بۇگىن «جاسىل» ەكونوميكانى قولداۋ جانە G-Global-دى دامىتۋ كواليتسياسى بۇقارالىق اقپارات قۇرالدارى اراسىندا «جاسىل ءباسپاسوز» رەسپۋبليكالىق بايقاۋىن جاريالادى. دەرەككوز: baq.kz
كونكۋرسقا جۋرناليست قاۋىمنىڭ «جاسىل تەحنولوگيالار» تاقىرىبىنداعى جۇمىستارى قابىلدانادى.
كواليتسيا ءباسپاسوز حاتشىسى مەرۋەرت ابداليەۆانىڭ مالىمەتىنشە، بايقاۋ 4 نوميناتسيا بويىنشا وتەدى: «ۇزدىك تەلە-راديوسيۋجەت»; «ۇزدىك تۆ جانە راديوباعدارلاما»; «گازەتتە جاريالانعان ۇزدىك ماقالا»; «ينتەرنەت رەسۋرستاردا جاريالانعان ۇزدىك ماتەريال».
«كونكۋرسقا 2017 جىلعى ءساۋىر – 2018 جىلعى ماۋسىم ارالىعىندا جاريالانعان جۇمىستار قابىلدانادى. بايقاۋعا قازاق جانە ءورىستىلدى جۋرناليستەر قاتىسا الادى. ماتەريالداردى «جاسىل» ەكونوميكانى قولداۋ جانە G-Global-دى دامىتۋ كواليتسياسىنىڭ» ءباسپاسوز قىزمەتىنە جىبەرۋگە بولادى. جۇلدە قورى ءالى انىقتالۋ ۇستىندە، جۇلدە بەكىتىلگەننەن كەيىن قوسىمشا حابارلايمىز»، – دەدى مەرۋەرت ابداليەۆا باق وكىلدەرىنە ارنالعان «جاسىل ءدامحانا» شاراسىندا.
«جاسىل» ەكونوميكانى قولداۋ جانە G-Global-دى دامىتۋ كواليتسياسى» زتب باسقارما ءتورايىمى سالتانات راقىمبەكوۆا بيىلعى كونكۋرستىڭ قورىتىندىسى استانا كۇنىنە قاراي شىعارىلاتىنىن ايتتى.
«بيىل ءبىز استانانىڭ 20 جىلدىعىنا وراي «جاسىل» ونكۇندىك وتكىزەمىز. 28 ماۋسىم – 6 شىلدە ارالىعىنداعى ونكۇندىك اياسىندا 20-دان استام شارا ۇيىمداستىرامىز. وسى كۇندەرى «جاسىل» ەكونوميكا كوشباسشىلارىنىڭ ءىى فورۋمى وتەدى. اتالعان فورۋمدا «جاسىل ءباسپاسوز» بايقاۋىنىڭ قورىتىندىسىن شىعارىپ، جەڭىمپازداردى ماراپاتتايمىز»، – دەدى سالتانات راقىمبەكوۆا.
كونكۋرس جايلى تولىعىراق www.greenkaz.org سايتىنان بىلۋگە بولادى.
baribar.kz
