«نۇر-سۇلتان قالاسىنىڭ جاستار ساياساتى ماسەلەلەرى باسقارماسى» مم قولداۋىمەن، حالىقارالىق «قازاق ءتىلى» قوعامى نۇر-سۇلتان قالاسى فيليالىنىڭ ۇيىمداستىرۋىمەن «ينتەرناتتان كەيىنگى جەتىم بالالار مەن اتا-اناسىنىڭ قامقورلىعىنسىز قالعان بالالاردى بەيىمدەۋ جانە قولداۋ» جوباسى اياسىندا اتقارىلىپ جاتقان ىستەر كوپ. سونىڭ ءبىرى بالالار ءۇيى تۇلەكتەرىنە «بالىق بەرمە، قارماق بەر» ءپرينتسيپى نەگىزىندە ءبىلىم بەرۋ كۋرستارى ۇيىمداستىرىلعان بولاتىن. بۇگىنگى كۇنى وسى باعىتتا اعىلشىن ءتىلى، تۇرىك ءتىلى، كولوريستيكا، سمم جانە كوپيرايتينگ نەگىزدەرى ءتارىزدى كۋرستار ءوز جۇمىستارىن باستاپ كەتتى.
سونىمەن قاتار، جاستار تاراپىنان سۇرانىسقا يە كۋرستاردىڭ ءبىرى –تىگىنشىلىك ونەرىن ۇيرەتۋ كۋرسى بولاتىن. 2021 جىلدىڭ 18 قىركۇيەگىندە جوبا جەتەكشىسى لاريسا الدابەرگەنوۆا مەن جوبا كوورديناتورى احمەتوۆا ءاليا وسى كۋرسقا قاتىسامىن دەپ قىزىعۋشىلىق بىلدىرگەن تۇلەكتەردى ەلىمىزگە تانىمال ديزاينەر، «Zeken moda» وتاندىق برەندىنىڭ نەگىزىن قالاۋشى ابىشەۆ قايروللانىڭ ديزاين ستۋدياسىنا اپارىپ، جۇمىس بارىسىمەن تانىسۋىنا مۇمكىندىك جاسادى. ويتكەنى، تانىمال ديزاينەردىڭ ورتالىعىندا شەبەرلىك كۋرسىنان وقىپ، ءبىلىم الۋڭا دەگەن جاستاردىڭ ىنتاسى زور. قىزىعۋشىلى مول، ىنتا-پەيىلى قىزۋ جاستار وزدەرىنە بولاشاقتا تىگىنشىلىك پەن ديزاينەرلىكتىڭ قىر-سىرىن ۇيرەتەتىن تىگىن ورتالىعى ماماندارىمەن كەزدەسىپ، پىكىر الماستى.
كەزدەسۋ بارىسىندا لاريسا حانىم اتالعان جوبا اياسىندا جاستارعا ءۇش ايلىق كۋرس قاراستىرىلعاندىعىن، الايدا وسى باستاماعا دەگەن جاستار تاراپىنان ۇلكەن قولداۋ، قىزىعۋشىلىق بولاتىن بولسا، بولاشاقتا جالعاستىرۋ جولدارىن قاراستىراتىندىعىن تىلگە تيەك ەتتى.
كەزدەسۋگە قاتىسقان جۇماعازينا اجار تىگىنشىلىك كۋرسىنىڭ جۇمىس ۋاقىتىنان تىس جانە دەمالىس كۇندەرى ۇيىمداستىرىلۋى ىڭعايلى بولاتىندىعىن، وزدەرىنىڭ كۇندىزگى ۋاقىتتا جۇمىستا ەكەندىگى تۋرالى تىلەگىن ءبىلدىردى. تىگىنشىلىكتى ۇيرەتۋشى ماماندار جاستارعا مۇمكىندىگىنشە كومەكتەسىپ، كەشكى مەزگىلدە، دەمالىس كۇندەرى دە ۇيرەتۋدەن جالىقپايتىندىقتارىن جەتكىزدى.
جۋنۋسوۆا الميرا بولسا، بۇرىن تىگىنشىلىكپەن اينالىسقاندىعىن، بىراق ءوز بەتىنشە ۇيرەنگەندىكتەن، كاسىبي دەڭگەيگە جەتە الماعاندىعىنا توقتالىپ، ەلىمىزدىڭ تانىمال ديزاينەرىنەن كاسىبي تىگىن ونەرىن ۇيرەنۋ مۇمكىندىگىن جاساعان جوبا ۇيىمداستىرۋشىلارىنا جىلى لەبىزىن ءبىلدىرىپ، العىسىن ايتتى.
وسىعان وراي، «قازاق ءتىلى» قوعامى نۇر-سۇلتان قالاسى فيليالىنىڭ جۇمىسى دا جەتىم بالالاردى كوپتەپ تارتۋ. سول نەگىزدە جاستاردىڭ ىنتاسىن ارتتۋ ماقساتتار كوپتەگەن جۇمىستار جۇرگىزىلۋدە.
جالپى العاندا، جاستاردىڭ العا قويعان ماقساتتارى ورىندالىپ، ەلىمىزدىڭ مىقتى كيىم برەندتەرىن قالىپتاستىرىپ، ءوز كاسىپتەرىن دوڭگەلەتىپ اكەتىپ جاتسا، اتالعان جوبانىڭ العا قويعان ماقساتتارىنىڭ ءبىر پاراسىنىڭ ورىندالعانى. ال ءبىز جاستارعا جول كورسەتىپ، قولداۋدان شارشامايىق!
