İtaliianyŋ soltüstıgındegı ūlttyq saiabaqtan myŋdaǧan dinozavr ızı tabyldy. Keibır ızderdıŋ diametrı 40 santimetrge deiın jetedı, dep habarlaidy «Adyrna» tılşısı BBC-ge sılteme jasap.
Ǧalymdardyŋ aituynşa, būl oljaǧa şamamen 210 million jyl bolǧan. Izder bır-bırıne parallel ornalasqan, olardyŋ köbınde sausaqtar men tyrnaqtardyŋ taŋbalary anyq körınedı.
Zertteuşılerdıŋ boljamynşa, ızderdı prozauropodtar qaldyrǧan. Būl – moiyny ūzyn, basy kışkentai, ötkır tyrnaqtary bar şöpqorektı dinozavrlar.
«Men özım tūratyn öŋırde osyndai äserlı jaŋalyqqa tap bolamyn dep eşqaşan oilamappyn», — dedı milandyq paleontolog Kristiano Dal Sasso.
Ötken jyldyŋ qyrküiek aiynda äuesqoi fotograf Elio Della Ferrera Milan qalasynan soltüstık-şyǧysqa qarai ornalasqan Stelvio ūlttyq saiabaǧynan tık jartasty tau betkeiı boiymen jüzdegen metrge sozylǧan erekşe ızderdı baiqaǧan.
Trias kezeŋınde (şamamen 250–201 million jyl būryn) būl jartastyŋ ornynda keiınnen Alpı taularynyŋ bır bölıgıne ainalǧan jazyq jer bolǧan.
«Būl aumaq dinozavrlarǧa toly bolǧan. Būl — ǧylym üşın asa qūndy, orasan zor qazyna», — deidı Dal Sasso.
İtaliianyŋ mädeniet ministrlıgı ızder jatqan audanǧa jetu qiyn jäne jaiau baru mümkın emes ekenın mälımdedı. Aitularynşa, ol jaqqa qarai jol joq. Sondyqtan ony zertteu üşın drondar men qaşyqtan zondtau tehnologiialary qoldanylmaq.
Stelvio ūlttyq saiabaǧy İtaliia men Şveisariia şekarasyndaǧy Fraele aŋǧaryndaornalasqan. Ol kelesı jyly ötetın qysqy Olimpiada oiyndarynyŋ ötkızu oryndaryna jaqyn maŋda jatyr.
«Tarihtyŋ özı tabiǧat pen sport arasyndaǧy simvoldyq estafetany jalǧap, ötken men bügındı toǧystyra otyryp, älemdık deŋgeidegı eŋ ırı sporttyq oqiǧaǧa taǧzym jasaǧandai äser qaldyrady», — dep jazdy eldıŋ mädeniet ministrlıgı.
