تۋعان جەرىن ساعىنبايتىن، تۋعان ەلىن اڭسامايتىن ازاماتتار كەمدە-كەم شىعار! «تۋعان جەرگە تۋىڭدى تىك» دەمەكشى، مەن ءوز شىعارمالارىمدا، اسپارا، مەركى، جەتپىس ءۇيلى قىزىلساي اۋىلىن بار الەمگە جار سالىپ، ەستىگەن جۇرتتىڭ قۇلاعىنا قۇيا ءبىلدىم.
1994 جىلى قيىن-قىستاۋ كەزەڭدەردە قوستوعان، مىڭقازان (بۇرىنعى ۆوروشيلوۆ), قىزىلساي اۋىلىنىڭ ورتاسىنا كەيىنگى ۇرپاققا وسيەت، ساباق بولسىن دەپ، سوعىس اتىنا لاعىنەت ايتىپ، «قارا كەمپىر» ەسكەرتكىشىن ءوز ەسەبىمنەن ورناتتىم. 2004 جىلى اۋىلعا مەشىت تۇرعىزدىم. كونتسەرتتەردە كىشكەنتاي عانا قىزىلساي اۋىلىمدى پاريجگە دە، ماسكەۋگە دە ايىرباستامايمىن دەپ جاريا ەتەمىن.
سول ايتپاقشى، قازىرگى گرانيتوگورسك (مەن سول جەردىڭ مەكتەپ-ينتەرناتىندا 1959-1963 جىلدارى وقىعانمىن) 1928-1932 جىلدارى ورىس باسقىنشىلارى مەنىڭ قوڭىرباي اتامنىڭ ءۇرىم-بۇتاعىن تۋعان جەرىنەن قۋىپ شىعىپ، قوڭىرباي اتا قىستاعىن گرانيتوگورسك دەپ وزدەرى يەمدەنىپ العان. ودان بەرى 70-75 جىل وتسە دە، الگى ورىسشا اتاۋ ەش وزگەرىسسىز قالا بەرىپ وتىر.
مەنىڭ ۇسىنىسىم، سول اۋىلدىڭ اتىن قوڭىر اۋىلى دەپ اتاۋ كەرەك. قوڭىر ءتۇس – قازاققا ءتان ءتۇس. قوڭىر دەگەن الماتى، شىعىس قازاقستان وبلىستارىندا اۋىلدار بار، «قوڭىر» دەگەن مۋزىكالى تريو بار، تىپتەن ءۇش جىلدان بەرى ەلباسىنىڭ تۋعان اۋىلى شامالعاندى ۇشقوڭىر دەپ اتاپ وتىر. سونىمەن قاتار مىنا ولەڭ شۋماقتارىن نازارلارىڭىزعا ۇسىنامىن.
قاراكەرگە جاراسار ومىلدىرىك،
اق كۇمىسپەن جاراسار تەبىندىلىك.
اسپارادان قوڭىر جەل سامال سوقسا،
قارا ولەڭدى جازاسىڭ توگىلدىرىپ.
ارقالى اقىن شىڭ-قۇزعا سىيا المايدى،
تۋعان ولكە جۋسانىن قيا المايدى.
كوكتەم، جازىن، قىس كەزىن ەسىنە الىپ،
قوڭىر كۇزگە جىرلارىن ءجيى ارنايدى.
جۇرەكتە وت جانعانمەن، جانىمدا ازاپ،
اقىن ءۇشىن جىر قىمبات، ءومىر عاجاپ.
قىزداي زيات مىنەزى، قىلدان نازىك،
قوڭىر ولەڭ جازاتىن قوڭىر قازاق.
اسپاراعا ءانىمدى ءجيى ارنايمىن،
تۋعان ولكە سامالىن قيا المايمىن.
قوڭىر اتام قىستاعىن ساعىندى-اۋ دەپ،
جەر جانناتى وسى-اۋ دەپ قيالدايمىن.
اللا قالاسا، قوڭىر اۋىلىندا قوڭىر سامال جەلمەن ىلەسىپ كەلىپ، قوڭىر شايدى ىشە وتىرىپ، قوڭىراجايمەن جولىعىسايىق.
التىنبەك قورازباەۆ،
جامبىل وبلىسىنىڭ
قۇرمەتتى ازاماتى، قر حالىق ءارتيسى، مەملەكەتتىك سىيلىقتىڭ لاۋرەاتى، «پاراسات»، «بارىس» وردەندەرىنىڭ يەگەرى
