Şymkentte taǧy 8 adamnan koronavirus anyqtaldy. Onyŋ barlyǧy qauıptı ındet anyqtalǧan üşınşı nauqastyŋ tuystary men jaqyndary. 1 säuırden bastap barlyǧy oqşaulanǧan.
Oryn alǧan jaitqa bailanysty, azamattarymyzdy qorǧau jäne infeksiianyŋ ary qarai taraluynyŋ aldyn alu maqsatynda atalǧan otbasy tūrǧan Taimanov köşesı men oǧan jaqyn ornalasqan Särsenbaev jäne Süleimenov köşelerın karantinge jabyldy. 7 blok-beket qoiyldy.
Barlyq profilaktikalyq şaralar tiıstı deŋgeide jürgızılıp jatyr. Bügıngı taŋda Şymkentte koronavirus infeksiiasyn jūqtyrǧan tūrǧyndar sany – 11.
Zertteulerge säikes, qauıptı ındet anyqtalǧan ärbır jaǧdai virusty jappai jūqtyruǧa äkep soǧuy mümkın. Onyŋ soŋy nege äkeletının bız jaqsy tüsınemız. Sondyqtan oqşaulaudyŋ qataŋ türı ǧana qauıptı ındet taraluynyŋ aldyn alady.
Mūndai jaǧdaida özın-özı oqşaulau ǧana qala tūrǧyndaryn aman alyp qalatyndyǧyn taǧy da eskertemız.
Ökınıştısı, tūrǧyndardyŋ köpşılıgı qauıp qaterdı jetkılıktı därejede tüsınbeude, sebebı qala köşelerınde qozǧalys älı de köp.
Azamattardyŋ ömırı men qauıpsızdıgın, densaulyǧyn saqtau maqsatynda jäne Tötenşe jaǧdai jönındegı memlekettık komissiianyŋ kelısımımen 2020 jylǧy 4 säuır saǧat 21.00-den 15 säuır aralyǧyndaǧy kezeŋde Şymkent qalasy aumaǧynda karantin jariialanady. Karantin mynandai şekteu şaralaryn qamtidy:
Bırınşıden, karantin kezınde Şymkent qalasy bas sanitarynyŋ qaulysynda körsetılgen mekemelerden bölek menşık nysanyna qaramastan barlyq mekemelerdıŋ jūmysy toqtatylady. Ol mekemelerdıŋ tızımın äkımdıktıŋ resmi saity men äleumettık jelılerde jariialaimyz. Qoǧamdyq demalys oryndary, sonymen qatar saiabaqtar men balalar alaŋşalaryna baruǧa bolmaidy.
Ekınşıden, tūrǧyndar men kölıktıŋ barlyq türıne Şymkent qalasynan şyǧuǧa jäne qalaǧa kıruıne tyiym salynady. Būl şekteudıŋ Qaulyda körsetılgen belgılı azamattar men kölıkterge qatysy joq. Olardyŋ da tızımı jariialanady.
Üşınşıden, qala aumaǧynda şaǧyn mikroavtobustardyŋ qozǧalysyna tyiym salynyp, olardyŋ baǧyttary boiynşa avtobus qozǧalysy qoiylady. Qalaışılık qoǧamdyq kölık qozǧalysy taŋǧy 7.00-den 19.00-ge deiın ǧana jüzege asady.
Törtınşıden, qala aumaǧyndaǧy zalalsyzdandyru şaralary karantin merzımı aiaqtalǧanǧa deiın küşeitıletın bolady.
Besınşıden, azamattardyŋ jürıp-tūruyna şekteu qoiylady. Būl tūrǧyndardyŋ özın-özı oqşaulauy üşın jaǧdai jasauǧa baǧyttalyp otyr. Mūndai şekteuler medisina qyzmetkerlerıne, qūqyq qorǧau organdarynyŋ ökılderıne, qala tynys-tırşılıgın qamtamasyz etuşı kommunaldyq mekeme qyzmetkerlerıne qoldanylmaidy.
Qala tūrǧyndary tolyqtai şekteu kezınde üilerınen azyq-tülık, därı-därmek, medisinalyq kömek, bank jäne poşta qyzmetterın alu üşın ǧana şyǧa alady.
Soŋǧy künderı äleumettık jelılerde tarap jatqan türlı negızsız aqparattar taraluynyŋ aldyn alu maqsatynda, qala aumaǧynda kommendattyq saǧat äzırşe engızılmegenın resmi türde mälımdeimın. Degenmen tötenşe jaǧdai kezındegı talaptardy oryndauymyz kerek. Karantin rejimın būzǧan azamattardy qūqyq qorǧau organdarynyŋ patruldık qyzmetı anyqtaityn bolady. Sebebı özınıŋ densaulyǧyna nemqūraily qaraǧan azamattardyŋ äreketınen tūrǧyndardyŋ basym bölıgı zardap şekpeuı tiıs dep sanaimyn.
Altynşydan, Şymkent qalasynyŋ aumaǧyndaǧy tötenşe jaǧdai jäne karantin kezınde 55 jastan asqan tūrǧyndarǧa asa bır qajettılıksız köşege şyqpaudy ūsynamyz.
Jetınşıden, karantin kezınde tızım boiynşa jūmysy toqtamaǧan barlyq mekemeler qyzmetkerın jūmys orny turaly anyqtamamen qamtamasyz etuı şart.
Segızınşıden, azyq-tülık bazarlarynyŋ jūmys uaqyty 10:00-den 18:00-ge deiın, qadamdyq qaşyqtyqtaǧy azyq-tülık dükenderınıŋ jūmys uaqyty 10:00-den 21:00-ge deiın bolyp qalady.
Toǧyzynşydan, barlyq qoǧamdyq tamaqtanu oryndary jetkızıp beru rejimıne köşedı.
Onynşydan, azamattardyŋ qala aumaǧynda jeke kölıgımen jüruıne tyiym salynady. Būl talap tızımge kıretın mekeme qyzmetkerlerıne qoldanylmaidy jäne ol azamattardyŋ qolynda jūmys orny bergen anyqtama boluy kerek. Sondai-aq, jeke kölıkpen üiınıŋ janynda ornalasqan azyq-tülık pen bırınşı kezektegı tauarlar, medisinalyq qūraldar aluǧa jäne jedel jaǧdailarda medisina ūiymdaryna kömek aluǧa baruǧa bolady.
Ūqsas jaŋalyqtar
