Eńbekshi aýdanynda 630 kópqabatty turǵyn úı 435 aýlaǵa biriktirilgen. Aýdanda 2011-2020 jyldar aralyǵynda kezeń-kezeńmen 565 úıdiń 373 aýlasy abattandyrylǵan.
Bıyl «Halyq qatysatyn bıýdjet» jobasynyń aıasynda 41 kópqabatty úıdiń aýlalaryn jańartýǵa bıýdjetten qarajat bólinip, qazirgi tańda 24 kópqabatty úıdiń aýlalarynda abattandyrý jumystary aıaqtalyp, turǵyndardyń ıgiligine berildi. Al, 17 kópqabatty úıdiń aýlalaryn abattandyrý jumystary jalǵasýda.
Bul joba arqyly paıdalanýǵa berilgen aýlalardyń biri - Sh.Ýálıhanov kóshesindegi №225 úıdiń oıyn alańshasy.
Shymkent ákimi Murat Áıtenov atalǵan aýmaqqa baryp, aıaqtalǵan qurylys jumysyn tekserdi.
«Bul joba tıimdiligin kórsetti. Aýlalar jańaryp, qolaıly orta qalyptasa bastady. Aǵashtar men gúlder otyrǵyzyp, kútim jasaý mańyzdy. Aýlalar - úıimizdiń bir bóligi. Endi ýaqytty tıimdi qoldaný úshin aýla klýbtaryn ashýdy usynamyn. Aýlalar arasynda sporttyq jarystar, túrli oıyndar ótkizýge bolady. Osy maqsatta sport alańshalary kóptep ashylýda» - dedi M.Áıtenov.
Aýdanda aldaǵy jyly da abattandyrý jumystary «Halyq qatysatyn bıýdjet» jobasynyń aıasynda jalǵasady. Qazirgi tańda turǵyndar tarapynan 93 usynys túsip, turǵyndar arasynda 66 usynys qajetti daýysty jınady.
