شىمكەنتتە جاپپاي تارتىپسىزدىك كەزىندە ساۋدا ورتالىعىن توناعاندار ۇستالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
«5 قاڭتاردا تۇنگى ۋاقىتتا شىمكەنت قالاسىندا ورىن العان جاپپاي تارتىپسىزدىك كەزىندە قۇقىق بۇزۋشىلار «مەترو» ساۋدا ورتالىعىنىڭ ەسىك-تەرەزەلەرىن سىندىرىپ، زاڭسىز كىرگەن. ساۋدا ورتالىعىنىڭ ىشىنەن ءتۇرلى زاتتار ۇرلانعان. اتالعان وقيعا شىمكەنت قالاسى پوليتسيا دەپارتامەنتى جەدەل باسقارۋ ورتالىعىنىڭ بەينەباقىلاۋ كامەرالارىنا تۇسكەن»،– دەلىنگەن حابارلامادا.
وقيعا قاراتاۋ اۋدانىنىڭ پوليتسيا باسقارماسىمەن سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە قر قىلمىستىق كودەكسى 188-بابىنىڭ 3-بولىگىمەن (ۇرلىق) تىركەلدى.
پوليتسيا قىزمەتكەرلەرىمەن جەدەل-ىزدەستىرۋ ءىس-شارالارىن جۇرگىزۋ بارىسىندا نۇرسات-3 شاعىناۋدانىندا ورنالاسقان جالدامالى پاتەرلەردىڭ بىرىندە وقيعاعا قاتىسى بار دەگەن كۇدىكپەن ءتورت ادام انىقتالىپ، ۇستالدى. ولار 20 جانە 21 جاستاعى تۇركىستان وبلىسىنىڭ تۇرعىندارى بولىپ شىقتى. ولاردان ايعاقتى زات رەتىندە «مەترو» ساۋدا ورتالىعىنان ۇرلانعان تاۋارلار تاركىلەنىپ الىندى. اتالعان ازاماتتارعا قاتىستى كۇزەتپەن ۇستاۋ تۇرىندەگى بۇلتارتپاۋ شاراسى قولدانىلدى.
سونىمەن قاتار، ءال-فارابي اۋدانى پوليتسيا باسقارماسىنىڭ قىزمەتكەرلەرىمەن جەدەل ءىس-شارالار بارىسىندا ساۋدا ورتالىعىنىڭ زاتتارىن ۇرلاعان تاعى ءبىر 27 جاستاعى ازامات ۇستالدى. ول ۇرلانعان زاتتاردى ءوزى جۇمىس ىستەيتىن كولىك جۋ ورنىنىڭ دەمالىس بولمەسىندە جاسىرعان بولىپ شىقتى. ۇرلانعان تاۋارلاردان بولەك، بولمەدە ەرەكشە ءيىسى بار زات پەن ىشىندە سارى سۇيىقتىعى بار كەسىلگەن پلاستيكالىق بوتەلكە جانە كاستەت انىقتالدى.
«ادىرنا» ۇلتتىق پورتالى
