شىمكەنت قالاسى اكىمدىگىندە قوعامدىق كەڭەستىڭ كەزەكتى وتىرىسى ءوتتى. وتىرىستى كەڭەس توراعاسى ن.بۇحارباي جۇرگىزىپ وتىردى. كەڭەستە ەكونوميكالىق تەرگەۋ دەپارتامەنتى باسشىسىنىڭ ورىنباسارى ب.جۇزەنوۆ، جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ە.جولداسوۆ، ىشكى ساياسات جانە جاستار ىستەرى جونىندەگى باسقارما باسشىسىنىڭ ورىنباسارى ب.ءادىلحانوۆ، مەملەكەتتىك ەڭبەك ينسپەكتسياسى باسقارماسىنىڭ باسشىسى ب.قالجانوۆ، جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ب.ناربەكوۆا 2021 جىلدىڭ 10 ايىندا اتقارىلعان جۇمىستارى بويىنشا ەسەپ بەردى.
ەكونوميكالىق تەرگەۋ دەپارتامەنتىنىڭ وكىلى ب.جۇزەنوۆ جالعان شوت-فاكتۋرا جاساۋ، سالىقتان جالتارۋ، بيۋدجەت قارجىسىن ماقساتسىز جۇمساۋ، جالعان اقشا جاساۋ، ەكونوميكالىق كونتراباندا دەرەكتەرى بويىنشا تەرگەپ-تەكسەرۋ جۇمىستارى جۇرگىزىلگەنىن اتاپ ءوتتى.
كەڭەستە ە.جولداسوۆ قالاداعى جولدار مەن قوعامدىق كولىك سالاسىندا اتقارىلعان جۇمىستار بويىنشا بايانداما جاسادى. باسقارما باسشىسىنىڭ ايتۋىنشا بۇگىنگى تاڭدا قالادا اينالما جولداردىڭ قۇرىلىسى قارقىندى جۇرۋدە. ىشكى ورامدىق كوشەلەر جوندەلىپ جاتىر. ەلەكتروندى كارتا ساۋداسى 300 مىڭنان اسسا، كەلەسى جىلى ونى 500 مىڭعا جەتكىزۋ جوسپاردا بار.
— قالاعا ءالى دە 1880 ايالداما قاجەت. وسى ماقساتقا 650 ملن. تەڭگە ءبولىندى. بيىل 288 ايالداما ورناتىلدى. اۆتوبۋس جۇرگىزۋشىلەرىنىڭ مادەنيەتىن كوتەرۋ باعىتىندا جۇمىستار اتقارىلۋدا. الداعى ۋاقىتتا پايدالانۋعا بەرىلەتىن جاڭا اۆتوبۋستاردا ايالدامالاردى اتايتىن قىزمەتى بولادى. بىرتە-بىرتە جولاۋشىلار تاسىمالى قىزمەتىن كوندۋكتورسىز اتقارۋعا كوشەمىز. بۇل جوسپارلاردى ورىنداۋ 3-5 جىل ۋاقىتتى الادى، - دەدى ە.جولداسوۆ. قوعامدىق كەڭەس مۇشەلەرى كولىك جىلدامدىعىن كەشكى، تۇنگى ۋاقىتتا ساعاتىنا 40 شاقىرىمنان 60-70 شاقىرىمعا كوتەرۋ كەرەك دەگەن ۇسىنىس ايتىپ، ونى حاتتاماعا ەنگىزەتىندەرىن جەتكىزدى.
ال ىشكى ساياسات جانە جاستار ىستەرى جونىندەگى باسقارما باسشىسىنىڭ ورىنباسارى ب.ءادىلحانوۆ 17 ءوڭىردىڭ ىشىندە شىمكەنت ءىس-شارالار سانى جونىنەن ۇزدىك بەستىككە كىرەتىنىن اتاپ ءوتتى. ونىڭ ايتۋىنشا، بيىل 350-گە جۋىق ءىس-شارا ۇيىمداستىرىلعان. ونىڭ 75 پايىزى ونلاين فورماتتا وتكەن. مەملەكەت ساياساتىن ناسيحاتتاۋ بويىنشا 236 ماتەريال جارىق كورگەن. ب.ءادىلحانوۆ قالادا 840 ۇكىمەتتىك ەمەس ۇيىم بارىن، بىراق ناقتى بەلسەندى جۇمىس ىستەيتىنى جۇزدەن ءسال-اق اساتىنىن باياندادى. ءوز كەزەگىندە كەڭەس مۇشەلەرى شالعاي اۋىلداردا مەكتەپ بىتىرگەن، بىراق ۇبت تەستتەن وتە الماي جۇمىسسىز جۇرگەن جاستار كوپ ەكەنىن، سوندىقتان الدىمەن ولاردىڭ سانىن ناقتى ءبىلىپ الىپ، سوسىن ولاردى وقىتۋ، جۇمىسقا ورنالاستىرۋ بويىنشا ارنايى جوسپار نەمەسە باعدارلاما جاساۋ قاجەتتىگى جونىندە ۇسىنىس تاستادى. سونداي-اق وقۋشىلار اراسىنداعى ءسۋيتسيدتىڭ الدىن الۋ ماقساتىندا قارجى ءبولدىرىپ، بۇل ىسكە بىلىكتى پسيحولوگتاردى تارتۋ تۋرالى يدەيا ۇسىندى.
سونىمەن بىرگە مەملەكەتتىك ەڭبەك ينسپەكتسياسى باسقارماسى باسشىسىنىڭ بايانداماسىنا وراي كەڭەس مۇشەلەرى جوعارى وقۋ ورنىن ءبىتىرىپ كەلگەن جاس مامانداردان جۇمىس ءوتىلىن تالاپ ەتەتىن تالاپتى الىپ تاستاۋ كەرەكتىگىن، سوندىقتان بۇل ماسەلەگە بايلانىستى زاڭعا ءتيىستى تۇزەتۋلەر ەنگىزۋ جاعىن قاراستىرىپ كورۋ كەرەكتىگىن ءسوز ەتتى.
ءانۋار جۇماشباەۆ
