Bügın Mäjılıs töraǧasy Erlan Qoşanov jurnalisterdıŋ sūraqtaryna jauap berdı, dep habarlaidy "Adyrna" ūlttyq portaly.
Jurnalister Erlan Jaqanūlyna «Nauryzdyŋ 5-ı künı sız jäne Ükımet basşysy Oljas Bektenov jūmys saparymen Mäskeuge bardyŋyzdar. Bızdıŋ qoǧamda «Şeneunıkter Reseige nege barǧyştai beredı? degen alaŋdauşylyq bar. Reseige nege premermen bır uaqytta bardyŋyz?» dep sūraq qoidy.
«Būl ädeiı ūiymdastyrylǧan närse emes. Būl ükımetter arasyndaǧy özderınıŋ talqylaityn mäselelerı bar. Al menıŋ barǧan saparym - köpten josparlanǧan resmi sapar. Sapar barysynda Resei dumasynyŋ basşysy ärıptesım Volodinmen jäne federasiia keŋesınıŋ töraiymy Matvienko hanymmen kezdesu boldy. Köptegen zaŋ şyǧaru jūmysy boiynşa, basqa da memleket arasyndaǧy qarym-qatynas mäselelerı boiynşa kelıssözder jürgızıldı. Sonyŋ ışınde bırneşe mäselenı aityp ketuge bolady. Ol – bızdıŋ jürgızuşılerımızdıŋ, jük tasuşylarymyzdyŋ Resei men Belarus şekarasynda, Qazaqstan men Resei şekaradaǧy jük tasu mäselelerı. Sonymen qatar, Reseide äskeri oqu oryndarynda oqyp jatqan qazaqstandyq studentterımızdıŋ mäselelerı qarastyryldy», – dedı Mäjılıs töraǧasy.
Sondai-aq jurnalister «Duma töraǧasy Volodinmen kezdesken kezde deputattardyŋ Qazaqstanǧa qarsy pıkır bıldırgenın eskerttıŋız be?” dep sūrady.
«İä, būl taqyrypta bız de äŋgımelestık. Osy taqyryp töŋıregınde federasiia keŋesınıŋ basşysy Valentina Matvienkomen de sūhbattasqan edık. Aldaǧy uaqytta bız būl mäsele boiynşa özara jūmys jasaityn bolyp kelıstık», – dedı ol.
Belgılı bolǧanyndai 22 aqpan künı Memleket basşysy Qasym-Jomart Toqaev ta Reseige barǧan. Prezident sonda bırneşe prezidentpen bırge «Bolaşaqtyŋ oiyndary» halyqaralyq turnirınıŋ aşylu räsımıne qatysqan.
Nazerke Sandybekqyzy
Ūqsas jaŋalyqtar
