پرەزيدەنتتىڭ ينجەنەرلەر مەن ونەركاسىپشىلەردىڭ جاڭا بۋىنىن دايىنداۋ تاپسىرماسى بىزگە ۇلكەن جاۋاپكەرشىلىك – قازيتۋ رەكتورى

2280
Adyrna.kz Telegram

بۇگىن، 11 قاڭتاردا ساعات 11:15-تە مەملەكەت باسشىسى قاسىم-جومارت توقاەۆتىڭ قاتىسۋىمەن پارلامەنت ءماجىلىسىنىڭ وتىرىسى ءوتتى. جيىندا مەملەكەت باسشىسى ەلىمىزدىڭ جاڭا پرەمەر-ءمينيسترىنىڭ كانديداتۋراسىن ۇسىندى. سونداي-اق ەلىمىزدە ورىن العان قايعىلى جاعدايدا، باسسىزدىق ارەكەتتىڭ سالدارىنان تۋىنداعان زارداپتاردى، ساياسي جانە الەۋمەتتىك-ەكونوميكالىق سالالارداعى وزەكتى ماسەلەلەردى شەشۋ بويىنشا اۋقىمدى بايانداما جاسادى، دەپ حابارلايدى "ادىرنا" ۇلتتىق پورتالى. 

تىكەلەي ەفيردە وتكەن باياندامانى قازيتۋ ۇجىمى دا جۇمىلا تىڭدادى. ۋنيۆەرسيتەت ۇجىمى ەل باسىنا كۇن تۋعان سىندارلى ساتتە پرەزيدەنت قاسىم-جومارت توقاەۆتىڭ حالىققا جولداعان ۇندەۋىندە بولاشاعىمىزدىڭ جارقىن بولاتىنىنا ۋادە بەرگەنى ءبارىمىزدىڭ كوڭىلىمىزگە سەنىم ۇيالاتتى دەيدى. سوندىقتان مەملەكەت باسشىسى تاراپىنان اتقارىلىپ وتىرعان سانالى قادام مەن يگى باستامالاردى تولىقتاي قازيتۋ ۇجىمى قولدايدى.

- مەملەكەت باسشىسى قاسىم-جومارت توقاەۆ بەينە بايلانىس ارقىلى پارلامەنت ءماجىلىسىنىڭ وتىرىسىنا قاتىسىپ، ەلىمىزدەگى ساياسي جانە الەۋمەتتىك-ەكونوميكالىق سالالارداعى وزەكتى ماسەلەلەردى شەشۋ بويىنشا اۋقىمدى بايانداما جاساپ، ناقتى تاپسىرمالار بەردى. ەلىمىزدىڭ ماقساتى ايقىن. مەملەكەت باسشىسى بايانداماسىندا بىلىمدىلىك، زاماناۋي سىناق-قاۋىپتەر مەن ترەندتەرگە ساپالى، تۇراقتى جانە ءادىل ءبىلىم بەرۋ ارقىلى جاۋاپ بەرەتىندىگىنە دە توقتالدى. جاستاردىڭ ماسەلەلەرىن جان-جاقتى قاراستىرىپ، العاشقى جۇمىس ورنى، ەڭبەككە ارالاسۋىنا ءمان بەرىلدى. الەۋمەتتىك قولداۋدى قاجەت ەتەتىن جاستارعا گرانت ءبولۋ ماسەلەسى دە كوتەرىلدى. «قازاقستان حالقىنا» قوعامدىق قورىن قۇرۋ تۋرالى تاپسىرماسى – كەزەك كۇتتىرمەي شەشىلۋگە ءتيىستى وزەكتى الەۋمەتتىك ماسەلەلەردىڭ شەشىمىن تابۋعا ۇلكەن قولداۋ بولاتىندىعى ءسوزسىز. جاستاردىڭ وتانىنا دەگەن سۇيىسپەنشىلىگىن ارتتىرۋدى وتباسى، ءبىلىم بەرۋ مەكەمەلەرى، جالپى قوعام بىرلەسە اتقاراتىن كەلەلى ماسەلە ەكەندىگىنە توقتالدى، - دەپ اتادى قازاقستان ينجەنەرلىك-تەحنولوگيالىق ۋنيۆەرسيتەتىنىڭ رەكتورى گۇلنار سارسەنبەكوۆا.

