قر پرەزيدەنتى: تاۋەلسىزدىكتىڭ وتىز جىلى – حالقىمىزدىڭ تاريحىندا بەتبۇرىس بولعان جاسامپازدىق ءداۋىرى

مەملەكەت باسشىسى قاسىم-جومارت توقاەۆ پەن ەلباسى نۇرسۇلتان نازارباەۆ ەل تاۋەلسىزدىگىنىڭ 30 جىلدىق مەرەيتويىنا وراي «استانا وپەرا» وپەرا جانە بالەت تەاترىنىڭ عيماراتىندا وتكەن سالتاناتتى ءىس-شاراعا قاتىستى، دەپ حابارلايدى اقوردانىڭ ءباسپاسوز قىزمەتى. قازاقستان پرەزيدەنتى بارشا قازاقستاندىقتى ەل تاۋەلسىزدىگىنىڭ مەرەيتويىمەن قۇتتىقتاپ، جينالعان قاۋىم الدىندا ءسوز سويلەدى. قاسىم-جومارت توقاەۆ سويلەگەن سوزىندە قازاق مەملەكەتتىلىگىنىڭ عاسىرلار بويعى تاريحىنىڭ ەڭ ماڭىزدى كەزەڭدەرىنە، تاۋەلسىزدىك العان ساتتەن باستاپ قازاقستاننىڭ الەۋمەتتىك-ەكونوميكالىق، سىرتقى ساياسي، مادەني، عىلىمي سالالارداعى ماڭىزدى جەتىستىكتەرىنە نازار اۋداردى. تۇڭعىش پرەزيدەنت – ەلباسى نۇرسۇلتان نازارباەۆتىڭ ەگەمەن قازاقستاندى قۇرۋ ىسىندەگى ەرەن ەڭبەگىنە ارنايى توقتالدى. – تاۋەلسىزدىكتىڭ وتىز جىلى – تۇتاس ءبىر ءداۋىر. بۇل – قيىندىقتار مەن سىناقتاردى تاباندى تۇردە ەڭسەرۋ ءداۋىرى، تار جول، تايعاق كەشۋمەن سالىستىرۋعا بولاتىن ۇزاق كەزەڭ. بۇل – حالقىمىزدىڭ تاريحىندا بەتبۇرىس بولعان جاسامپازدىق ءداۋىرى. سوندىقتان ەل ازاماتتارىنىڭ اتىنان نۇرسۇلتان ءابىشۇلى نازارباەۆقا تاۋەلسىز قازاقستاندى قۇرۋداعى ەرەن ەڭبەگى ءۇشىن شىن جۇرەكتەن العىس ايتامىن، – دەدى مەملەكەت باسشىسى.