رەسەي "تاياۋ جىلدار ىشىندە" ەستونياعا شابۋىل جاسايدى. بۇل تۋرالى ەستونيا قورعانىس كۇشتەرىنىڭ قولباسشىسى گەنەرال-لەيتەنانت مارتين گەرەم ETV ارناسىندا بەرگەن سۇحباتىندا حابارلادى.
رەسەيدىڭ ىقتيمال قاۋپىن تالقىلاي وتىرىپ، حەرەم شابۋىلدى جوققا شىعارۋعا بولمايتىنىن جانە وعان مۇمكىندىگىنشە دايىن بولۋ كەرەكتىگىن ايتتى.
ء"بىز رەسەيدىڭ قاۋىپ توندىرەتىنىن، شابۋىل جاساي الاتىنىن ايتامىز. بىراق قاشان؟ بيىل، كەلەسى جىلى، ءۇش جىل ىشىندە؟ ءبىز بۇل الداعى بىرنەشە جىلدىڭ ىشىندە ورىن الۋى مۇمكىن ەكەنىن ءتۇسىنۋىمىز كەرەك. ءبىز كەلەسى جىلداردا بولاتىن قاۋىپتەرگە قارسى رەسۋرستار ءبولۋىمىز كەرەك پە، الدە 2030 جىلعا دەيىن ۋاقىتىمىز بار ما، ول سول كەزدە عانا شابۋىل جاسايدى دەپ وتىرامىز با؟ مەن بولاشاقتا نەمەسە بەس-التى جىلدان كەيىن بولاتىن قاۋىپكە ەمەس، مەن اسكەردى بۇگىن بولۋى مۇمكىن سوعىسقا دايىنداۋىم كەرەك. مۇمكىن رەسەيدىڭ ماقساتى ءبىزدى باسىپ الۋ ەمەس، تۇراقسىزدىق جاساپ، سول ارقىلى باسقارىپ وتىرۋ بولار. بۇل گرۋزياداعى، ۋكرايناداعى، مولدوۆاداعى سياقتى تۇراقسىزدىق بولا ما، الدە باسقا فورماتتا ءوربي مە، ول جاعى جۇمباق. بۇل ءۇشىن ءتالليندى باسىپ الۋدىڭ قاجەتى جوق. ول ءۇشىن گيبريدتى سوعىستىڭ باسقا ەلەمەنتتەرى بۇرىن دا، كەيىن دە جانە سول ۋاقىتتا دا قولداۋ الاتىن اسكەري كۇشتەردىڭ قىسقا، شەكتەۋلى شابۋىلىن جاساۋى مۇمكىن", - دەدى ول.
بالتىق ەلدەرى رەسەيدىڭ اگرەسسياسى شىنايى جانە جاقىن جىلدارى بولادى دەپ سانايدى. سوڭعى بەس جىلدا ولار قورعانىس سالاسىنا بولەتىن قارجىنى ءۇش ەسەگە ارتتىرعان.
"ادىرنا" ۇلتتىق پورتالى
