"وندا تۇرعان ەشتەڭە جوق": سەمەي اكىمدىگى مۇعالىمدەردىڭ كوشە سىپىرۋىنا قاتىستى مالىمدەمە جاسادى

6460
Adyrna.kz Telegram

سەمەي اكىمدىگىندە پەداگوگتاردىڭ قالالىق سەنبىلىككە قاتىسۋى تۋرالى تۇسىنىكتەمە بەرىلدى. سەمەي قالاسى اكىمىنىڭ ورىنباسارى مەن ءبىلىم ءبولىمىنىڭ باسشىسى جۋرناليستەرگە بۇل ماسەلەدەن قورقاتىن تۇگى دە جوق ەكەنىن ايتتى، دەپ حابارلايدى "ادىرنا" ۇلتتىق پورتالى.

ەستەرىڭىزگە سالا كەتەيىك، Arnapress.kz پورتالى سەمەيدە كوشە سىپىرىپ جۇرگەن مۇعالىمدەر تۋرالى حابارلاعان بولاتىن. پورتالدىڭ رەداكتسياسىنىڭ قاراۋىندا قالا اكىمىنىڭ ورىنباسارى دميتري گاريكوۆ قول قويعان سەنبىلىك كۇنىن ۇيىمداستىرۋ تۋرالى حات بولدى. وندا اكىمدىكتىڭ ءبولىم باسشىلارىنا مەنشىك نىسانىنا قاراماستان بارلىق مەكەمەلەر مەن كاسىپورىنداردىڭ سەنبىلىككە شىعۋىن ۇيىمداستىرۋ تاپسىرىلدى. داۋ-دامايدان كەيىن اكىم ورىنباسارى قول قويعان قۇجاتقا جانە مۇعالىمدەردىڭ ەرىكتى سەنبىلىككە قاتىسۋىنا قاتىستى تۇسىنىكتەمە بەردى.

اكىمدىكتىڭ سوزىنە سەنسەك، ءار مۇعالىم سەنبىلىككە ء"وز ەركىمەن" شىعىپتى. قالا پاركتەرىن، باقانداي 15 كوشە مەن ۇيلەردىڭ اۋلالارىن سىپىرۋعا ءبىر مەزەتتە مىڭداعان ادام "قۇلشىنا" شىعىپتى. اسىرەسە، مۇعالىمدەر.

اكىمنىڭ ورىنباسارى دميتري گاريكوۆتىڭ ايتۋىنشا، مۇعالىمدەرگە "كوشە سىپىر" دەپ ەشكىم نۇسقاۋ بەرمەگەن. ءبارى ء"وز ەرىكتەرىمەن", "ۇجىم بولىپ", "سانالى تۇردە" شىققان.

- ەگەر ءبىز مۇعالىمدەردى سەنبىلىككە ءبىر رەت قانا تارتساق، وندا اكىمدىك قىزمەتكەرلەرى اپتا سايىن دەرلىك شىعادى. مەن بۇل جەردە ەشقانداي پروبلەمانى كورمەيمىن. بۇل ءبىزدىڭ قالا، ءبىز وعان قولداۋ كورسەتەمىز. سەمەيدىڭ كەز كەلگەن پاتريوتى سەنبىلىككە قۋانا — قۋانا شىعادى دەپ ويلايمىن. بۇل سەنبىلىكتەر بىزدە بۇرىن دا وتكىزىلدى، وتكىزىلەدى، الدا دا وتكىزىلەتىن بولادى، وسىنى تاعى دا اتاپ وتكىم كەلەدى، — دەدى ديميتري گاريكوۆ.

سەمەي قالاسىنىڭ ءبىلىم ءبولىمىنىڭ باسشىسى ناتاليا فەسەنكو بولسا، سەنبىلىككە قاتىسۋ مۇعالىمدەرگە ءتان فۋنكتسيا ەمەس ەكەندىگىمەن كەلىستى. سونىمەن قاتار، ول سەنبىلىككە قاتىسۋ تۋرالى سوڭعى شەشىمدى مەكتەپ ديرەكتورلارى قابىلداعانىن جانە پەداگوگتاردى ەشكىم سىپىرعىش پەن تىرما الۋعا ماجبۇرلەمەگەنىن اتاپ ءوتتى.

