Abai oblysynyŋ Aiagöz äskeri bölımınde Salamat Säbitov esımdı 18 jastaǧy merzımdegı sarbaz meningitten qaitys boldy. Būl turaly qūrlyq äskerlerı bas qolbasşysy basqarmasy mälımdedı, dep habarlaidy “Adyrna”.
Sarbaz 25 säuırde Soltüstık Qazaqstan oblysynan merzımdı äskeri qyzmetke şaqyrylǧan.
17 mamyrda Aiagöz qalasynyŋ ortalyq audandyq auruhanasyna emdeluge jıberılgen. Kelesı künı sarbazdyŋ jaǧdaiy kürt naşarlaǧan. Äskeri qyzmetker 19 mamyrda qaitys bolǧan.
Tuystarynyŋ aituynşa, ony äskeriler auruy turaly anyqtamasyna qaramastan äskerge alyp ketken.
"Ol äskerge jaramsyz boldy. Qolymyzda anyqtama da boldy. Salamattyŋ omyrtqasy auyrǧan. Közınde de mäseleler boldy. Būǧan qaramastan, ony tank bölımıne qyzmet etuge jıberdı. Ol bır apta auruhanada jatty. Jaǧdaiy qalai naşarlady, ata-anasyn şaqyrdy", – dedı onyŋ tuystary.
Salamattyŋ anasynyŋ aituynşa, basynda äskeriler eger balasyn jıbermese milliondaǧan aiyppūl töleitının aityp bopsalaǧan.
"22 säuırde ekı qyzmetker tüngı saǧat 22.00-de üige keldı. Ūlymdy äskeri mındetınen jaltaryp jür dep aiyptap, qylmystyq qudalau qaupı tönetının aitty. Tıptı ıs äskeri prokurorǧa berıletının jetkızdı. Äitpese bızge tört million teŋge aiyppūl töleuge tura keletının alǧa tartty. Al mende ondai aqşa joq. Özımız päter jaldap tūramyz. Taŋerteŋ ony sol jerden äskerge alyp kettı. Alaida būl kezde men jūmysta boldym. Ony poiyzda bolǧan kezde ǧana kördım. Mezgıl-mezgıl qoŋyrau şalyp tūrdyq. Eşteŋege şaǧymdanǧan joq. Sodan keiın ūlym jansaqtau bölımıne tüstı. Komandir bärı jaqsy ekenın aityp, alaŋdamauymdy ötındı. Alaida bız senbei tuysqanymyzdy jıberdık. Tuysymyz Salamattyŋ komaǧa tüskenın habarlady. Sodan men auruhanaǧa taŋerteŋ jettım. Sol künı onyŋ jüregı toqtap qaldy", – dep jylady sarbazdyŋ anasy.
Būl faktı boiynşa qylmystyq ıs qozǧaldy. Qazır tergeu jürıp jatyr.
