سەنات توراعاسى ماۋلەن اشىمباەۆ جۇمىس ساپارىمەن الماتى وبلىسىنا كەلدى. ساپار بارىسىندا ول تاۋەلسىزدىكتىڭ 30 جىلدىعىنا ارنالعان سالتاناتتى ءىس-شاراعا قاتىستى، دەپ حابارلايدى قازاقپارات.
جەتىسۋ جۇرتشىلىعىمەن كەزدەسۋدە سەنات سپيكەرى قازاقستاننىڭ تاۋەلسىز مەملەكەت رەتىندە قالىپتاسۋىنىڭ نەگىزگى كەزەڭدەرىنە جانە ەلىمىزدىڭ 30 جىلدا قول جەتكىزگەن جەتىستىكتەرىنە توقتالدى.
ماۋلەن اشىمباەۆ وسى جىلدار ىشىندە ەلىمىز شەكارانى شەگەندەپ، جاڭا ەكونوميكالىق جۇيەگە كوشىپ جانە ونى نىعايتىپ، مەملەكەتتىك ينستيتۋتتاردىڭ بەرىك نەگىزىن قالاعانىن ايتتى.
«ەلباسىنىڭ تاريحي شەشىمىمەن ارقا تورىندە جاڭا ەلوردامىزدى تۇرعىزدىق. استانانى سالۋ تۇتاس ەلدىڭ ەكونوميكاسىنا مۋلتيپليكاتيۆتى اسەرىن تيگىزدى. قازىرگى تاڭدا نۇر-سۇلتان قالاسى بارلىق سالا مەن وڭىرگە قان جۇگىرتكەن ەلىمىزدىڭ ناعىز جۇرەگىنە اينالدى»، – دەدى سەنات توراعاسى.
ماۋلەن اشىمباەۆ تاۋەلسىزدىك العالى الماتى وبلىسىنىڭ ءوسىپ-وركەندەگەنىن جانە وسى كەزەڭدە ءوڭىر تۇرعىندارىنىڭ تۇرمىستىق جاعدايى ارتقانىن تىلگە تيەك ەتتى. ايماقتا ءىرى كاسىورىندار بوي كوتەرىپ، مىڭداعان جۇمىس ورنى اشىلعانىنا نازار اۋداردى. سونداي-اق سەنات توراعاسى پرەزيدەنت قاسىم-جومارت توقاەۆتىڭ ەلىمىزدى جاڭعىرتۋ باعدارى قازاقستاننىڭ دامۋىنا تىڭ سەرپىن بەرگەنىن جانە سونىڭ اياسىندا ساياسي، الەۋمەتتىك رەفورمالاردى ىسكە اسىرۋعا جول اشىلعانىن جەتكىزدى.
«ساياسي باسەكەنىڭ نىعايۋىنا ىقپال ەتكەن ماڭىزدى شەشىمدەر قابىلداندى. الەۋمەتتىك سالانى دامىتۋعا ايتارلىقتاي نازار اۋدارىلدى. مۇعالىمدەردىڭ، مەديتسينا، مادەنيەت قىزمەتكەرلەرىنىڭ جالاقىسى ەداۋىر ۇلعايدى. ۇستازداردىڭ مارتەبەسى ءوستى. مۇگەدەكتەردى قولداۋ باعىتىنداعى زاڭنامالىق بازا نىعايا ءتۇستى. ەكونوميكانى ءارتاراپتاندىرۋ ءىسى جاڭا قارقىنمەن جالعاسىن تاپتى»، – دەدى ماۋلەن اشىمباەۆ.
سالتاناتتى ءىس-شارا بارىسىندا الماتى وبلىسىنىڭ اكىمى قانات بوزىمباەۆ تا ءسوز سويلەپ، تاۋەلسىزدىك كۇنى مەملەكەتتىلىك پەن حالىق بىرلىگىنىڭ جارقىن كورىنىسى ەكەنىن ايتتى.
