كەنجەعۇل سەيىتجان: «كوزى كورمەيتىن بالالاردى دامىتۋ ماقساتىم. ولاردىڭ كۇلگەنى مەن ءۇشىن قۋانىش»

3112
Adyrna.kz Telegram

كىشكەنتايىنان كورۋ مۇمكىندىگىنەن ايىرىلعان كىنجەعۇل سەيىتجان بۇگىندە كوپكە ۇلگى. ويتكەنى،  كوزى كورمەسە دە، كوكىرەگى وياۋ. ومىرگە دەگەن قۇلشىنىسىنىڭ ارقاسىندا سپورتتىڭ بىرنەشە تۇرىمەن اينالىسىپ، وليمپيادا چەمپيونى اتانىپ وتىر. «ادىرنا» ۇلتتىق پورتالىنىڭ ءتىلشىسى كەنجەعۇل سەيتجانمەن تىلدەسىپ، ومىرگە قۇشتارلىعىنىڭ قۇپياسىن سۇراپ ءبىلدى.

كەنجەعۇل سەيىتجان –  قوستاناي وبلىسى امانكەلدى اۋدانىندا دۇنيەگە كەلگەن. وتباسىنداعى 20 بالانىڭ كەنجەسى. 16 اپكەسى مەن 3 اعاسى بار. كىشكەنتايىنان قوس جانارىنان ايىرىلعانىمەن، ەشقاشان جىگەرى مۇقالماعان. ءاردايىم العا ۇمتىلىپ، جوعارى ناتيجەلەر كورسەتۋدە. مەكتەپتى دە، جوعارى وقۋ ورنىن دا قىزىلعا ءبىتىرىپ، قاتارلارىنىڭ الدى بولىپ وتىر.

«مەكتەپتى 2003 جىلى قىزىل اتاتەستاتپەن ءبىتىردىم. 2007 جىلى قازاق ۇلتتىق ۋنيۆەرسيتەتىنىڭ تاريح فاكۋلتەتىن قىزىل ديپلوممەن ءبىتىردىم. ودان كەيىن جاپونيادا «الەۋمەتتىك ليدەرلەر» باعدارلاماسىندا جانە امەريكادا، انگليادا وقىدىم. ءبىلىم الۋدان جالىقپايمىن. ءاردايىم جاڭا ىزدەنىستى قاجەت ەتىپ تۇرامىن»،- دەيدى ول.

كەنجەعۇل سپورتتى دا قاتار الىپ، ءتۇرلى سايىستارعا قاتىسىپ ءجۇر. ول قازىر كاسىبي تۇردە 2 سپورت تۇرىمەن اينالىسادى. ءبىرىنشىسى – گولبول. ونىمەن 2016 جىلدان بەرى شۇعىلدانىپ، 2020 جىلى قازاقستان ۇلتتىق كومانداسىنىڭ مۇشەسى بولدى. سونداي-اق، گولبولدان قازاقستاننىڭ بىرنەشە دۇركىن چەمپيونى.

 «ەكىنشى اينالىساتىن سپورت ءتۇرىم – پاراۆەلو سپورتى. قازاقستاننىڭ 2 دۇركىن چەمپيونىمىن. رەسمي تۇردە 2022 جىلدان باستاپ قازاقستاننىڭ وسى پاراۆەلو سپورتىنىڭ ۇلتتىق كومانداسىنىڭ مۇشەسىمىن.  سالاۋاتتى ءومىر سالتىن ناسيحاتتايتىن ەكى ۇيىم قۇرعانبىز. ول قازاقستان گولبول فەدەراتسياسى. وسى سپورت ءتۇرىن دامىتۋ ءۇشىن قۇرعانبىز. سونداي-اق، ءار ءتۇرلى ءىس-شارالار ۇيىمداستىرىپ تۇرامىز. قازىر دە ءوز جۇمىسىن جاساپ كەلەدى.  وسى ەكى فەدەراتسيادان دا، الەۋمەتتىك جاعىنان دا، سالاۋاتتىق ءومىر جاعىنان دا، بارلىعىنان قولىمنان كەلگەنشە ايانباي قىزمەت ەتۋگە تىرىسامىن. كوزى كورمەيتىن بالالارعا، جاستارعا اقپارات بەرىپ، ولاردى سپورتقا تارتىپ، دامىتۋ ماقساتىم»، - دەيدى سپورتشى.