سونىمەن قاتار، ۋنيۆەرسيتەت باسشىسىنىڭ ايتۋىنشا، قوعام الدىنداعى جاۋاپكەرشىلىكتى، وركەنيەتكە قوسار ۇلەسىن قازاقستان ينجەنەرلىك-تەحنولوگيالىق ۋنيۆەرسيتەتى ۇجىمنىڭ ءاربىر مۇشەسى سەزىنەدى. ەلىمىزدىڭ وركەندەۋ جولىندا ۇجىم بولىپ ءبىر جاعادان باس، ءبىر جەڭنەن قول شىعارىپ، ادال ەڭبەگىمەن ۇلەس قوسادى.

- ەلىمىزدىڭ باستى قۇندىلىعى – تاۋەلسىزدىگىمىزدى كوزىمىزدىڭ قاراشىعىنداي ساقتاپ، باياندى بولىپ، جاڭا قازاقستاننىڭ دامۋ جولىندا پرەزيدەنت كوتەرگەن ماسەلەلەردىڭ شەشىمىن تاباتىندىعىنا سەنەمىز، - دەيدى رەكتور.

وسى ورايدا پروفەسسور گ. كوتوشەۆا: «ەلىمىزدە ورىن العان لاڭكەستىك توپتاردىڭ ۇيىمداستىرۋىمەن بولعان، ءار قازاقستاندىقتىڭ جادىندا ماڭگى قالاتىن قايعىلى جاعدايدا، مەملەكەت باسشىسىنىڭ استارلى ساياساتى مەن جەدەل شەشىمىنىڭ ارقاسىندا ەگەمەن ەلىمىزدىڭ تاۋەلسىزدىگىن امان ساقتاپ قالدىق. بۇل دا پرەزيدەنتىمىزدىڭ حالىقپەن بىرگە بولىپ، قيىن قىستاۋ كەزەڭدە دەمەۋ بەرىپ، قولداعانى دەپ بىلەمىن. بۇگىنگى باياندامانى تىڭداي وتىرىپ، بەيبىت بولاشاققا دەگەن جۇرەگىمىزگە سەنىم وتى ۇيالادى. الداعى ۋاكىتتا تاۋەلسىزدىگىمىز تۇعىرلى، ەگەمەندىگىمىز ەڭسەلى بولاتىنىنا تولىقتاي سەنىم بىلدىرەمىن»، - دەگەن پىكىرىن قوستى.

قاسىم-جومارت توقاەۆ پارلامەنت ءماجىلىسىنىڭ وتىرىسىندا سويلەگەن سوزىندە «ەڭ الدىمەن، ەلىمىزدىڭ جاڭا ەكونوميكالىق تۇعىرىن قالىپتاستىرۋدى مىقتاپ قولعا الۋ قاجەت. ەكونوميكالىق ساياساتىمىزدىڭ ماقساتى – ايقىن. بۇل – زامان تالابىنا ساي الەۋمەتتىك باعدارى بار نارىقتىق ەكونوميكا قۇرۋ جانە دامىتۋ» كەرەكتىگىن باسا ايتتى. مەملەكەت باسشىسى ءبىلىم بەرۋ سالاسىندا ۇلكەن جاندانۋ قاجەتتىگىن جەتكىزدى.

گۋمانيتارلىق ماماندىقتارعا قاراعاندا ەندى تەحنيكالىق ماماندىقتارعا باسىمدىق بەرىلۋ كەرەكتىگى، ينجەنەرلەر مەن وندىرىسشىلەردىڭ جاڭا بۋىنىن دايىنداۋ قاجەتتىلىگى ايتىلدى. بۇل ءوز كەزەگىندە ءدال وسى سالادا ماماندار دايىنداپ وتىرعان قازاقستان ينجەنەرلىك-تەحنولوگيالىق ۋنيۆەرسيتەتىنە ۇلكەن جاۋاپكەرشىلىك ەكەندىگىن جەتكىزدى ۋنيۆەرسيتەت باسشىلىعى.

"ادىرنا" ۇلتتىق پورتالى

پىكىرلەر