اقتوبە وبلىسىندا 2009 جىلعى حالىق ساناعى قورىتىندىسى 757 768 ادامدى كورسەتكەن. ونىڭ ىشىندە 601 463-ءى — قازاق، 103 069-ى — ورىس، 25 485-ءى — ۋكراين، 800-ءى — وزبەك جانە ت.ب. ۇلتتار بار. ال 1 قىركۇيەكتەن باستالعان بيىلعى ساناققا اقتوبە وبلىسى بويىنشا ازىرگە 173 مىڭعا جۋىق ادام قاتىسقان. قر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ اقتوبە وبلىسى بويىنشا دەپارتامەنتىنىڭ باسشىسى جولداسقالي بەيسوۆتىڭ ايتۋىنشا، بيىلعى ۇلتتىق ساناق ناۋقانىنا دەگەن اقتوبەلىكتەردىڭ بەلسەندىلىگى جوعارى.
ونىڭ ايتۋىنشا، بۇگىنگە دەيىن اقتوبەلىكتەردىڭ اراسىندا sanaq.gov.kz سايتى ارقىلى 149 782 ادام، egov.kz پورتالى ارقىلى 14 674 ادام، «Aitu» ءموبيلدى قوسىمشاسى ارقىلى 8 405 ادام تىركەلگەن. ونىڭ ىشىندە وبلىس ورتالىعىنان 56 256 ادام قاتىسسا، ودان كەيىنگى ورىندا مۇعالجار اۋدانى تۇر. بۇل اۋداننان 16 933 تۇرعىن ساناققا قاتىسقان. ال جەرگىلىكتى حالىق سانىنا شاققانداعى ساناقتان وتكەندەردىڭ ۇلەسى بويىنشا ىرعىز اۋدانى الدا تۇر. مۇندا ازاماتتاردىڭ 41 پايىزى ساۋالدارعا جاۋاپ بەرگەن.
سونىمەن قازىرگى تاڭدا تۇرعىندار ونلاين ساناققا تاۋلىك بويى جۇمىس ىستەيتىن sanaq.gov.kz سايتى، Egov.kz پورتالى نەمەسە «Aitu» ءموبيلدى قوسىمشاسى ارقىلى قاتىسۋىنا مۇمكىندىگى بار. بيىلعى جىلدىڭ 15 قازانىنا دەيىنگى ۋاقىتتا كەز كەلگەن قازاقستاندىق ساناققا ونلاين رەجيمدە قاتىسا الادى. ال ءداستۇرلى ارالاۋ، ياعني قىزمەتكەرلەردىڭ ۇيلەرگە بارۋى 1-30 قازان ارالىعىندا ۇيىمداستىرىلادى.
دەپارتامەنت ماماندارىنىڭ ايتۋىنشا، بيىلعى ۇلتتىق حالىق ساناعىنىڭ جاڭاشىلدىعى — زاماناۋي تسيفرلىق تەحنولوگيالاردى ەنگىزۋ جانە پروتسەستى اۆتوماتتاندىرۋ. ياعني حالىق تۋرالى دەرەكتەردى جيناۋ پروتسەسى ەكى ادىسپەن جۇزەگە اسىرىلادى. ءبىرىنشى ءادىس sanaq.gov.kz مامانداندىرىلعان سايتتا ينتەرنەت-ساۋال قويۋ ارقىلى ساناق جۇرگىزۋ ءادىسى. ياعني، 1 قىركۇيەك-15 قازان ارالىعىندا تۇرعىندار وسى سايتقا كىرىپ، ءوزى تۋرالى مالىمەتتەردى قالدىرىپ، حالىق ساناعىنا ۇلەس قوسا الادى. ەگەر وسى ارالىقتا ۇيلەرىڭىزگە ادامدار كەلىپ، «ءبىز حالىق ساناعى ءۇشىن كەلدىك» دەسە، وعان سەنۋگە بولمايدى. الاياقتار بولۋى مۇمكىن. قازىر ساناق تەك قانا ونلاين فورماتتا عانا جۇرگىزىلىپ جاتىر.
