Sharıǵatymyzdaǵy jerlengen adamnyń qabirin ashýdyń úkimi qandaı? Bul suraqqa Sansyzbaı Qurbanuly jaýap berdi, dep habarlaıdy "Adyrna" ulttyq portaly.
Muftiat.kz saıtynda jarııalanǵan vıdeoda Sansyzbaı Qurbanuly máıitti májbúr bolǵan úsh jaǵdaıda ǵana ashýǵa bolatynyn basa aıtty.
«Aqıqatta biz adam balasyn ardaqtadyq. Adam balasyn Alla taǵala ardaqty qyp jaratty. Ol tiri bola ma, bul dúnıeden óte me báribir, ol abyroıly bolady. Paıǵambarymyz qaıtys bolǵan adamnyń, ıaǵnı máıittiń súıegin syndyrý tiri adamnyń súıegin syndyrǵanmen birdeı deıdi», dedi Qurbanuly.
«Qabirdi qaıta ashý úkimine keler bolsaq, sharıǵatymyzda ony bostan bosqa ashý haram bop sanalady. Qabir tek qana muqtaj jaǵdaıda ǵana ashylady.
Mysaly jerlengen adamnyń máıit jatqan jerin sý bassa, bireýdiń menshigindegi jerde jerlense, nemese qylmystyq jaǵdaıdy anyqtaý barysynda máıitti ashý arqyly ǵana anyqtalatyn jaǵdaıda ǵana ruqsat etiledi», dep túsindirdi ol.
«Adyrna» ulttyq portaly
