ەلباسى: وتىز جىل ىشىندە ءبىراز شارۋا اتقارىلدى

بۇگىن مەملەكەتتىك مەرەكە – تۇڭعىش پرەزيدەنت كۇنى. وسى ورايدا  ەلباسى نۇرسۇلتان نازارباەۆتىڭ قاتىسۋىمەن 2021 جىلى وتكەن شارالاردا سويلەگەن بىرقاتار قاناتتى ءسوزىن ۇسىنامىز. 2021 جىلعى 7 قاڭتاردا نۇرسۇلتان نازارباەۆقا قازاقستان پراۆوسلاۆ شىركەۋىنىڭ جوعارى ناگراداسى – «العىس» وردەنى تابىس ەتىلدى. «تاۋەلسىزدىكتىڭ العاشقى كۇندەرىنەن باستاپ ءبىز تولەرانتتىلىقتى، بارلىق ەتنوستار جانە ءدىني كونفەسسيالار دوستىعى مەن سەنىمىن نىعايتۋ ساياساتىن ۇستاندىق. بىرلىك پەن دوستىق – تۇراقتىلىق پەن دامۋدىڭ كەپىلى». 2021 جىلعى 10 قاڭتاردا قازاقستاننىڭ تۇڭعىش پرەزيدەنتى نۇر-سۇلتان قالاسىنداعى №115 سايلاۋ ۋچاسكەسىنە باردى. «وتىز جىل ىشىندە ءبىراز شارۋا اتقارىلدى. ىنتا-جىگەر مەن بەرەكە-بىرلىكتىڭ ارقاسىندا ءبىرتالاي جەتىستىككە قول جەتكىزدىك. ەڭ باستىسى – ءبىز مەملەكەتتىڭ نەگىزىن قالادىق». 2021 جىلعى 11 قاڭتاردا ەلباسى نۇرسۇلتان نازارباەۆ «Nur Otan» پارتياسىنىڭ رەسپۋبليكالىق سايلاۋالدى شتابىنا باردى. «الەمدە كوروناۆيرۋس ىندەتىنە شالدىققاندار سانى ارتۋدا. دۇنيەجۇزىلىك بانك الەمدىك ەكونوميكانىڭ قۇلدىراۋى مەن جۇمىسسىزدىق وسەدى دەپ بولجاپ وتىر. بۇل جاعدايدا ءبىرتۇتاس ساياسي كۇشتىڭ اينالاسىنا توپتاسقان قوعام عانا جەڭىسكە جەتەدى». 2021 جىلعى 11 قاڭتاردا نۇرسۇلتان نازارباەۆ قازاقستان حالقى اسسامبلەياسىنان پارلامەنت ماجىلىسىنە سايلاناتىن دەپۋتاتتارعا داۋىس بەرۋ راسىمىنە قاتىستى. «قازاقستان حالقى اسسامبلەياسىنان پارلامەنت ماجىلىسىنە ۇسىنىلىپ وتىرعان توعىز كانديدات – قازاقستاندا تۇراتىن ءتۇرلى ەتنوس وكىلدەرى. ءبىز اسسامبلەيانى ساقتاپ، ونىڭ ينستيتۋتتارىنىڭ دامۋىن قامتاماسىز ەتۋىمىز كەرەك. وسى 25 جىلدىڭ ىشىندەگى قىزمەتى مەن قولداۋى ءۇشىن بارلىق اسسامبلەيا مۇشەلەرىنە ريزاشىلىعىمدى بىلدىرەمىن. تەك بىرلىكتىڭ ارقاسىندا ءبىز تولاعاي تابىسقا جەتىپ، قازاقستاندى وركەندەتەمىز». 2021 جىلعى 3 اقپاندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ توراعالىعىمەن قاۋىپسىزدىك كەڭەسىنىڭ وتىرىسى ءوتتى. «ەكونوميكالىق، تەحنولوگيالىق، الەۋمەتتىك احۋال مەن سىرتقى جاعدايلار قالاي وزگەرسە دە، ءبىزدىڭ ەشقاشان مىزعىمايتىن ۇلتتىق مۇددەلەرىمىز بار. بۇل – قازاقستاننىڭ ەگەمەندىگى، اۋماقتىق تۇتاستىعى، بىرلىك، ساياسي تۇراقتىلىق، ازاماتتاردىڭ ءال-اۋقاتى جانە الەۋمەتتىك ادىلدىك. ۇلتتىق قاۋىپسىزدىك ستراتەگياسى وسى قۇندىلىقتاردى قورعاۋعا، بيىل 30 جىلدىعىن اتاپ ءوتىپ جاتقان تاۋەلسىزدىگىمىزدى نىعايتۋعا نەگىزدەلگەن». 