
كينوپروديۋسەر رەتىندە ءوزىن سىناپ كورۋگە بەل بۋعان تانىمال اكتريسا اسەل ساعاتوۆا ەكى قىزىقتى جوبانى تانىستىردى. ءبىرىنشىسى – فەنتەزي ستيلىندەگى كيبەرپانك، رەفەرەنس رەتىندە Marvel ستۋدياسىنىڭ «دجەسسيكا دجونس» اتتى تانىمال سەريالىن العان. بۇل كارتينا ارقىلى وتاندىق كينودا العاشقى سۋپەرقاھارمان ايەل بەينەسى پايدا بولادى. اۆتورلار فيلم رەجيسسەرى رەتىندە جاسۇلان پوشانوۆتى كورەدى. ەكىنشىسى – «ەلەس قالا» تۋرالى ميستيكالىق تريللەر. نەگىزگى لوكاتسيا رەتىندە ارقالىق قالاسى ۇسىنىلعان. ءا.ساعاتوۆانىڭ ايتۋىنشا، ول قالادا مۇنداي جوبانى تۇسىرۋگە ارنالعان، ۇرەي تۋعىزاتىن جەرلەر كوپ.
«دەتي ۆوينى» جوباسىنىڭ تيزەرىن ۇسىنعان رەجيسسەر فارحات ءشارىپوۆ ءوز پرەزەنتاتسياسىنىڭ اۋقىمدىلىعىمەن جانە دايىندىعىمەن جاقسى اسەر قالدىردى. سونداي-اق، اسكەري دراما جانرىندا كەڭەس وداعىنىڭ ەكى مارتە باتىرى، ۇشقىش تالعات بيگەلدينوۆ تۋرالى «شتۋرموۆيك 13» كارتيناسى ۇسىنىلدى. دەگەنمەن، ساراپتاما كەڭەسىنىڭ مۇشەلەرى بۇل جوبانى ءالى دە پىسىقتاۋ قاجەت دەپ سانايدى. سونىمەن قاتار، ساراپتاما كەڭەسى جاس رەجيسسەر راسۋل شارافەددينوۆكە «وتدەل» فيلمىنەن تەلەارنالارعا ارنالعان كوپ سەريالى سەريالدى جاساۋدى ۇسىندى. بۇل كەڭسە قىزمەتكەرلەرىنىڭ كۇندەلىكتى ءومىرى تۋرالى فيلم جانە اۆتورلار رەفەرەنس رەتىندە ايگىلى «وفيس» سەريالى مەن «گاراج» ءفيلمىن اتاپ ءوتتى.
كوپتەگەن جوبالار پسيحولوگيالىق تريللەر مەن وتباسىلىق دراما جانرلارىندا ۇسىنىلدى. بۇل تاقىرىپ ءبىزدىڭ كينەماتوگرافيستەردى قاتتى تولعاندىراتىنى انىق كورىندى.
«ادىرنا» ۇلتتىق پورتالى
