ەل تاۋەلسىزدىگىنىڭ 30 جىلدىعى قارساڭىندا شىمكەنتتە قۇتقارۋشىلار كۇنىنە ارنالعان سالتاناتتى جيىن ءوتتى. بيىل ەلىمىزدە ازاماتتىق قورعانىس قىزمەتىنىڭ قۇرىلعانىنا 26 جىل تولىپ وتىر. مەرەكەلىك ءىس-شارادا ازاماتتىق قورعانىس سالاسىنىڭ قىزمەتكەرلەرىنە قۇرمەت كورسەتىلدى.
مەرەكەلىك جيىنعا قالا ءماسليحاتىنىڭ حاتشىسى باحادىر نارىمبەتوۆ، قالا اكىمىنىڭ ورىنباسارى ماۋلەن ايمانبەتوۆ، ازاماتتىق قورعانىس ورگاندارىنىڭ ارداگەرلەرى، قالالىق توتەنشە جاعدايلار دەپارتامەنتىنىڭ باسشىلىعى مەن جەكە قۇرامى قاتىستى.
سالتاناتتى ءىس-شارا ءورت سوندىرۋشىلەر مەن قۇتقارۋشىلاردىڭ ەڭبەگىن باياندايتىن ساحنالىق قويىلىمدى تاماشالاۋدان باستالدى. كاسىبي ادالدىق پەن ەرەن ەرلىكتىڭ ۇلگىسىنە نەگىزدەلگەن تەاترالدىق قويىلىم كورەرمەندەردى ىستىق ىقىلاسقا بولەدى.
قۇتقارۋشى - قايراتتىلىق پەن توزىمدىلىكتى جانە جوعارى دايىندىقتى تالاپ ەتەتىن مارتەبەلى ماماندىق. بەيبىت تۇرعىنداردى ءتۇرلى تابيعي جانە تەحنوگەندىك اپاتتاردان ساقتاپ قالۋ - وسى ماماندىق يەلەرىنە جۇكتەلگەن كاسىبي پارىز. ءورت سوندىرۋشىلەر مەن قۇتقارۋشىلاردى حالقىمىز بەيبىت كۇننىڭ باتىرلارىنا تەڭەيتىنى سوندىقتان.
جيىن بارىسىندا قىزمەتتىك بورىشىن ادال اتقارىپ جۇرگەن ازاماتتىق قورعانىس سالاسىنىڭ 30 قىزمەتكەرى «توتەنشە جاعدايلاردىڭ الدىن الۋدا جانە جويۋدا ۇزدىك شىققانى ءۇشىن» مەدالىمەن، «ازاماتتىق قورعاۋ جۇيەسىن دامىتۋعا قوسقان ۇلەسى ءۇشىن» توسبەلگىسىمەن، شىمكەنت قالاسى اكىمىنىڭ جانە ءماسليحاتىنىڭ «العىس حاتتارىمەن»، باسقا دا سالالىق ناگرادالارمەن ماراپاتتالدى.
مەرەكەلىك جيىنعا قاتىسۋشىلار ەلىمىزدە العاش رەت كورسەتىلىمى ۇيىمداستىرىلىپ وتىرعان «بەبەۋ» اننيماتسيالىق ءفيلمىن تاماشالادى. انيماتسيالىق ءفيلمنىڭ اۆتورى قاراتاۋ اۋدانى توتەنشە جاعدايلار باسقارماسىنىڭ باستىعى، ازاماتتىق قورعانىس مايورى ەركەبۋلان تاسقاراەۆ. شىمكەنتتىك "ساق" كينوستۋدياسىنىڭ بۇل ءونىمى الداعى ۋاقىتتا رەسپۋبليكالىق «بالاپان» تەلەارناسىنان كورسەتىلمەك. فيلمدە ءورت ءسوندىرۋشىنىڭ جۇمىس كۇنى باياندالادى. تۋىندى جاس وسكىنگە ادامداردى قۇتقارۋ مىندەتى - ابىرويلى ءىس ەكەنىن كورسەتىپ، ءورت قاۋىپسىزدىگىن ساقتاۋ - ماڭىزدى ماسەلە ەكەنىن ۇيرەتەدى.
