Prezident köptegen sūraqtarǧa belgılı deŋgeide köŋıl könşıterlık jauap berdı. Bastysy – sözınen Nazarbaea klanymen at kekılın kesıskenı sezıldı. Degenmen kökeide jürgen bıraz saualdarǧa jauap ala almadyq. Olarǧa tergeu qorytyndysy şyqqannan soŋ bır-aq jauap beretının aŋǧartty. Ony da kütemız. Eger aldaǧy uaqta jauap bermese, Nazarbaev siiaqty ötırıkşı bolary haq. Ol özıne qater. Qazaq özın otyz jyl aldaǧan bır suaittan äzer qūtylǧanda endıgı ötırıkterge töze almaidy. Toqaevqa endıgı qalǧany – sözınde tūru. Eger sözınde tūra almasa – mūnyŋ soŋy zor äleumettık dümpulerge äkep soqpaq.
Prezidenttıŋ jüzınde özıne degen bek senımdılık, nege de bolsa tas tüiın bekıngendık bar. Ne bel, ne belbeu ketedı dep nar täuekelge bel bailaǧany baiqalady. Tek mūnysy saiasi albyrttyq bolyp şyqpasyn deiık. Elımız qazır öte kürdelı kezeŋdı bastan keşırude. Osy tūrǧyda Prezident halyqtyŋ köŋılıne qaraudy ūmytpaǧany abzal. Däl qazır halyqqa jyly jäne şyn söz kerek. Mäselen bügıngı sūhbatynda: "Qaŋtar qyrǧynynda jazyqsyz qūrban bolǧandardyŋ otbasyna köŋıl aitamyn. Memleket tarapynan marqūmdardyŋ artynda qalǧan otbasylaryna moraldık, äleumettık kömekter körsetıledı", – dep el kütken sözdı aitu kerek edı. Aitpady. Mūnysy dūrys bolmady. Kelesı mälımdemesınde aitady dep senemız. Aitpaqşy, eŋ ūnamaǧany – külımsırep söileumen boldy. Mūnysyn halyqqa körsetken qyry dep, ūǧyp jatqandar bar. Neşe jerden özıne senımdı bolsa da, bylai ıstemeuı kerek edı. El qaiǧy jamylǧanda, er külmeidı. Mūnysy äbestık endı.
Eldıŋ köŋılın su sepkendei basqan kelesı bır mäsele – sūhbattyŋ orys tılınde jüruı. Būl – äleumettık jelılerde eldıŋ narazylyǧyn, tıptı aşu-yzasyn tudyruda. Qazırgı qazaq tılınıŋ ahualy aŋşylar tyǧyryqqa tıregen jaraly jolbarys syndy. Atylsa – bilıktıŋ betın alyp tüskelı tūr. Tıptı maiyp qyluy da kädık. Mäselen, soŋǧy bolǧan taǧaiyndaular halyqtyŋ köŋılınen şyqqan joq. Basqa ūlt ökılderı memlekettık lauazymdarǧa taǧaiyndalmasyn demeimız, taǧaiyndalsyn, bıraq memlekettık tıldı bıluı şart. Sondyqtan memlekettık tıl mäselesıne kelgende Prezidentke öte abai bolǧany abzal. Öitkenı memlekettı tüzuşı halyq – qazaqtardyŋ üles salmaǧy soŋǧy sanaq nätijesı boiynşa 70 paiyzdan asqan. Al mūndai monoūltqa ainalyp kele jatqan halyqqa bylai orysşa şüldırlei bergen eş bolmaidy. Bızdıŋ şeneunıkterge reseişıl köŋıl-küiden arylu kerek. Būl da zor qater. Soŋǧy kezderı Aq Ordanyŋ saiasi atmosferasynda osy ahual basym. Ärine, körşımen tatu qarym-qatynas ūstanǧan jaqsy, bıraq olardyŋ saiasi-ekonomikalyq öktemdıgıne mülde jol beruge bolmaidy. Ökınışke qarai, soŋǧy kezde aqyryndap Reseidıŋ jetegınde ketıp baramyz, mūnyŋ soŋy neootarşyldyqqa ūlaspasyna kım kepıl? Prezidenttıŋ bügıngı sūhbatynyŋ negızgı kemşılıgı osy orys tılınde söilegenı boldy. Tym bolmaǧanda, qos jurnalistke – qazaq, orys tılderınde jauap bergenı jön bolar edı. Prezidenttıŋ qazaq tılıne kelgende yŋǧaisyzdanu kompleksı bar ekenın bılemız. Būdan arylu kerek. Şeşen söilemese de, qazaq tılın täp-täuır meŋgergenı söilegen sözderınen mälım. Endeşe, bügıngısıne ne joryq? Tuǧan tılınde söileu Prezidentke barer bolmauy tiıs.
Eks prezidentten bır aiyrmaşylyǧy – būrynǧy men bügıngı mälımdemelerınde köterıŋkı pafos joq. Eldegı bolyp jatqan barlyq situasiialardy prezident retınde körıp otyrǧandyǧy ärı olardy şeşudıŋ joldaryn bıletındıgı sezıledı. Özın nyq, ornyqty ūstauy osyndai oi tüiuge jeteleidı. Būl jaqsy, degenmen halyqtyŋ senımıne ie bolu bır basqa. Halyq senımı zor küş. Ol üşın taǧy da aitamyn, sol halyqtyŋ arman-aŋsaryn aŋdap, sol halyqtyŋ tılınde söileuı şart. Eger söilemese, būl problemaǧa nazar audarmai qoisa... aitudyŋ özı qorqynyşty.
Būdan bylai Prezident memlekettık tıldıŋ bedelın köteretın pärmendı şaralardy jüzege asyrady ärı özı de qazaq tılınde söileidı dep ümıttenemız. Ümıt üzılmeidı, degenmen är närsenıŋ şegı bolady.
"Adyrna" ūlttyq portaly
