مەملەكەت باسشىسى ايەل مەن بالالاردىڭ قۇقىعىن قورعاۋ، وتباسىنداعى زورلىق-زومبىلىقتى بولدىرماۋ ماقساتىندا ازاماتتىق قاۋىمداستىقتارمەن تالقىلاۋ جۇرگىزىپ، بارلىق پىكىرلەردى نازارعا الۋدى تاپسىرعان بولاتىن. وسىعان وراي شىمكەنتكە ارنايى ىسساپارمەن كەلگەن قر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى، قر پارلامەنتى ءماجىلىسىنىڭ دەپۋتاتى لاززات رامازانوۆا قوعام وكىلدەرىمەن كەزدەستى.
«وتباسى مەكتەبى» وتباسىلىق قۇندىلىقتارىن نىعايتۋ» جوباسى اياسىندا وتكەن كەزدەسۋگە قالا اكىمىنىڭ ءبىرىنشى ورىنباسارى ش.مۇقان جانە جەرگىلىكتى اتقارۋشى ورگانداردىڭ باسشىلارى، قالالىق ءماسليحات دەپۋتاتتارى، جەرگىلىكتى پوليتسيا قىزمەتكەرلەرى، داعدارىس ورتالىقتارى مەن بەلسەندى ۇكىمەتتىك ەمەس ۇيىمداردىڭ وكىلدەرى قاتىستى.
وندا العاش بولىپ ءسوز العان ۇلتتىق كوميسسيانىڭ ءتورايىمى لاززات رامازانوۆا وتباسى قۇندىلىقتارى تۇرعىسىندا ءسوز قوزعادى. وتباسىنداعى اتا-انانىڭ ءرولى، قوعاممەن بايلانىس، وتباسى ينستيتۋتىن نىعايتۋعا باعىتتالعان زاڭ نورمالارىن جەتىلدىرۋ ماسەلەسىن ورتاعا سالدى.
سونىمەن قاتار، جيىنعا قاتىسقان رەسپۋبليكالىق اكەلەر وداعى قوعامدىق بىرلەستىگىنىڭ توراعاسى ماقسۇتبەك ايتماعانبەت، Street Law Kazakhstan باعدارلاماسىنىڭ ترەنەرى، زاڭگەر مەدەت ۋسەروۆ، «اتامەكەن» ۇكپ ىسكەر ايەلدەر كەڭەسىنىڭ مۇشەسى ايجان مۇقاتاەۆا، تەلەدارىگەر، ەندوكرينولوگ، anti-age ەكسپەرت گۇلجان امانباي سانالى وتباسى جانە اكەنىڭ بالا تاربيەسىنە ارالاسۋى، پسيحولوگيالىق ماسەلەلەر تاقىرىبىندا پىكىرلەرىن ءبىلدىردى.
كەزدەسۋ سوڭىندا «تۇرمىستىق زورلىق-زومبىلىققا قارسى ءىس-قيمىل تۋرالى» قر زاڭىنىڭ جوباسى تالقىلانىپ، ۇسىنىستار جيناقتالدى.
"ادىرنا" ۇلتتىق پورتالى.
