Aqtöbe oblysy äkımınıŋ kabinetı ata-babasy aruaǧynyŋ arqasynda aman qalǧan. Jappai tärtıpsızdık kezınde Oŋdasyn Orazalinnıŋ jūmys ornyna eşkım timegen. Tıptı bülıkşıler tabaldyryǧynan da attamapty. Mūny basşy tylsym küşke balap otyr, dep habarlaidy «Adyrna» tılşısı KTK arnasyna sılteme jasap.
«Bırınşıden, menıŋ oiymşa, qūdai saqtady ma, ata-babanyŋ äruaǧy ma, iä, ıştei bıletın adamdar seskendı me, bıraq tabaldyryǧynan ataǧan joq. Äkımnıŋ kabinetı qandai da bır Jaratuşynyŋ arqasynda aman qaldy. Qanşa degenmen, bilık kielı dünie ǧoi»,– deidı ol.Miting bastalǧaly jūrt közıne körınbei ketken Oŋdasyn Orazalin ekı saǧattyq baspasöz mäslihatyn berdı. Bülınbegen kabinetınen bölek, köterılıstıŋ qantögıssız aiaqtalǧanyna şükır etıp otyr. Osy uaqytqa deiın qaladan tys şyqpai jūmys ornynda tapjylmai otyrǧanyn aitady. Aimaqta jariialanǧan tötenşe jaǧdaidy toqtatu üşın Memleket basşysyna ötınış joldaǧan. Endı bırer künde oblys äkımdıgı ǧimaratyndaǧy qorşau alynyp, qazyna aqşasyna qaita jöndeledı. Al miting kezınde narazy toppen kezdesuge qūlqy bolmaǧan. Esesıne Orazalin qala äkımı Ashat Şaharovty şeruge şyqqandarmen jüzdesuge jūmsadym dep otyr. Aqtöbe oblysynyŋ basşysy osy qyzmetke taǧaiyndalǧan üş jyl ışınde ötınış aita kelgen narazy toptyŋ bırde-bırın qabyldamaǧan eken.
«Men üş jyldan berı, osy jerge kelgennen berı, özderıŋ körgen şyǧarsyŋdar, bırde-bır osyndai zaŋsyz äreketke baryp, şyqqan da joqpyn. Tüsınıkteme bergen de joqpyn. Būl menıŋ ūstanǧan qaǧidatym dedım ǧoi. Myna zaŋsyz äreketke jinalǧan, zaŋsyz talap qoiǧandarmen bärı de zaŋǧa qaişy keldı. Talaptary memlekettık qūlatu boldy. Sonda men sol jerge şyǧyp, uäde beruım kerek pe?»– dep sözın tolyqtyrdy äkım.
«Adyrna» ūlttyq portaly
