بۇلدىرشىندەرگە - تەگىن شەبەرلىك ساباعى

ەل تاۋەلسىزدىگىنىڭ 30 جىلدىعى مەن «شىمكەنت-تسيرك» مەكەمەسىنىڭ 10 جىلدىعىنا وراي تسيرك ارتىستەرى بۇلدىرشىندەرگە تەگىن شەبەرلىك ساعاتتارىن وتكىزۋدە. قاتىسۋشىلار شەبەرلىك ساعاتىندا سالتو، اكروباتيكا، دجيگيتوۆكا، فوكۋس، زاماناۋي ءبيدىڭ ءادىس-قيمىلدارىن ۇيرەنە الادى. وندا ارتىستەر ءار بۇلدىرشىنمەن جەكە-جەكە جۇمىس ىستەپ، ءبىر ساعات بويىنا شەبەرلىگىمەن بولىسەدى. سارسەنبىدە تسيرك ءارتىسى ازيزبەك يريستاەۆ «5 مينۋتتا سالتو» ساباعىن ءوتتى. جاسوسپىرىمدەر سالتو تاستاۋدىڭ قىر-سىرىن مەڭگەرىپ، جەڭىل جاتتىعۋ جاساۋدىڭ ءادىس-تاسىلدەرىن ۇيرەندى. سونداي-اق، بەيسەنبىدە قۇرمانعازى ىزتىلەۋوۆ سيقىر الەمىنىڭ سىرىمەن بولىسسە، بۇگىن ۇلىقبەك مەدەشوۆ اكروباتيكادان ءدارىس بەرمەك. وسى سىندى شەبەرلىك ساعاتتارى ارنايى كەستەگە ساي، ءجيى ءوتىپ تۇرادى. شەبەرلىك ساعاتىنىڭ جانرى مەن مەرزىمىن شىمكەنت-تسيركتىڭ الەۋمەتتىك جەلىدەگى پاراقشالارىنان بىلۋگە بولادى. ودان وزگە، تسيرك ىشىندە «Circus Star» ۇيىرمەسى جۇمىس ىستەيدى. ۇيىرمەگە تسيرك ونەرىن كەڭىنەن مەڭگەرىپ، مانەجدە ونەر كورسەتكىسى كەلەتىن 7-15 جاس ارالىعىنداعى بالالار قاتىسا الادى. ايتا كەتەيىك، ونەر ۇجىمى 12-24 قازان ارالىعىندا «ON تسيرك» جاڭا باعدارلاماسىن ۇسىنادى. بۇل جولى قىرعىزستان رەسپۋبليكاسى مەن نۇر-سۇلتان قالاسى تسيركىنىڭ ونەرپازدارى تاڭداۋلى قويىلىمدارىن تارتۋ ەتپەك.