- كەيبىر باق-تار سەنبىلىك تۋرالى بۇرمالانعان اقپارات تاراتتى. ءسويتىپ، كوپ ادامدى اداستىردى. سەنبىلىك كەزىندە ساباق بولماي قالعان جوق. جوسپارداعى تارتىپپەن وقۋ ۇدەرىسى ءجۇردى. سەنبىلىك تۋرالى حاباردى ديرەكتورلار جاريالادى. ال ەگەر مۇعالىمدەر سەنبىلىككە شىققىسى كەلسە، وندا تۇرعان ەشتەڭە جوق. ارينە، ەشكىمنىڭ ماجبۇرلەۋگە قۇقىعى جوق، - دەدى ناتاليا فەسەنكو.

ايتەۋىر، سوزدەرىنىڭ ۇققانىمىز، مۇنىمىز دۇرىس بولمادى دەگەن شەنەۋنىكتەر جوق. بۇعان قاراعاندا مۇعالىمدەر اۋلا سىپىرۋشىلارعا ءالى دە تالاي باسەكەلەس بولا بەرمەك.

ودان بولەك سەمەي ۇستازدارىنا قاتىستى قر ءبىلىم جانە عىلىم ءمينيسترى اسحات ايماعامبەتوۆ الەۋمەتتىك جەلىدە ءوز نارازىلىعىن بىلدىرگەن بولاتىن. مينيستر مۇعالىمدەردى ەرەكشە فۋنكتسيالارعا تارتۋعا 2019 جىلدىڭ جەلتوقسانىندا قابىلدانعان زاڭمەن تىيىم سالىنعانىن ەسكە سالدى. سودان بەرى مۇنداي زاڭ بۇزۋشىلىقتار ءۇشىن 200-گە جۋىق باسشى جۇمىستان بوساتىلعانعا دەيىن جازالاندى.

- مۇعالىمدى مىندەتىنە كىرمەيتىن جۇمىستارعا تارتۋعا زاڭ تىيىم سالادى. بۇل زاڭ 2019 جىلى جەلتوقسان ايىندا قابىلدانعان ەدى. مۇعالىمدەر تەك قانا تىكەلەي قىزمەتىمەن اينالۋى كەرەك ەكەنىن تۇسىنەتىندەي ۋاقىت ءوتتى. مۇنداي زاڭ بۇزۋشىلىق ءۇشىن ەكى جۇزگە تارتا باسشىلار جاۋاپقا تارتىلعان. ءبىرازى تارتىپتىك جانە اكىمشىلىك جازاعا تارتىلسا، ءبىرازى جۇمىسىنان قۋىلدى", — دەپ اشۋ شاقىرعان بولاتىن ايماعامبەتوۆ.

مينيستر مەملەكەتتىك قىزمەت ىستەرى جونىندەگى اگەنتتىككە قاجەتتى شارا قولدانۋ ءۇشىن شاعىمداناتىنىن، قالانىڭ ءبىلىم بەرۋ بولىمدەرى باسشىلارىنىڭ دا جاۋاپقا تارتىلاتىنىن ەسكەرتكەن.

ەسكە سالا كەتەيىك، بۇعان دەيىن اسحات ايماعامبەتوۆ مەكتەپ ديرەكتورلارىن اۋىستىرۋعا دا قۇزىرى جوق ەكەنىن، ءبىلىم باسقارمالارى مەن مەكتەپتەر تىكەلەي جەرگىلىكتى اكىمدىكتەرگە قارايتىنىن ايتقان. ءبىلىم سالاسىنداعى جەمقورلىق، تامىر-تانىستىق جانە باسقا دا كەلەڭسىز جايتتاردىڭ قىلاڭ بەرۋى وسىدان شىعىپ وتىرعانىن دا جەتكىزگەن.

"ادىرنا" ۇلتتىق پورتالى

پىكىرلەر