شىمكەنت قالاسىندا ينۆەستيتسيا تارتۋعا ارنالعان بەس جىلدىق جوسپار بەكىتىلىپ، ونىڭ اياسىندا 2,6 ترلن. تەڭگە بولاتىن 282 جوبانى ىسكە اسىرۋ كوزدەلگەن. ناتيجەسىندە 20 مىڭ جاڭا جۇمىس ورىندارى اشىلماق. بۇل تۋرالى قالا اكىمى مۇرات ايتەنوۆ ورتالىق كوممۋنيكاتسيالار قىزمەتىندە وتكەن بريفينگتە مالىمدەدى.
«اعىمداعى جىلدىڭ 11 ايىندا قالاعا تارتىلعان ينۆەستيتسيا كولەمى وتكەن جىلدىڭ سايكەس كەزەڭىمەن سالىستىرعاندا 55 پايىزعا ارتىپ، 392,4 ملرد. تەڭگەدەن استى»، — دەدى م.ايتەنوۆ.
قالا باسشىسى شاھار بيۋدجەتىنىڭ كولەمى مەگاپوليس بولعالى 4 ەسەگە ارتقانىن اتاپ ءوتتى. اعىمداعى جىلدىڭ باسىندا قالانىڭ بەكىتىلگەن بيۋدجەتى 388 ملرد. تەڭگە بولسا، قازىر ونىڭ كولەمى 497 ملرد. تەڭگەگە جەتكەن نەمەسە ءبىر جىلدىڭ ىشىندە بيۋدجەت قورى 109 ملرد. تەڭگەگە ۇلعايعان. قارجىلىق قوردىڭ 45 پايىزى الەۋمەتتىك سالاعا باعىتتالسا، 25 پايىزى دامۋ جوبالارىنا بولىنگەن.
بيۋدجەت قاراجاتىن ۇلعايتۋ ارقىلى قالاداعى ءبىرشاما وزەكتى ماسەلەلەر شەشىمىن تاۋىپ كەلەدى. سونىڭ ىشىندە بيۋدجەتتى جوسپارلاۋدا اشىقتىقتى قامتاماسىز ەتۋدە مەملەكەت باسشىسى ۇسىنعان «حالىق قاتىساتىن بيۋدجەت» جوباسى جاقسى تاجىريبەگە اينالعان. «حالىق قاتىساتىن بيۋدجەت» جوباسىن ىسكە اسىرۋ اياسىندا بيىلعى جىلى 66 جوباعا 1,3 ملرد. تەڭگە قارجى بولىنگەن. بۇل جۇمىستار كەلەسى جىلى دا جالعاسىن تاۋىپ، پرەزيدەنت تاپسىرماسىنا سايكەس اباتتاندىرۋ جانە تۇرعىن ءۇي-كوممۋنالدىق شارۋاشىلىعى بيۋدجەتىندەگى «حالىق قاتىساتىن» ۇلەس 10 ەسەگە ارتپاق.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز