قازاقستاندىقتار WhatsApp مەسسەندجەرىندە Tengrinews.kz جاڭالىعىنىڭ سكرينشوتتى تاراتىپ جاتىر. سۋرەتتە 20 قىركۇيەكتەن باستاپ ەلىمىزدە وقۋشىلار مەن ستۋدەنتتەر ونلاين رەجيمدە وقۋعا كوشەتىنى تۋرالى جاڭالىق كورسەتىلگەن، - دەپ حابارلايدى “ادىرنا” ۇلتتىق پورتالى stopfake.kz سايتىنا سىلتەمە جاساپ.
شىن مانىندە، تاراتىلعىن سۋرەت وڭدەلگەن. قاشىقتان وقىتۋ فورماتىنا كوشۋ تۋرالى حابارلاماداعى قارىپ جاڭالىقتار پورتالىندا قولدانىلاتىن قارىپپەن ەرەكشەلەنەدى. سونىمەن قاتار، حابارلامادا ستيليستيكالىق قاتەلەر بار. Tengrinews.kz پورتالىندا جاريالانعان تۇپنۇسقا اقپاراتتا 15 قىركۇيەكتەگى ۆاليۋتا باعامى تۋرالى عانا جازىلعان. ماقالادا وقۋشىلار مەن ستۋدەنتتەردى وقىتۋ فورماتىنىڭ وزگەرۋى تۋرالى ەسكەرتۋلەر جوق.
ونلاين وقىتۋ فورماتىنا كوشۋ تۋرالى اقپاراتتى سانيتارلىق-ەپيدەميولوگيالىق باقىلاۋ كوميتەتى دە جوققا شىعاردى.
"بۇل اقپارات شىندىققا جاناسپايدى. بالالار وفلاين رەجيمدە وقۋدا جانە وقۋىن جالعاستىرادى. ەگەر سىنىپتا كوروناۆيرۋس ينفەكتسياسىن جۇقتىرعان وقۋشى انىقتالسا، وندا تەك سول سىنىپ قانا ەكى اپتالىق كارانتينگە جىبەرىلەدى. مەكتەپتەگى قالعان بارلىق وقۋشى وقۋىن ءداستۇرلى فورماتتا جالعاستىرادى", - دەپ ءتۇسىندىردى ۆەدومستۆونىڭ رەسمي وكىلى ەرجان بايتاناەۆ.
قاشىقتان وقىتۋعا كوشۋ تۋرالى حابارلامالار فەيك، ال سكرينشوت قولدان جاسالعان. بيىل 15 قىركۇيەكتە Tengrinews.kz پورتالى وقۋشىلار مەن ستۋدەنتتەر ءۇشىن وقىتۋ فورماتىنىڭ اۋىسقانى تۋرالى حابارلاما جاريالاعان جوق.
”ادىرنا” ۇلتتىق پورتالى
