كەنتاۋدا ءجاسوسپىرىم قىزدار توبەلەسىپ، بىرەۋى اۋرۋحاناعا ءتۇستى. بۇل وقيعا ۆيدەوعا ءتۇسىپ قالعان. كادردا ءبىر قىزدىڭ ەكىنشىسىنىڭ شاشىنان جۇلىپ، باسىنان ۇرعىلاپ جاتقانىن كورۋگە بولادى. ال ۆيدەونى ءتۇسىرىپ تۇرعاندار اجىراتۋدىڭ ورنىنا توبەلەستىڭ كورىگىن قىزدىرىپ تۇر، دەپ حابارلايدى جەرگىلىكتى وتىرار سايتى.
اتالعان فاكت بويىنشا 17 جەلتوقساندا كەنتاۋ پوليتسياسىنا ءجابىر كورگەن قىزدىڭ اناسى شاعىمداندى. ونىڭ ايتۋىنشا، قىزى كوپتەگەن دەنە جاراقاتىن العان.
ءمالىم بولعانداي، جوعارى سىنىپتا وقيتىن ەكى قىز سوزگە كەلىسپەي قالعان. ارتى جانجالعا ۇلاسىپ، ولار مەكتەپ اۋلاسىندا جاعا جىرتىسقان.
وقيعادان كەيىن ءبىر قىز اۋرۋحاناعا جەتكىزىلدى.
پوليتسيا ەكى ءجاسوسپىرىمنىڭ اتا-اناسىمەن جانە مەكتەپ اكىمشىلىگىمەن ءتۇسىندىرۋ جۇمىستارىن وتكىزدى.
قازىر تەرگەۋ امالدارى جۇرگىزىلىپ جاتىر.
توبەلەستىڭ كادرى زاڭگەر ايگۇل ورىنبەكتىڭ Facebook-تەگى پاراقشاسىندا جاريالاندى.
"جاسوسپىرىمدەر اراسىنداعى بۇزاقىلىقتى الدىن الماساق، بولاشاقتا تۇرمەلەر ەل بۇزارلارعا تولادى! ەرلان تۇرعىمباەۆ مىرزا جەرگىلىكتى پوليتسيا ينسپەكتورلارى مەكتەپتەردى ارالاپ "جاستار اراسىنداعى قىلمىستى الدىن الۋ باعىتىندا" تۇسىندىرمە جۇمىستارىن وتكىزۋ كەرەك دەپ ويلايمىن", - دەپ جازدى ول.
زاڭگەردىڭ ايتۋىنشا، تۇركىستان وبلىسى، كەنتاۋ قالاسى №1 -ءشى مەكتەپتىڭ 8-ءشى سىنىپ وقۋشىسى جابىرلەنۋشىنى بىرنەشە قىز بولىپ اسا قاتىگەزدىكپەن ساباعان.
"بارلىعىن ۆيدەوعا ءتۇسىرىپ تۇرعان. وقيعا بولعان ورىن كەنتاۋ قالاسى 22-ءشى مەكتەپتىڭ تەرريتورياسى. قازىرگى ۋاقىتتا تاياق جەگەن 14 جاستاعى وقۋشى قىز كەنتاۋ قالالىق اۋرۋحاناسىنىڭ تراۆماتولوگيا بولىمىندە جاتىر. قىزدىڭ اناسىنىڭ ايتۋىنشا، دارىگەرلەر ءتيىستى مەديتسينالىق ساراپتامالاردى بەرمەي وتىر. ۋچاسكەلىك پوليتسيا كەلىپ شاعىم العاننان ءارى ءىس قوزعالماي تۇر. ءىستى جىلى جاپقىلارى كەلەدى دەيدى. مەكتەپ اكىمشىلىگى تاراپى ءۇنسىز. قىز مەكتەپكە بارۋدان باس تارتىپ جاتىر دەيدى اناسى. جاقىندارى قىزدىڭ پسيحيكالىق جاعدايى الاڭداتىپ وتىرعانىن ايتادى", - دەپ جازدى ول.
“ادىرنا” ۇلتتىق پورتالى
