El Táýelsizdiginiń 30 jyldyǵy qarsańynda Shymkentte Qutqarýshylar kúnine arnalǵan saltanatty jıyn ótti. Bıyl elimizde azamattyq qorǵanys qyzmetiniń qurylǵanyna 26 jyl tolyp otyr. Merekelik is-sharada azamattyq qorǵanys salasynyń qyzmetkerlerine qurmet kórsetildi.
Merekelik jıynǵa qala máslıhatynyń hatshysy Bahadyr Narymbetov, qala ákiminiń orynbasary Máýlen Aımanbetov, azamattyq qorǵanys organdarynyń ardagerleri, qalalyq tótenshe jaǵdaılar departamentiniń basshylyǵy men jeke quramy qatysty.
Saltanatty is-shara órt sóndirýshiler men qutqarýshylardyń eńbegin baıandaıtyn sahnalyq qoıylymdy tamashalaýdan bastaldy. Kásibı adaldyq pen eren erliktiń úlgisine negizdelgen teatraldyq qoıylym kórermenderdi ystyq yqylasqa bóledi.
Qutqarýshy - qaırattylyq pen tózimdilikti jáne joǵary daıyndyqty talap etetin mártebeli mamandyq. Beıbit turǵyndardy túrli tabıǵı jáne tehnogendik apattardan saqtap qalý - osy mamandyq ıelerine júktelgen kásibı paryz. Órt sóndirýshiler men qutqarýshylardy halqymyz beıbit kúnniń batyrlaryna teńeıtini sondyqtan.
Jıyn barysynda qyzmettik boryshyn adal atqaryp júrgen azamattyq qorǵanys salasynyń 30 qyzmetkeri «Tótenshe jaǵdaılardyń aldyn alýda jáne joıýda úzdik shyqqany úshin» medalimen, «Azamattyq qorǵaý júıesin damytýǵa qosqan úlesi úshin» tósbelgisimen, Shymkent qalasy ákiminiń jáne máslıhatynyń «Alǵys hattarymen», basqa da salalyq nagradalarmen marapattaldy.
Merekelik jıynǵa qatysýshylar elimizde alǵash ret kórsetilimi uıymdastyrylyp otyrǵan «Bebeý» annımaııalyq fılmin tamashalady. Anımaııalyq fılmniń avtory Qarataý aýdany Tótenshe jaǵdaılar basqarmasynyń bastyǵy, azamattyq qorǵanys maıory Erkebýlan Tasqaraev. Shymkenttik "Saq" kınostýdııasynyń bul ónimi aldaǵy ýaqytta respýblıkalyq «Balapan» telearnasynan kórsetilmek. Fılmde órt sóndirýshiniń jumys kúni baıandalady. Týyndy jas óskinge adamdardy qutqarý mindeti - abyroıly is ekenin kórsetip, órt qaýipsizdigin saqtaý - mańyzdy másele ekenin úıretedi.
