شىمكەنتتە زاڭسىز قارۋ الىپ ءجۇرۋدىڭ 19 جايتى انىقتالدى

اعىمداعى جىلدىڭ 21-شىلدە مەن 20-تامىز ارالىعىندا شىمكەنت قالاسىندا «قارۋ» جەدەل-پروفيلاكتيكالىق ءىس-شاراسى وتكىزىلۋدە.

ءىس-شارانىڭ باستى ماقساتى – ازاماتتىق قارۋ اينالىمى سالاسىنا ءتيىمدى مەملەكەتتىك باقىلاۋدى جۇزەگە اسىرۋ. بۇل بويىنشا قارۋ يەلەرى، سونداي-اق اڭشى دۇكەندەرى، كۇزەت اگەنتتىكتەرىنە تەكسەرۋ جۇرگىزىلىپ جاتىر. ناتيجەسىندە، بۇگىنگى كۇنگە دەيىن 3323 قارۋ يەلەرىن تەكسەردى. 44 قۇقىقبۇزۋشىلىق انىقتالدى. 5 قارۋ جانە 2 وق ءدارى تاركىلەنىپ الىندى. انىقتالعان كەمشىلىكتەر بويىنشا ءتيىستى اكىمشىلىك جاۋاپكەرشىلىككە تارتىلادى. ءىس-شارا بارىسىندا وتتى اتىس قارۋىن، وق-ءدارى جانە سۋىق قارۋدى زاڭسىز الىپ ءجۇرۋدىڭ 19 جايتى انىقتالدى. ايتا كەتەتىن اقپارات، «قارۋ» جەدەل-پروفيلاكتيكالىق ءىس-شاراسى 2021 جىلدىڭ 20-تامىزىنا دەيىن جالعاساتىن بولادى.