ۆەلوسپورت پەن گولبولدان بولەك، كەنجەعۇل تاۋعا ورلەۋدەن قازاقستاننىڭ چەمپيونى.

 وزگە ءتىلدىڭ ءبارىن ءبىل، ءوز ءتىلىڭدى قۇرمەتتە!

كەنجەعۇل – 8 قىرلى. سپورتتىڭ بىرنەشە ءتۇرىن ۇيرەنىپ قانا قويماي، بىرنەشە ءتىلدى دە مەڭگەرگەن. قازاق تىلىنەن بولەك، ورىس، اعىلشىن، نەمىس، جاپون، تۇرىك تىلدەرىنە جەتىك.

«قازىر بىرنەشە ءتىلدى مەڭگەرۋگە تالپىنىپ ءجۇرمىن. ويتكەنى، ءار ءتىلدى ۇيرەنگەن سايىن، جاڭا ادام بولىپ قالىپتاساسىڭ. بۇرىن يسپان ءتىلى مەن فرانتسۋز ءتىلىن ءبىراز مەڭگەرگەنمىن. قازىر ۇمىتىنقىراپ قالدىم. ال نەمىس ءتىلىن جاقسى تۇسىنەمىن. ونى مەڭگەرۋ ءۇشىن 9 جىلىم كەتكەن. 2006 جىلى جاپونياداعى بالالار رومانى سايىسىنا قاتىستىم. بىراق جەڭىسكە جەتە الماي قالدىم. سوسىن كەلەسى جولى مىندەتتى تۇردە جەڭىسكە جەتەمىن دەپ اعىلشىن تىلىمەن قاتار، جاپون ءتىلىن ۇيرەنىپ باستادىم. جاپونياعا بارىپ كەلگەننەن كەيىن، ولاردىڭ مادەنيەتىن، قوعامىن كورگەننەن كەيىن، سول جاقتا بىرنەشە ترەنينگتەرگە قاتىسقاننان كەيىن  شابىتىم اشىلا ءتۇستى. ءسويتىپ، تىلدەردى مەڭگەرۋگە دەگەن ىنتام دا اشىلدى»، - دەيدى پوليگلوت كەنجەعۇل.

كەنجەعۇلدىڭ ايتۋىنشا، ءتىلدى مەڭگەرۋ ءۇشىن قورقىنىشتى جەڭۋ قاجەت.

«ءتىلدى ۇيرەنەمىن دەگەن ادامدارعا ايتارىم ەشقاشان قورىقپاۋ كەرەك. مەنىڭ قولىمنان كەلمەيدى» دەگەن ءسوزدى ميىڭىزدان الىپ تاستاڭىز. بارلىعىنىڭ قولىنان كەلەدى. ءتىل ۇيرەنۋگە دەگەن ىنتا، جالىن، ماقسات بولۋ قاجەت.، مەنىڭ 2006 جىلى جاپونياعا وقيمىن دەگەن ماقساتىم، سول ەلدىڭ ءتىلىن مەڭگەرتتى. وسىنداي ناقتى ماقساتتار ناقتى ناتيجەگە جەتەلەيدى»، دەپ كەڭەسىن بەردى.

 

«مەن حوستەلدەر كاسىبىمەن اينالىسقانمىن. قازىر توقتاپ تۇر. ويتكەنى، سپورتتان وليمپيادالارعا دايىندالامىن دەپ، كوڭىل بولە الماي قالدىم. الايدا الداعى ۋاقىتتا قولعا الامىن. سەبەبى، ول مەنىڭ وتباسىممەن بىرىگىپ باستاعان بيزنەسىم. جۇبايىمىز ەكەۋمىزدىڭ ول كاسىپكە اجەپتاۋىر ەڭبەگىمىز ءسىڭدى. سوندىقتان ايتارم، ءاردايىم، ءوزىڭىزدى جان-جاقتان سىناپ كورىڭىز. ادام تالپىنسا بارلىعىن جاساي الادى»، - دەيدى كەنجەعۇل.

كەيىپكەرىمىزدىڭ ايتۋىنشا، قازىر مۇمكىندىگى شەكتەۋلى جاندارعا بارلىق مۇمكىندىك جاسالعان. تەك ونى پايدالانا الۋ قاجەت.

