بۇگىندە جارىقسىز ءبىر كۇنىڭدى وتكىزۋ مۇمكىن ەمەس. سەبەبى ۇيدە دە، جۇمىستا دا بارلىق قىزمەت ەلەكتر قۋاتىنىڭ كۇشىمەن ىسكە اسادى. ال ونىڭ قانشالىقتى قاۋىپتى ەكەندىگىنە قاراماستان، كۇن سايىن جەكە باسى مەن دەنساۋلىعىن قاتەرگە تىگەتىن باقتيار بەرديەۆتىڭ ەڭبەگىنە تۇرعىندار ءدان ريزا.
— مەن وتباسىندا كوپ بالانىڭ ءبىرى بولىپ ءوستىم. اتا-انام قاراپايىم ەڭبەك ادامدارى بولدى. سول سەبەپتى ەڭبەككە ەرتە ارالاستىم. مەكتەپتى بىتىرگەننەن كەيىن بىرنەشە جىل اكەمنىڭ قاسىندا ءجۇرىپ، جۇمىس جاسادىم. كەيىن نوكىس قالاسىنداعى پوليتەحنيكالىق ۋچيليششەگە ءتۇسىپ ەلەكتريك ماماندىعىن ءتامامدادىم. ونى اياقتاعان سوڭ سول قالاداعى موتور شىعاراتىن زاۋىتتا ءتورت جىل ەلەكترومونتەر بولىپ جۇمىس ىستەدىم. ارادا بىرنەشە جىل وتكەن سوڭ اقتوبە قالاسىنا كوشىپ كەلدىم. قازىر قالا ىرگەسىندەگى پريدوروجنىي باۋ-باقشا ۇجىمىنداعى ەلەكتر جۇيەلەرىن قارايمىن. بۇرىن اۋدانىمىزداعى ەلەكتر قۋاتىنىڭ كۇشى از، ءالسىز بولدى. سول سەبەپتى كەيدە جارىق ءسونىپ قالاتىن. الايدا تۇرعىنداردىڭ بىرىگىپ قولداۋ كورسەتۋىمەن ەسكى ترانسفورماتورلاردى جاڭالاپ، ەلەكتر جەلىلەرىن جوندەدىك. قازىر وسى ۇجىمدا ەلەكتريكپىن. ەلەكتر جەلىلەرىن قاداعالايمىن، تۇرعىن ۇيلەردىڭ ۇنەمى جارىقپەن قامتىلۋىن باقىلايمىن، — دەيدى باقتيار داۋلەتبايۇلى.
ءوز ىسىنە اسا جاۋاپكەرشىلىكپەن قارايتىن باقتيار بەرديەۆ ون جىلدان بەرى «ەنەرگوسيستەما» جشس-ىندا جارىقتاندىرۋ سالاسى بويىنشا ەلەكتريك بولىپ جۇمىس ىستەيدى. ءوزى تۇراتىن اۋداننىڭ جارىقپەن قامتاماسىز ەتىلۋىن قاداعالايتىن ونىڭ قاراماعىندا 80-گە جۋىق ابونەنت بار.
— ەلەكتريك ماماندىعىنىڭ سالا-بولىمدەرى ءار ءتۇرلى. مەن جارىقتى جەكە ۇيلەر مەن پاتەرلەرگە بارىپ قوسپايمىن. تەك قاجەتتى ايماققا دەيىن جەتكىزىپ بەرەمىن. جۇمىسىمنىڭ كوبى دالادا وتەدى. سوندىقتان اۋا رايىنىڭ كۇرت وزگەرۋى كەيدە جۇمىسىمىزدا كوپ قيىندىق تۋعىزادى. جازدىڭ جەلدى كۇندەرى مەن قىستىڭ قارلى بوراندارى جەلىلەردى ءۇزىپ، باعانالاردى قۇلاتىپ كەتەدى. كەي جاعدايدا تال-تەرەكتەر دە ەلەكتر جەلىلەرىنىڭ ۇزىلۋىنە سەبەپ بولادى. وسىنداي جاعدايلاردا توك جۇيەلەرىنەن تۇرعىنداردىڭ زارداپ شەكپەۋىن قاتاڭ باقىلاۋدا ۇستايمىز. سونداي-اق، جەلىلەردى جالعاپ، تەكسەرۋ بارىسىندا ونى جان-جاقتى قاراپ، زەرتتەپ الماي ىسكە كىرىسپەيمىز. ويتكەنى، جوعارى كەرنەۋلى توكپەن جۇمىس جاساۋ وڭاي شارۋا ەمەس. توك كوزگە كورىنبەيدى، ونىڭ بار-جوعىن اڭعارماي قالساڭ، قاتەرگە ۇرىناسىڭ. بۇل ۇلكەن ىجداعاتتىلىقتى، بىلىكتىلىكتى قاجەت ەتەدى. سوندىقتان كەز كەلگەن ۋاقىتتا قاۋىپسىزدىك ەرەجەلەرىنىڭ ساقتالعاندىعىن دۇرىس كورەمىن، — دەيدى ول.