2021 جىلعى 31 ناۋرىزدا ەلباسى تۇركىتىلدەس مەملەكەتتەردىڭ ىنتىماقتاستىق كەڭەسىنىڭ بەيرەسمي سامميتىنە قاتىستى. «مەنىڭ ۇسىنىسىم بويىنشا «تۇركى الەمىنىڭ كەلەشەگى – 2040» قۇجاتى دەر كەزىندە ازىرلەندى دەپ ەسەپتەيمىن. بۇل قۇجاتتى بيىل كۇزدە تۇركيادا وتەتىن كەزەكتى سامميتتە قابىلدايمىز. باكۋدەگى سامميتتە كەڭەستى ۇيىم دەڭگەيىنە كوتەرۋدى ۇسىنعان بولاتىنمىن. سول ماڭىزدى ۇسىنىستى قولداعاندارىڭىز ءۇشىن بارشاڭىزعا العىسىمدى بىلدىرەمىن». 2021 جىلعى 28 ساۋىردە قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ توراعالىعىمەن قازاقستان حالقى اسسامبلەياسىنىڭ XXIX سەسسياسى ءوتتى. «قازىرگى نارىقتىق ەكونوميكانى جاڭادان قۇردىق، ىرگەلى رەفورمالار تابىستى جۇزەگە استى. سونىڭ ارقاسىندا قازاقستان الەمدەگى دامىعان 50 مەملەكەتتىڭ جانە تابىس دەڭگەيى ورتاشادان جوعارى ەلدەردىڭ قاتارىنا قوسىلدى. ەلىمىز جاھاندىق ۇلتتار قوعامداستىعىنىڭ بەدەلدى ءارى سەنىمدى مۇشەسىنە اينالدى – كوك تۋىمىز بىرىككەن ۇلتتار ۇيىمىنىڭ شتاب-پاتەرىندە جەلبىرەپ تۇر. ءبىز حالىقارالىق ارەنادا ءوزىمىزدىڭ ۇلتتىق مۇددەلەرىمىز بەن باسىمدىقتارىمىزدى جۇيەلى تۇردە قورعاپ كەلەمىز. قازاقستاننىڭ مەملەكەتتىك شەكاراسى زاڭ جۇزىندە بەكىتىلىپ، ونى الەمنىڭ بارلىق ەلدەرى مويىندادى». 2021 جىلعى 11 مامىردا نۇرسۇلتان نازارباەۆ مۋزىكالىق دراما تەاتردىڭ اشىلۋ راسىمىنە قاتىستى. «تۇركىستان قازىرگىدەي جاڭعىرۋدى بۇرىن-سوڭدى باسىنان وتكىزىپ كورگەن ەمەس. تانىماستاي بولىپ وزگەردى. بۇل جەر قازاقستاندىقتار ءۇشىن عانا ەمەس، بارلىق تۋريستەر ءۇشىن دە بىرەگەي مەكەنگە اينالادى». 2021 جىلعى 19 مامىردا قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ توراعالىعىمەن قاۋىپسىزدىك كەڭەسىنىڭ وتىرىسى ءوتتى. «شەكارانى بارلىق قاۋىپ-قاتەردەن قورعاۋدى قامتاماسىز ەتۋ كەرەك. شەكارا قىزمەتى مەن قارۋلى كۇشتەردى قۇرۋ ءوزارا ۇيلەسىمدى ءارى بىرىڭعاي ستاندارت بويىنشا جۇرگىزىلۋگە ءتيىس. سونىمەن بىرگە شەكارالىق قاۋىپسىزدىك ماسەلەسىن كەشەندى، جۇيەلى تۇردە قاراستىرعان ءجون». 