اقتوبە وبلىسىنا 28 قازاندا، جۇمىس ساپارىمەن قر ءبىلىم جانە عىلىم ءمينيسترى اسحات ايماعامبەتوۆ كەلدى.
جۇمىس ساپارى كەزىندە مينيستر وڭىردەگى «اۋىل – ەل بەسىگى» ارنايى جوباسىنىڭ جۇزەگە اسىرىلۋىمەن تانىسادى.
مينيستر مەن وبلىس اكىمى وڭداسىن ءورازاليننىڭ جۇمىس ساپارى 2020 جىلى اشىلعان Aqbobek حالىقارالىق جەكە مەكتەبىنەن باستالدى. قازىرگى تاڭدا مۇندا 500-دەي بالا ءبىلىپ الىپ، الپىسقا جۋىق مۇعالىم ەڭبەك ەتەدى، ولاردىڭ قاتارىندا "بولاشاق" باعدارلاماسىنىڭ تۇلەكتەرى دە بار.
ۇستازدار قاۋىمىمەن تىلدەسكەن اسحات ايماعامبەتوۆ مەكتەپتىڭ كىتاپحانا قورىن الەم ادەبيەتىنىڭ قازاق تىلىندەگى تۋىندىلارىمەن تولىقتىرۋدى، مۇعالىمدەردىڭ بىلىكتىلىگىن ۇنەمى كوتەرىپ تۇرۋعا كوڭىل ءبولۋدى ۇسىندى.
قىزمەتتىك ساپار № 51 مەكتەپتە جالعاسىپ، مينيستر وقۋ پروتسەسىمەن تانىستى، قالانىڭ مۇعالىمدەرىمەن كەزدەسىپ، ولارمەن وزەكتى سۇراقتاردى تالقىلادى.
كەزدەسۋ بارىسىندا ءبىلىم سالاسىنداعى جەتىستىكتەر مەن يننوۆاتسيالارعا، مۇعالىمدەردىڭ تۇلعالىق بىلىكتىلىگىن كوتەرۋگە، مەكتەپتەردەگى قاۋىپسىزدىكتى قامتاماسىز ەتۋگە جانە ت.ب. قاتىستى تاقىرىپتار قوزعالدى.
بۇدان وزگە، ارنايى ورتا ءبىلىمدى دامىتۋ تۋرالى اڭگىمە قوزعالدى.
"بيىل "جاس مامان" جوباسى اياسىندا وڭىردەگى جەتى كوللەدج مودەرنيزاتسيالانىپ جاتىر. سونداي-اق، كەلەر جىلدان-اق كوللەدجدەردە نەعۇرلىم سۇرانىسقا يە ماماندىقتار بويىنشا جاڭا ماماندىقتاردى اشىپ، "قاجەت ەمەس" ماماندىقتاردى جابۋ ءۇشىن ەڭبەك نارىعى جاقسىلاپ ساراپتالۋدا. قازىر مىناداي جاعداي: ءىرى ءوندىرىس كاسىپورىنداردا ەڭبەكاقىسى مەن الەۋمەتتىك پاكەتى جاقسى 500-گە جۋىق بوس جۇمىس ورنى بار. جۇمىسقا ورنالاسقىسى كەلەتىندەر بار، بىراق ءتيىستى ءبىلىمى مەن بىلىكتىلىگى جوق. وسىنىڭ ورنىن تولتىرۋىمىز كەرەك",- دەدى وبلىس اكىمى وڭداسىن ورازالين.
مينيستر اقتوبە وبلىسى ءبىلىم سالاسىن قارجىلاندىرۋدا، مەملەكەتتىك-جەكە سەرىكتەستىك قاعيداسىنداعى مەكتەپتەر سالۋدا، ۇستازدار مەن وقۋشىلاردى قولداۋدا جانە ت.ب. كوشباسىنداعى وڭىرلەردىڭ قاتارىندا ەكەنىن اتاپ ءوتتى.
«ادىرنا» ۇلتتىق پورتالى
