ءماجىلىس دەپۋتاتى بەكبولات تىلەۋحان ديسسيدەنت، اقىن، مارقۇم ارون اتابەكتى "ەلبۇزار" دەپ ايىپتادى. ايتۋىنشا، "شاڭىراق" وقيعاسى كەزىندە ارون اتابەك ونىڭ كومەكشىسى بولعاندىقتان، دەپۋتات ونىڭ مۇددەسىن قورعاعان. ءتىپتى، سول ءۇشىن ىشكى ىستەر ءمينيسترى مەن الماتىنىڭ سول كەزدەگى اكىمى يمانعالي تاسماعامبەتوۆپەن كەزدەسكەنىن ايتادى. الايدا ءىستىڭ ءمان-جايىپ بىلگەندە، وكىنگەنىن جەتكىزدى. بۇل تۋرالى "ازاتتىق راديوسى" حابارلادى.
بەكبولات تىلەۋحاننىڭ ويىنشا، 18 جىلعا سوتتالعان اقىنعا بەرىلگەن جازا ءادىل بولعان.
ء"بارى زاڭ بويىنشا بولدى. مەن قاسىندا بولعان جوقپىن. ماعان دالەل كەلتىردى. قوعامدىق كومەكشىمدى قورعادىم، بىراق ونىڭ ءىسى قاتە بولدى. سوت دۇرىس جاسادى. ادۆوكاتتاردىڭ، تەكسەرۋشىلەردىڭ سوزىنە قاراساق، ءبارى زاڭدى", - دەدى تىلەۋحان.
دەپۋتات اتابەكتىڭ سوزىنە ەلپىلدەپ، ەموتسياعا بەرىلگەنىن اتاپ ءوتتى.
"ول قازاق ءۇشىن جۇگىرگەن جوق. بەلگىلى ءبىر ساياسي كۇشتەردىڭ مۇددەسىن قورعاعانىن بىلمەدىم. وكىنىپ قالدىم. سول كەزدە شىن جۇرەگىممەن حالىققا جانى اشيدى دەپ قورعادىم. كەيىن ساياسي قۇرال، ديسسيدەنت ەكەنىنە كوزىم جەتتى", - دەگەن تىلەۋحان مارقۇم اتابەكتى "ەلبۇزار" دەپ ايىپتادى.
سونداي-اق، دەپۋتات ارون اتابەكتى "قازاقتىڭ اقىنى" دەپ اتاعان جۋرناليستكە اشۋلاندى.
"ول - ورىستىڭ اقىنى، ورىس مادەنيەتىنىڭ وكىلى. ادام قاي تىلدە سويلەسە، سول ەلگە قىزمەت ەتەدى. ول كىسى قالماقتىڭ دىنىندەگى پۇتقا تابىنۋشى بولعان. جۇرەگى دە، ءتىلى دە، ءدىنى دە قازاقشا ەمەس", - دەپ مالىمدەدى تىلەۋحان.
“ادىرنا” ۇلتتىق پورتالى
