تاۋەلسىزدىكتىڭ 30 جىلدىعىنا وراي ءال-فارابي اۋدانى اكىمى راشيد مىڭباەۆ بەلسەندى جاستارمەن كەزدەستى.
جاستار ورتالىعىندا وتكەن باسقوسۋدا نۇر-سۇلتان قالاسى وتباسى دەموگرافياسى جانە ايەلدەر ءىسى جونىندەگى كوميسسيا مۇشەسى، كاسىبي پسيحولوگ ليمانا قويشيەۆا، قالاداعى جۇمىسپەن قامتۋ ورتالىعى ديرەكتورىنىڭ ورىنباسارى بەكزات تولىباەۆ، داڭقتى سپورتشى نۇربولات قۋاندىقوۆ جانە اۋداننىڭ وزگە بەلسەندى جاستار قاتىستى.
اۋدان اكىمى مەملەكەتىمىزدە جاستارعا ارنالعان باعدارلامالار مەن تىڭ جوبالار جايلى ءسوز قوزعادى.
–ەلىمىزدىڭ بولاشاعى وزدەرىڭىزسىزدەر. قازاقستاننىڭ بولاشاققا بارار جولى سىزدەردىڭ دامۋ دەڭگەيلەرىڭىزگە، ۇمتىلىستارىڭىزعا جانە قوعامدىق ومىرگە ارالاسۋ دارەجەسىنە تىكەلەي بايلانىستى. ءال-فارابي اۋدانىندا حالىق سانى شامامەن 207 مىڭ ادامدى قۇراسا، ونىڭ 43 459-ى جاستار (19,7%). بۇگىندە اۋدانىمىزدا جاستارمەن بىرلەسە «تازا قالا»، «BIZBIRGEMIZ: TAZAALEM» اكتسيالارىن وتكىزدىك. الدا تالاي جوبالاردى بىرگە قولعا الامىز. جاقسى يدەيالارىڭىز، تىڭ جوبالارىڭىز بولسا مەنىڭ ەسىگىم سىزدەر ءۇشىن ءاردايىم اشىق. كەز-كەلگەن ۋاقىتتا كەزدەسىپ، جاڭا باستامالاردى قولداۋعا دايىنمىن،-دەدى راشيد مامىتۇلى.
جيىن بارىسىندا جاسوسپىرىمدەر اراسىندا ەرتە جۇكتىلىك پەن سۋيتسيت، جۇمىسپەن قامتۋ جانە جاستاردىڭ سپورت دەڭگەيىن دامىتۋ جايىندا تالقىلاندى. جاستار وزدەرى قىزىقتىرعان سۇراقتارىن قويىپ، تۇششىمدى جاۋاپ الدى.
