پاۆلودارلىق وتباسى اقتاۋداعى شيپاجايلاردىڭ بىرىنە بارىپ دەمالىپ، بەلگىسىز پارازيت جۇقتىرعان. تەرى استىنداعى جاندىكتەردەن ەكى اي بويى زارداپ شەككەن وتباسىنىڭ وبلىستا بۇگىنگە دەيىن قارالماعان دارىگەرلەرى قالماپتى دەپ حابارلايدى "ادىرنا" ۇلتتىق پورتالى "31 ارناعا" سىلتەمە جاساپ.
اننا پاحوموۆا مەن ونىڭ 13 جاسار قىزى تۇندە ۇيقىدان ايىرىلعان. مۇنىڭ قانداي پارازيت ەكەنى انىقتالماي جاتىر. ءتىپتى ۇلتتىق ساراپتاما ورتالىعىنىڭ ەڭ مىقتى دەگەن ماماندارىنىڭ ءوزى بەلگىسىز جاندىكتىڭ نە ەكەنىن بىلە الماي وتىر ەكەن.
ەڭ قورقىنىشتىسى، سۋعا تۇسكەن ۋاقىتتا الگى جاندىكتەردىڭ ىزدەرى كورىنەدى ەكەن. ءتىپتى، قاناتتى جاندىكتەردىڭ تەرى سىرتىنا شىققان كەزى دە بولعان. اننا پاحوموۆانىڭ سوزىنشە، دەنەلەرىنەن شىعاتىن جاندىكتىڭ نە ەكەندىگى بەلگىسىز.
"عالامتوردان قاراعانىمىزدا بۇرگەگە ۇقساس جاندىك ەكەندىگىن انىقتادىق. بىراق بۇل ناقتى سول ما، سول ەمەس پە بەيمالىم", - دەيدى ول.
دارىگەرلەردىڭ ايتۋىنشا، پاۆلودارلىق وتباسى اۋرۋحانادا ءبىر اپتا جاتقان. جۇرگىزىلگەن ەم-شارالاردىڭ ارقاسىندا دەنەدەگى جاندىكتەر جويىلعانىمەن، ورىندارى ءالى دە بار.
"ۇلتتىق ساراپتاما ورتالىعىنا دياگنوزى جىبەرىلدى. قورىتىندى دياگنوز ءپارازيتتىڭ ءتۇرى انىقتالماعان. قازىرگى ناقتى جاعدايدا ناۋقاستار ۇيىنە شىعارىلدى. جاعدايلارى قاناعاتتانارلىق. شاعىمدارى جوق، دەنە تەمپەراتۋرالارى قالىپتى", - دەيدى پاۆلودار وبلىستىق ينفەكتسيالىق اۋرۋحاناسىنىڭ دارىگەرى گۇلفايرۋز نۇرسەيىت.
ايتا كەتۋ كەرەك، مۇگەدەك بالالاردى كۇتىپ وتىرعان بىرنەشە وتباسى اقتاۋعا شيپاجايعا بارعان. پارازيتتەر سول جاقتا جۇققان. ۇيگە ورالعان سوڭ جالعىزباستى انا ءوز دەنەسىندە دە جاندىكتەردى كورگەن. ول قىزىمەن بىرگە كۇنىنە بىرنەشە رەت ىستىق دۋش قابىلداپ، پارازيتكە قارسى ونداعان ەم شارا جاساۋعا ءماجبۇر بولىپتى.
"ادىرنا" ۇلتتىق پورتالى.
