ەلوردادا اتىراۋلىق اۋىلشارۋاشىلىعى ءونىم وندىرۋشىلەرىنىڭ جارمەڭكەسى ءوتىپ جاتىر

نۇر-سۇلتان قالاسىندا  اتىراۋ وبلىسىنىڭ اۋىلشارۋاشىلىق ونىمدەرىنىڭ جارمەڭكەسى ءوتىپ جاتىر. اتىراۋ وبلىسىنىڭ تاۋار وندىرۋشىلەرى مەن شارۋا قوجالىقتارىنىڭ قاتىناسۋىمەن استانالىقتارعا 20 توننادان استام ەت، 36 توننا بالىق جانە بالىق ونىمدەرى، 3 توننا ءسۇت ءونىمى، 1 توننا شۇجىق ءونىمى، 90 توننا كوكونىس ءونىمى، سونداي-اق 60 000 دانا جۇمىرتقا، 0,5 توننا نان ءونىمى، 0,5 توننا ەت كونسەرۆى، 1 توننا ماكارون ءونىمى، 0,5 توننا ۇن، جالپى كولەمى 152 توننا ءونىم اكەلىندى. ونىمدەر نۇر-سۇلتان قالاسى اكىمدىگىنىڭ ۇسىنعان باعا مولشەرىنە سايكەس ساتىلۋدا. قازاقستان رەسپۋبليكاسىنىڭ تاۋەلسىزدىگىنىڭ 30-جىلدىعىنا وراي وتكىزىلىپ جاتقان وسىناۋ جارمەڭكەگە كەلۋشى باس قالانىڭ تۇرعىندارى ءوز ريزاشىلىقتارىن بىلدىرۋدە. اتىراۋ وبلىسى دەلەگاتسياسىن وبلىس اكىمىنىڭ ورىنباسارى كايرات نۇرلىباەۆ باستاپ كەلدى.