QR Prezidentı: Täuelsızdıktıŋ otyz jyly – halqymyzdyŋ tarihynda betbūrys bolǧan jasampazdyq däuırı

Memleket basşysy Qasym-Jomart Toqaev pen Elbasy Nūrsūltan Nazarbaev el Täuelsızdıgınıŋ 30 jyldyq mereitoiyna orai «Astana Opera» opera jäne balet teatrynyŋ ǧimaratynda ötken saltanatty ıs-şaraǧa qatysty, dep habarlaidy Aqordanyŋ baspasöz qyzmetı. Qazaqstan Prezidentı barşa qazaqstandyqty el Täuelsızdıgınıŋ mereitoiymen qūttyqtap, jinalǧan qauym aldynda söz söiledı. Qasym-Jomart Toqaev söilegen sözınde Qazaq memlekettılıgınıŋ ǧasyrlar boiǧy tarihynyŋ eŋ maŋyzdy kezeŋderıne, Täuelsızdık alǧan sätten bastap Qazaqstannyŋ äleumettık-ekonomikalyq, syrtqy saiasi, mädeni, ǧylymi salalardaǧy maŋyzdy jetıstıkterıne nazar audardy. Tūŋǧyş Prezident – Elbasy Nūrsūltan Nazarbaevtyŋ Egemen Qazaqstandy qūru ısındegı eren eŋbegıne arnaiy toqtaldy. – Täuelsızdıktıŋ otyz jyly – tūtas bır däuır. Būl – qiyndyqtar men synaqtardy tabandy türde eŋseru däuırı, tar jol, taiǧaq keşumen salystyruǧa bolatyn ūzaq kezeŋ. Būl – halqymyzdyŋ tarihynda betbūrys bolǧan jasampazdyq däuırı. Sondyqtan el azamattarynyŋ atynan Nūrsūltan Äbışūly Nazarbaevqa täuelsız Qazaqstandy qūrudaǧy eren eŋbegı üşın şyn jürekten alǧys aitamyn, – dedı Memleket basşysy.