Qazaqstan premer-ministrı Oljas Bektenov pen onyŋ orynbasarlaryna elımızdıŋ qai jerınde demalǧan ūnaidy? Bügın ükımette premer-ministrdıŋ BAQ ökılderımen alǧaşqy brifingı öttı, dep habarlaidy “Adyrna” ūlttyq portaly Tengrinews.kz saityna sıltep.
Jurnalisterdıŋ bırı Bektenovten Qazaqstandaǧy turizmdı damytu mäselesın sūrady. Ükımet basşysy būl salada problemalar baryn moiyndady.
"Köptegen kurorttyq aimaqtar, demalys oryndary tek älemdık standarttarǧa emes, qauıpsızdık pen jailylyqqa qoiylatyn negızgı talaptarǧa da säikes kelmeidı. Būl baǧytta jūmys jürgızıledı. Ökınışke qarai, bızde bır dert bar – ärdaiym jaǧajai mausymyna daiyn ekenı turaly ädemı esepter keledı. Al ıs jüzınde olai bolmai şyǧady. Ükımet tarapynan kemşılık bar ekenın moiyndaimyz", – dedı Oljas Bektenov.
Osydan keiın premer-ministrden soŋǧy ret Qazaqstanda qaşan jäne qaida demalǧany sūraldy. Bektenov 2021 jyldan berı demalys almaǧanyn aitty.
"Qai jerde naqty bolǧanymdy däl esıme tüsıre almai tūrmyn: Burabaida ma, älde Alakölde me... 2021 jyly Alakölde boldym. Sodan berı demalys bolǧan joq, sondyqtan eşqaida şyqpadym. Eŋ jaqyny – Burabaiǧa da baryp ülgermei jürmın. Jūmys saparymen Kenderlıde (Maŋǧystau oblysy – esk.), Alakölde boldym, bıraq şomylǧan joqpyn, jaǧdaidy körıp qaittym", – dedı premer.
Tört vise-premer de osy sūraqqa jauap berdı.
"Men de, ökınışke qarai, köpten berı demalysqa şyqqan joqpyn. Bıraq, ärine, özımızdıŋ... Pavlodardy, Baianauldy qatty jaqsy köremın. Būl – menıŋ süiıktı jerlerım", – dedı Roman Skliar jurnalistke qarata.
Vise-premer Ermek Köşerbaev soŋǧy ret demalysta Şyǧys Qazaqstan oblysynyŋ äkımı bolǧan kezınde şyqqanyn aitty.
"Byltyr, äkımdıkte jūmys ıstep jürgende, 7 kündık demalys boldy. Sonyŋ 4 künı Europaǧa bardym, al qalǧan 4 künı, jeksenbını qosa alǧanda, otbasymmen bırge Būqtyrmada (ŞQO – esk.), "Primorsk" demalys aimaǧynda, Ülken Naryn audanynda boldym", – dedı Köşerbaev.
Premerdıŋ orynbasary Serık Jūmanǧarin de soŋǧy ekı jylda demalys almaǧanyn aitty.
"Soŋǧy ekı jylda demalǧan joqpyn. Soŋǧy ret... Jaŋa jylda. Jaŋa jyldy Aqkölde ötkızdık. Öte jaqsy jer", – dedı ol.
Qanat Bozymbaev byltyrǧy jazǧy demalysynan su tasqynyna bailanysty bas tartuǧa tura kelgenın aitty.
"İä, byltyr su tasqynyna bailanysty jazda demalys bolmady, bıraq demalys künderı Aqtauda, jyly jaǧajai audanynda ekı kün boldym. Al bır demalysym Jetısudaǧy Alakölde öttı. Keremet demalys boldy", – dedı vise-premer.