«ەلىمىزدە مۇمكىندىگى شەكتەۋلى ادامدارعا بارلىق جاعداي جاسالعان. مۇمكىندىگىم شەكتەۋلى ەكەن دەپ قۇر قاراپ وتىرۋعا بولمايدى. قازىر سپورتتى دا، ءبىلىمدى دە تەگىن الۋعا بولادى. ارنايى كوزى كورمەيتىندەرگە ارنالعان تەحنولوگيالاردى ۇكىمەت بەرەدى. الەۋمەتتىك كومەك ارقىلى شيپاجايعا دا بارا الادى. قازىر 12 مۇشەسى ساۋ، بىراق وزدەرىن شەكتەيتىن قانشاما ادامدى كورەمىز. ولارعا بەرىلگەن مۇمكىندىكتى جاي عانا ىسىرىپ تاستاپ ءجۇر. ايتارىم: ارەكەت ەتىڭىزدەر، ارەكەتتىڭ ءبىر بەرەكەتى بولار ءسوزسىز»، دەپ جىگەرگە تولى سوزدەرىن ايتتى.

كەنجەعۇلدىڭ ءار ۋاقىتى جوسپارلى. ۋاقىتىن باعالايتىن كەيىپكەرىمىز ءتىپتى، الداعى 10 جىلدىعىن دا جوسپارلاپ قويعان.

«قازىر دەنساۋلىعىدى كۇتىپ ءجۇرمىن. 6 اي سايىن دارىگەرلەرگە تەكسەرىلىپ تۇرامىن. سەبەبى، مەنىڭ دەنىم ساۋ بولسا، سپورتتا جاقسى ناتيجەلەر كورسەتىپ، ەلىمىزدىڭ اتىن الەمگە تانىتا الامىن.  قولىمنان كەلگەنشە ۋاقىتىمدى ەسەپتەپ، جوسپارلايمىن. اپتاسىنا 4-5 اۋديوكىتاپ تىڭدايمىن. تىلدەردى ۇمىتىپ قالماس ءۇشىن، ءار تىلدە اۋديوكىتاپتار تىڭداعان ىڭعايلى.

مەن ءوزىمدى 10-20 جىلدان كەيىن ۇلكەن كورپوراتسيانىڭ يەسى رەتىندە سەزىنەمىن. قازىر سوڭعى 6 جىلعا قويعان ماقساتىم – پاراۆەلو سپورتىنان الەم  چەمپيونى، ازيا چەمپيونى بولۋ. سول ءۇشىن قازىر ايانباي ەڭبەك ەتۋدەمىن»، -  دەيدى كەيىپكەرىمىز.

فوتو: جۇبايىمەن

 40 جاستاعى كەنجەعۇل قازىر ءبىر قىز، ءبىر ۇل تاربيەلەپ وتىر. وتباسىنىڭ تىرەگى بولعان ول بالالارىنىڭ دا وزىنەن ۇلگى العانىن قالايدى. سوندىقتان ءاردايىم ۇلگىلى اكە بولۋعا تىرىسامىن دەيدى.

«ماعان اتا-انام كىشكەنتايىمنان: «ءوزىڭدى عانا ويلاما، ەلىڭنىڭ جاعدايىن ويلا!» دەپ ءوسىردى. سوندىقتان مۇمكىندىگى شەكتەۋلى جاندارعا بارلىعىن ۇيرەتكىم كەلەدى. كەيبىرەۋلەرى قوعاممەن ارالاسا المايدى. ءتىپتى، كوپ اشىلا بەرمەيتىندىكتەن مۇمكىندىكتەردەن ايىرىلىپ جاتادى. سول سەبەپتەن بارىنە كومەكتەسۋ ءۇشىن جۇمىس ىستەپ ءجۇرمىىن. قاجەت جەردە قۇقىعىن قورعاپ بەرەمىن. ولاردىڭ جىميعانى مەن ءۇشىن قۋانىش.  گولبولدان نەمەسە باسقا سپورت تۇرىنەن بالالار كەلىپ، «بىزگە سپورتپەن اينالىسقان ۇنايدى، جاعداي جاساعانىڭىز ءۇشىن راحمەت» دەسە، ىشىمدە جىلۋ پايدا بولادى.  مەنىڭ جاساپ جاتقان ءىسىم جاي ەمەس ەكەنىن كورگەن كەزدە قاناتتانامىن. بالاشا ءماز بولىپ، ومىرگە قۇشتارلىعىم ارتىپ كەتەدى»، دەپ ءسوزىن قورىتىندىلادى.

دانا نۇرمۇحانبەت

«ادىرنا» ۇلتتىق پورتالى

 

پىكىرلەر