ەنەرگەتيكا سالاسىندا ءبىراز جىل ەڭبەك ەتكەن كەيىپكەرىمىزدىڭ وسىنداي كاسىپتىك شەبەرلىككە جەتۋى ونىڭ ءوز ىسىنە دەگەن سۇيىسپەنشىلىگىنەن بولسا كەرەك، ول: «ەگەر ەكىنشى مارتە ماماندىق تاڭداۋ مۇمكىندىگى بەرىلسە، ويلانباستان تاعى دا جارىقتاندىرۋشى بولار ەدىم»، — دەيدى.
— سەبەبى ادال قىزمەت جارىق تۇتىنۋشىلار الدىنداعى جاۋاپكەرشىلىك مىندەتىمدى ارتتىرسا، سول ەڭبەكتىڭ ءتاتتى جەمىسى كوڭىلىمدى مارقايتادى، بيىك ماقساتتارعا جەتەلەيدى. ارقاشان ەڭبەگىم ەلەنىپ، شىنايى ىقىلاسىم باعالانىپ جاتادى. سوندىقتان مەن ءوز جۇمىسىمدى الدىمەن سۇيىسپەنشىلىكپەن جانە جاۋاپكەرشىلىكپەن اتقارۋعا تىرىسامىن، — دەيدى كەيىپكەرىمىز.
«ەرىنبەي ەڭبەك ەتكەن ادام عانا بيىكتى باعىندىرادى» دەپ ەسەپتەيتىن باقتيار داۋلەتبايۇلى قازىر جاستار ماماندىق تاڭداۋدا ءوز قابىلەتتەرىنە ەمەس، قاراجاتتارىنا كوپ سەنەتىنىن ايتادى. ونىڭ ايتۋىنشا، سوڭعى كەزدەرى «زامانىڭ تۇلكى بولسا، تازى بوپ شال» دەمەكشى، جاستاردىڭ كوبى جۇمىسى جەڭىل، ەڭبەكاقىسى جوعارى، جايلى دا ءزاۋلىم عيمارات نە كەڭسە ىشىندە وتىرىپ جۇمىس جاساعاندى قۇپ كورەدى.
— بۇگىنگى كۇننىڭ اتا-اناسى بار جيعان-تەرگەنىن اۋىزدارىنان جىرىپ، بالالارىن وقىتۋعا جۇمسايدى. ال جاستاردىڭ كوپ بولىگى ەكونوميست، زاڭگەر بولۋدى قالايدى. الايدا كەيىن ءوز ماماندىقتارى بويىنشا تۇراقتى جۇمىس تابا الماي، ءار جەردە جەڭىل جۇمىس جاساپ، كۇن كورەدى. سوندىقتان اسىرەسە، ەر بالالار تەحنيكالىق ماماندىقتاردى يگەرىپ، ءوز بەتىمەن جاڭا تەحنولوگيالاردى ۇيرەنىپ، جاڭاشىلدىققا بوي ۇسىنعاندارى ءجون دەپ ويلايمىن. ءار ادام ءوز قارىم-قابىلەتى مەن مۇمكىندىگىنە قاراي وقىپ، ەڭبەك ەتسە، سوعۇرلىم جاقسى ناتيجەلەر مەن جەڭىسكە قول جەتكىزەدى، — دەيدى ول.
ءوز ىسىنە شىن بەرىلگەن ماماننىڭ ەڭبەكسۇيگىشتىگىن جوعارى باعالايتىن پريدوروجنىي باۋ-باقشا ۇجىمىنىڭ تۇرعىندارى ونى: «شەبەر بولسا، باقتيارداي بولسىن!» دەپ ماقتاپ وتىرادى. اقتوبە ءوڭىرى ەنەرگەتيكاسىنىڭ دامۋى مەن قالا كوشەلەرىنىڭ جارىقتانۋىنا ەرەكشە ۇلەسىن قوسىپ، ولاردى جەتىلدىرۋ جانە جاڭعىرتۋ شارالارىنا بار ىنتا-ىقىلاسىمەن اتسالىسىپ جۇرگەن ونىڭ العا قويعان ماقساتتارى مەن جوسپارلارى كوپ.
— الداعى ۋاقىتتا ءوزىم تۇراتىن اۋداننىڭ كوشەلەرىن جارىقتاندىرىپ، سونداي-اق، تۇرعىنداردىڭ قاۋىپسىزدىگىن قامتاماسىز ەتۋ ءۇشىن بەينەكامەرالار ورناتسام دەيمىن. ازىرگە ءبىزدىڭ باۋ-باقشا ۇجىمىنداعى كوشەلەرگە رەسمي ستاتۋس بەرىلگەن جوق. سوندىقتان مەملەكەت تاراپىنان ەشقانداي كومەك بولماي تۇر. دەگەنمەن كەلەشەكتە جولدار جاڭارىپ، تۇرعىنداردىڭ جاعدايى جاقسارادى دەپ سەنەمىن، — دەيدى ب. بەرديەۆ.
داناگۇل بايمۇقاش،
«ادىرنا» ۇلتتىق پورتالى.