«وسى جىلدار ىشىندە زور مۇمكىندىكتەرگە جول اشىلدى، اۋقىمدى باستامالار ىسكە اسىرىلدى. ەلباسىنىڭ ساليقالى ساياساتىمەن ىسكە اسىرىلعان ۇلان-عايىر ىستەردى قازىر پرەزيدەنتىمىز قاسىم-جومارت توقاەۆ جالعاستىرىپ كەلەدى. تاريحقا تاعزىم ەتۋ، تۇلعالاردى تانۋ، ەلدىكتى قۇرمەتتەۋ، تاۋەلسىزدىكتى ودان ءارى نىعايتۋ – بارىمىزگە ارتىلعان ۇلكەن مىندەت، بۇگىنگى ۇرپاقتىڭ پەرزەنتتىك پارىزى. بۇل رەتتە قاراپايىم ازاماتتاردىڭ مەملەكەت دامۋىنا قوسقان ۇلەسى زور. ولار ەلدىڭ ەرتەڭىنە سەندى، كۇندىز-ءتۇنى تىنىمسىز ەڭبەك ەتتى، تاباندىلىق تانىتتى. سونىڭ ءبارى تاۋەلسىزدىگىمىزدى نىعايتۋعا ءوز سەپتىگىن تيگىزدى»، – دەدى قانات بوزىمباەۆ.
سونىمەن قاتار سەنات توراعاسى مەن وبلىس اكىمى جەتىسۋ جۇرتشىلىعىن تاۋەلسىزدىكتىڭ 30 جىلدىعىمەن قۇتتىقتاپ، پرەزيدەنت اتىنان ەلىمىز بەن وسى ءوڭىردىڭ دامۋىنا ۇلكەن ۇلەس قوسقان ازاماتتارعا مەملەكەتتىك ناگرادالاردى تاپسىردى. ماۋلەن اشىمباەۆ وبلىسقا ساپارى اياسىندا «تالدىقورعان» ءجۇزۋ باسسەينىنە جانە ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ ستۋدەنتتەر ۇيىنە ارنايى اتباسىن بۇردى. ودان بولەك، جەرگىلىكتى تاۋەلسىزدىك قۇرداستارىمەن كەزدەسىپ، ەگەمەندىكتىڭ 30 جىلىندا اتقارىلعان جۇمىستىڭ ءبارى، ەڭ الدىمەن، وسكەلەڭ ۇرپاقتى قولداۋعا باعىتتالعانىن ايتتى.
تاۋەلسىزدىكتى كوزىمىزدىڭ قاراشىعىنداي قورعاۋ، ونى قادىرلەۋ جانە نىعايتۋ بارشا قازاقستاندىقتىڭ ەڭ باستى مىندەتى ەكەنىن، بۇل رەتتە، اسىرەسە، جاستارعا ۇلكەن جاۋاپكەرشىلىك جۇكتەلەتىنىن دە تىلگە تيەك ەتتى. «بۇگىن سىزدەر 2050 جىلدىڭ جاستارى ءۇشىن حات ازىرلەپ وتىرسىزدار.
ەلىمىز وسى عاسىردىڭ ورتاسىنا قاراي الەمنىڭ ەڭ دامىعان 30 ەلىنىڭ قاتارىنا قوسىلۋدى ماقسات ەتىپ قويدى. بۇل حاتتى سول ۇلكەن ەلدىك ماقساتىمىز ورىندالعان قوعامنىڭ جاستارى وقيدى دەپ سەنەمىز. ال بۇگىنگى جاس بۋىن سول جارقىن قوعامدى قالىپتاستىرۋ ءۇشىن ايانباي ەڭبەك ەتۋى كەرەك. جاستارىمىز بۇل مىندەتتى ابىرويمەن اتقارادى دەپ سەنەمىز»، – دەدى ماۋلەن اشىمباەۆ.
