Qazaqstannyŋ Bas prokuraturasy şeşen belsendısı Mansur Movlaevty Reseige ekstradisiialauǧa kelısım berdı. Būl turaly äleumettık jelılerde zaŋger Mūrat Adam mälımdedı, dep habarlaidy “Adyrna”.
«Bügın Qazaqstan Respublikasynyŋ Bas prokuraturasynan jaman habar aldyq: olar Resei Federasiiasynyŋ Bas prokuraturasynyŋ şeşen oppozisionerı ärı belsendısı Mansur Movlaevty beru turaly ekstradisiialyq sūrauyn qanaǧattandyruǧa şeşım qabyldady», – dep jazdy zaŋger.
Ötken jyldyŋ jeltoqsan aiynyŋ soŋynda Qazaqstan bilıgı Movlaevqa bosqyn märtebesın beruden bas tartqan. Qazır būl şeşım sotta daulanyp jatyr, aldyn ala sot tyŋdauy 11 aqpanǧa belgılengen.
Qazırgı uaqytta Mansur Movlaev Almatydaǧy tergeu izoliatorynda (SİZO) otyr.
Sonymen qatar, belsendınıŋ qoldau toby Instagram jelısınde Qazaqstan Bas prokuraturasynan alynǧan qūjattyŋ köşırmesın jariialady. Qūjatta ekstradisiia turaly şeşım zaŋdy küşıne engennen keiın 30 täulık ışınde Movlaevty Reseige tapsyru mındetı körsetılgen.
Qūqyq qorǧauşylar būl şeşımdı zaŋsyz dep atap otyr, sebebı belsendınıŋ «baspana alu jönındegı sot prosesterı älı jürıp jatyr». Sondai-aq olar Reseide ony «100 paiyz yqtimaldyqpen öltıredı» dep mälımdeidı.
Mansur Movlaev Şeşenstan basşysy Ramzan Qadyrovty qataŋ synauymen, sondai-aq respublikadaǧy adam qūqyqtarynyŋ būzyluy men saiasi repressiialarǧa qarsy söz söileuımen tanymal.
2020 jyly belsendı Resei Qylmystyq kodeksınıŋ 228-baby (esırtkı zattarynyŋ zaŋsyz ainalymy) boiynşa üş jylǧa bas bostandyǧynan aiyrylǧan. Şeşen oppozisionerlerınıŋ aituynşa, būl ıs jalǧan qūrastyrylǧan.
2022 jyly Movlaev şartty türde merzımınen būryn bosatylǧan, alaida köp ūzamai ony ūrlap, Şeşenstandaǧy audandyq ışkı ıster bölımderınıŋ bırıne jetkızgen. Ūstalǧan adam qaşyp şyǧyp, qūjatsyz Qyrǧyzstanǧa jetken. Osydan keiın Resei ony ekstremizmdı qarjylandyrdy degen aiyppen federaldyq ızdeuge jariialaǧan.
Qyrǧyzstanda Movlaev şekarany zaŋsyz kesıp ötkenı üşın türmede jazasyn ötep, elden şyǧaryluy tiıs bolǧan, alaida ol öz betımen elden ketıp ülgergen.
2025 jyldyŋ mamyr aiynda belsendı Reseidıŋ sūrauy boiynşa Qazaqstanda ūstaldy. Aldymen ol 40 täulıkke qamauǧa alyndy, keiın būl qamau merzımı bırneşe ret ūzartyldy.