ارنايى سايتقا كىرۋ ءۇشىن ەشقانداي ەلەكتروندى تسيفرلىق قولتاڭبا قاجەت ەمەس، تەك جەكە سايكەستەندىرۋ ءنومىرىڭىزدى بىلسەڭىز بولدى. سايت ءۇش تىلدە — قازاق، ورىس، اعىلشىن تىلدەرىندە جاسالعان. جۇيەگە تەلەفون ءنومىرىڭىز نەمەسە ەلەكتروندى پوشتا ارقىلى كىرۋگە بولادى. سايتتا 2021 جىلعى حالىق ساناعى تۋرالى ماڭىزدى اقپاراتتاردى، سوڭعى جاڭالىقتاردى بىلۋگە بولادى، سونىمەن بىرگە ساناقتان وتۋگە قاتىسۋ ءۇشىن بەينەنۇسقاۋلىقتار دا بەرىلگەن. سايت ۆيرتۋالدى كومەكشىنىڭ كومەگىمەن رەسپوندەنتتەردىڭ ورنالاسقان جەرىنە قاراماستان، وزدىگىنەن ساناقتان وتۋگە جانە وزىمەن وتباسى مۇشەلەرىنە ساناق پاراقتارىن تولتىرۋعا مۇمكىندىك بەرەدى. پورتال 1 قىركۇيەك-15 قازان ارالىعىندا تاۋلىگىنە 24 ساعات بويى قولجەتىمدى بولادى. سايتقا كىرىپ، 91 سۇراققا جاۋاپ بەرۋى كەرەك. دەگەنمەن ازاماتتار بۇل ساۋالداردىڭ بارلىعىنا جاۋاپ بەرەدى دەگەندى بىلدىرمەيدى. سەبەبى ساناق پاراقتارىندا شەتەلگە كەتكەن نەمەسە ەلگە كەلگەن ادامدارعا، تەك ايەلدەرگە، ەرلەرگە، بالالارعا عانا قويىلاتىن سۇراقتار بار. سونداي-اق ءۇيدىڭ جاعدايىنا قاتىستى ساۋالدارعا تەك ءۇيدىڭ يەسى عانا جاۋاپ بەرەدى. ءار ازامات ءوز وتباسى مۇشەلەرىنە جاۋاپ بەرە الادى. قولىندا تەك جەكە سايكەستەندىرۋ ءنومىرى بولۋى كەرەك.
بيىلعى ساناقتا 2009 جىلعى حالىق ساناعىنا قاراعاندا تىلدەردى مەڭگەرۋ، نەكە جاعدايى، بالا تۋ جانە جۇمىسپەن قامتۋ سۇراقتارى كەڭەيتىلگەن. نەگىزىنەن تۇرعىن ءۇي جاعدايلارى، ەتنومادەني سيپاتتامالار، ءبىلىم جانە ساۋاتتىلىق، كوشى-قون، نەكە جاعدايى، بالا تۋ، جۇمىسپەن قامتىلۋ، كۇنكورىس كوزدەرىنە قاتىستى سۇراقتار قويىلعان.
سونداي-اق بيىلعى جىلدىڭ ەرەكشەلىگى — پاندەمياعا قاتىستى سۇراقتار ەنگىزىلگەن. پاندەميانىڭ جۇمىسىنا اسەرى، ۆاكتسينا الۋ سەكىلدى سۇراقتار دا بار.
ايتا كەتۋ كەرەك، ازاماتتار «ەلەكتروندىق ۇكىمەتتىڭ» پورتالى ارقىلى دا ساناققا قاتىسۋىنا بولادى.
داناگۇل بايمۇقاش،
«ادىرنا» ۇلتتىق پورتالى.
