Şymkent qalasy äkımdıgınde qoǧamdyq keŋestıŋ kezektı otyrysy öttı. Otyrysty keŋes töraǧasy N.Būharbai jürgızıp otyrdy. Keŋeste ekonomikalyq tergeu departamentı basşysynyŋ orynbasary B.Jüzenov, jolauşylar kölıgı jäne avtomobil joldary basqarmasynyŋ basşysy E.Joldasov, ışkı saiasat jäne jastar ısterı jönındegı basqarma basşysynyŋ orynbasary B.Ädılhanov, memlekettık eŋbek inspeksiiasy basqarmasynyŋ basşysy B.Qaljanov, jūmyspen qamtu jäne äleumettık qorǧau basqarmasynyŋ basşysy B.Narbekova 2021 jyldyŋ 10 aiynda atqarylǧan jūmystary boiynşa esep berdı.
Ekonomikalyq tergeu departamentınıŋ ökılı B.Jüzenov jalǧan şot-faktura jasau, salyqtan jaltaru, biudjet qarjysyn maqsatsyz jūmsau, jalǧan aqşa jasau, ekonomikalyq kontrabanda derekterı boiynşa tergep-tekseru jūmystary jürgızılgenın atap öttı.
Keŋeste E.Joldasov qaladaǧy joldar men qoǧamdyq kölık salasynda atqarylǧan jūmystar boiynşa baiandama jasady. Basqarma basşysynyŋ aituynşa bügıngı taŋda qalada ainalma joldardyŋ qūrylysy qarqyndy jürude. Işkı oramdyq köşeler jöndelıp jatyr. Elektrondy karta saudasy 300 myŋnan assa, kelesı jyly ony 500 myŋǧa jetkızu josparda bar.
— Qalaǧa älı de 1880 aialdama qajet. Osy maqsatqa 650 mln. teŋge bölındı. Biyl 288 aialdama ornatyldy. Avtobus jürgızuşılerınıŋ mädenietın köteru baǧytynda jūmystar atqaryluda. Aldaǧy uaqytta paidalanuǧa berıletın jaŋa avtobustarda aialdamalardy ataityn qyzmetı bolady. Bırte-bırte jolauşylar tasymaly qyzmetın konduktorsyz atqaruǧa köşemız. Būl josparlardy oryndau 3-5 jyl uaqytty alady, - dedı E.Joldasov. Qoǧamdyq keŋes müşelerı kölık jyldamdyǧyn keşkı, tüngı uaqytta saǧatyna 40 şaqyrymnan 60-70 şaqyrymǧa köteru kerek degen ūsynys aityp, ony hattamaǧa engızetınderın jetkızdı.
Al ışkı saiasat jäne jastar ısterı jönındegı basqarma basşysynyŋ orynbasary B.Ädılhanov 17 öŋırdıŋ ışınde Şymkent ıs-şaralar sany jönınen üzdık bestıkke kıretının atap öttı. Onyŋ aituynşa, biyl 350-ge juyq ıs-şara ūiymdastyrylǧan. Onyŋ 75 paiyzy onlain formatta ötken. Memleket saiasatyn nasihattau boiynşa 236 material jaryq körgen. B.Ädılhanov qalada 840 ükımettık emes ūiym baryn, bıraq naqty belsendı jūmys ısteitını jüzden säl-aq asatynyn baiandady. Öz kezegınde keŋes müşelerı şalǧai auyldarda mektep bıtırgen, bıraq ŪBT testten öte almai jūmyssyz jürgen jastar köp ekenın, sondyqtan aldymen olardyŋ sanyn naqty bılıp alyp, sosyn olardy oqytu, jūmysqa ornalastyru boiynşa arnaiy jospar nemese baǧdarlama jasau qajettıgı jönınde ūsynys tastady. Sondai-aq oquşylar arasyndaǧy suisidtıŋ aldyn alu maqsatynda qarjy böldırıp, būl ıske bılıktı psihologtardy tartu turaly ideia ūsyndy.
Sonymen bırge memlekettık eŋbek inspeksiiasy basqarmasy basşysynyŋ baiandamasyna orai keŋes müşelerı joǧary oqu ornyn bıtırıp kelgen jas mamandardan jūmys ötılın talap etetın talapty alyp tastau kerektıgın, sondyqtan būl mäselege bailanysty zaŋǧa tiıstı tüzetuler engızu jaǧyn qarastyryp köru kerektıgın söz ettı.
Änuar JŪMAŞBAEV
