Halyqaralyq qylmystyq sottyŋ (HQS) prokuror orynbasarlary Najat Şamim Han jäne Mam Mandiia Niang Ukrainadaǧy äskeri qylmystarǧa bailanysty Resei prezidentı Vladimir Putinge jäne taǧy bes reseilıkke şyǧarylǧan tūtqyndau orderlerı jalpy amnistiia jariialanǧan künnıŋ özınde de küşınde qala beretının mälımdedı. Būl turaly olar 5 jeltoqsanda mälımdedı, dep habarlaidy "Adyrna".
HQS ökılderınıŋ aituynşa, tūtqyndau orderlerınıŋ küşın toqtatu üşın BŪŪ Qauıpsızdık Keŋesınıŋ arnaiy qarary qajet. Eger bolaşaqta beibıt kelısım jasalyp, Qauıpsızdık Keŋesı tergeudı keiınge qaldyrudy sūrasa, būl saiasi deŋgeidegı üderıs sanalady. Degenmen sot ökılderı mūndai şeşım HQS-tıŋ ädıldıktı qamtamasyz etu mındetıne kedergı bolmaitynyn atap öttı.
Mam Mandiia Niang Rim statutynyŋ talaptary saiasi kelısımderden joǧary tūrǧanyn, sondyqtan sot öz mandatyn oryndaudy jalǧastyratynyn aitty.
AQŞ-tyŋ 28 tarmaqtan tūratyn beibıt jospary qaqtyǧysqa qatysqan barlyq tarapqa tolyq amnistiia berudı közdegen. Būl ūsynys Ukraina tarapynan qatty synǧa ūşyrady.
Ukrainanyŋ Niderlandtaǧy elşısı, būrynǧy Bas prokuror Andrei Kostin jappai jäne auyr qylmystar jasalǧan jaǧdaida bärıne bırdei raqymşylyq beru mümkın emes ekenın aitty. Ol mūndai qadam ädılettılıkke qaişy keletının jetkızdı.
HQS 2022 jyly Reseidıŋ Ukrainaǧa jappai basyp kıruınen keiın jasalǧan äskeri qylmystar boiynşa Vladimir Putin men onyŋ jaqyn ainalasyndaǧy taǧy bes adamǧa order şyǧardy.
Ukraina bilıgınıŋ mälımetınşe, 2022 jyldan berı Reseige 19,5 myŋnan astam ukrain balasy zaŋsyz äketılgen. Olardyŋ 1605-ı ǧana elge qaitarylǧan. Balalardy okkupasiialanǧan aimaqtardan Reseige äkelu Putin men Reseidıŋ bala qūqyqtary jönındegı ombudsmenı Mariia Lvova-Belovaǧa qatysty orderlerdıŋ basty sebebı boldy.
Resei bilıgı būl aiyptaulardy joqqa şyǧaryp, balalar evakuasiia maqsatynda äketılgenın mälımdedı. Sonymen qatar Resei Halyqaralyq qylmystyq sottyŋ iurisdiksiiasyn moiyndamaidy.