2021 جىلعى 21 مامىردا نۇرسۇلتان نازارباەۆ جوعارى ەۋرازيالىق ەكونوميكالىق كەڭەستىڭ وتىرىسىنا قاتىستى. «سەنىمدى سەرىكتەستەرمەن جانە وداقتاستارمەن بىرلەسىپ قانا ەلدەرىمىزدىڭ ەكونوميكالىق قاۋىپسىزدىگى مەن تاۋەلسىزدىگىن قامتاماسىز ەتۋگە بولادى. ەۋرازيا ەكونوميكالىق وداعى قۇرىلعاننان بەرى ۇيىم مۇشەلەرى ەڭ كۇردەلى جاعدايدا دا ءوزارا مامىلەگە كەلىپ، ءبىر-ءبىرىن قولدايتىن سەرىكتەستەر ەكەنىن كورسەتتى. قازىرگى جاعدايعا بايلانىستى ءبىز ينتەگراتسيا مەن ءوزارا تۇسىنىستىكتى بۇدان دا ارتتىرا ءتۇسۋىمىز كەرەك». 2021 جىلعى 2 شىلدە دە نۇرسۇلتان نازارباەۆ ەلوردانىڭ «جاسىل بەلدەۋىنىڭ» دامۋ بارىسىمەن تانىستى. «تابيعاتتى ايالاپ، تازالىق ساقتاۋ قاجەت. اعاشتاردى ورتتەن قورعاپ، جويىلىپ كەتۋىنە جول بەرمەۋ كەرەك. مۇنىڭ ءبارى ءوزىمىزدىڭ بالالارىمىز ءۇشىن، كەلەر ۇرپاقتىڭ يگىلىگى ءۇشىن جاسالىپ جاتىر. ولار وسىنداي كەرەمەت سىي قالدىرعانىمىز ءۇشىن ءبىزدى ماقتان تۇتاتىن بولادى. تۋعان جەرگە دەگەن ماحاببات – قازاقستاندىق ءپاتريوتيزمنىڭ ماڭىزدى بولىگى». 2021 جىلعى 8 قىركۇيەكتە ەلباسى بۇۇ باس اسسامبلەياسىنىڭ جوعارى دەڭگەيدەگى پلەنارلىق وتىرىسىنا قاتىسۋشىلارعا ۇندەۋ جولدادى. «وسىدان وتىز جىل بۇرىن مەن الەمدەگى ەڭ ءىرى يادرولىق پوليگوننىڭ ءبىرى – سەمەي يادرولىق پوليگونىن جابۋ تۋرالى جارلىققا قول قويدىم. بۇل ادامزات تاريحىندا يادرولىق سىناقتار وتكىزۋگە زاڭدىق تۇرعىدا تىيىم سالعان العاشقى شەشىم ەدى. سەمەي پوليگونىنان كەيىن دۇنيە ءجۇزى بويىنشا باسقا دا پوليگوندار جابىلدى نەمەسە توقتاتىلدى. يادرولىق سىناقتارعا تىيىم سالۋ جاھاندىق سيپاتقا يە بولدى». 2021 جىلعى قاراشادا قر تۇڭعىش پرەزيدەنتىنىڭ توراعالىعىمەن «Nur Otan» پارتياسى ساياسي كەڭەسىنىڭ كەڭەيتىلگەن وتىرىسى ءوتتى. وندا نۇرسۇلتان نازارباەۆ پارتيا توراعاسى رەتىندەگى ءوز وكىلەتتىلىگىن ەل پرەزيدەنتى قاسىم-جومارت توقاەۆقا بەرۋ تۋرالى شەشىم قابىلدادى. «مەن پارتيامىزدىڭ نەگىزىن قالاپ، وعان وسى جىلدار ىشىندە باسشىلىق ەتتىم. «Nur Otan» پارتياسىن ەل پرەزيدەنتى باسقارىپ، ونىڭ ساياساتى مەن ستراتەگياسىن ءوزى ايقىنداپ وتىرۋى ماڭىزدى ەكەنىن جاقسى بىلەمىن. بۇعان دەيىن دە سولاي بولدى. ءبىز پارتيا جارعىسىنا سۇيەنە وتىرىپ، شەشىم قابىلداۋىمىز كەرەك. بۇل – ءبىزدىڭ بىرلىگىمىزدى كورسەتەتىن قادام»، – دەدى ەلباسى.