«حالىق قاتىساتىن بيۋدجەت» جوباسى ءوز ناتيجەسىن بەرۋدە

ەڭبەكشى اۋدانىندا 630 كوپقاباتتى تۇرعىن ءۇي 435 اۋلاعا بىرىكتىرىلگەن. اۋداندا 2011-2020 جىلدار ارالىعىندا كەزەڭ-كەزەڭمەن 565 ءۇيدىڭ 373 اۋلاسى اباتتاندىرىلعان. بيىل «حالىق قاتىساتىن بيۋدجەت» جوباسىنىڭ اياسىندا 41 كوپقاباتتى ءۇيدىڭ اۋلالارىن جاڭارتۋعا بيۋدجەتتەن قاراجات ءبولىنىپ، قازىرگى تاڭدا 24 كوپقاباتتى ءۇيدىڭ اۋلالارىندا اباتتاندىرۋ جۇمىستارى اياقتالىپ، تۇرعىنداردىڭ يگىلىگىنە بەرىلدى. ال، 17 كوپقاباتتى ءۇيدىڭ اۋلالارىن اباتتاندىرۋ جۇمىستارى جالعاسۋدا. بۇل جوبا ارقىلى پايدالانۋعا بەرىلگەن اۋلالاردىڭ ءبىرى - ش.ءۋاليحانوۆ كوشەسىندەگى №225 ءۇيدىڭ ويىن الاڭشاسى. شىمكەنت اكىمى مۇرات ايتەنوۆ اتالعان اۋماققا بارىپ، اياقتالعان قۇرىلىس جۇمىسىن تەكسەردى. «بۇل جوبا تيىمدىلىگىن كورسەتتى. اۋلالار جاڭارىپ، قولايلى ورتا قالىپتاسا باستادى. اعاشتار مەن گۇلدەر وتىرعىزىپ، كۇتىم جاساۋ ماڭىزدى. اۋلالار - ءۇيىمىزدىڭ ءبىر بولىگى. ەندى ۋاقىتتى ءتيىمدى قولدانۋ ءۇشىن اۋلا كلۋبتارىن اشۋدى ۇسىنامىن. اۋلالار اراسىندا سپورتتىق جارىستار، ءتۇرلى ويىندار وتكىزۋگە بولادى. وسى ماقساتتا سپورت الاڭشالارى كوپتەپ اشىلۋدا» - دەدى م.ايتەنوۆ. اۋداندا الداعى جىلى دا اباتتاندىرۋ جۇمىستارى «حالىق قاتىساتىن بيۋدجەت» جوباسىنىڭ اياسىندا جالعاسادى. قازىرگى تاڭدا تۇرعىندار تاراپىنان 93 ۇسىنىس ءتۇسىپ، تۇرعىندار اراسىندا 66 ۇسىنىس قاجەتتى داۋىستى جينادى.